E Tiko na Nodra iNuinui na Noqu Qase?

A TABAKI ena dua na gauna sa oti ena niusiveva ni Korea na Chosun Ilbo e dua na ulutaga vakavu kauai qo: ‘Vakacava e Lako i Eli na Goneyalewa Totoka o Shim Cheong ni Sega ni Kilai Jisu?’

E levu era sega ni taleitaka na ulutaga qori, ni qoroi vakalevu mai Korea na itukuni me baleti Shim Cheong. E vakacaucautaki vakalevu na goneyalewa qori ena veiyabaki sa sivi ni a solibula me vukea na tamana e mataboko. E ivakaraitaki ni yalodina vei ira na goneyalewa e Korea.

E levu era kaya ni cala qai veibeci ke lai totogitaki i eli e dua e va qori baleta wale ga ni sega ni papitaiso me lotu vaKarisito. Ia na kena italanoa o Shim Cheong a nanumi ni yaco ni bera ni vunautaki ena nona koro na itukutuku kei Jisu.

E tabaki tale ga ena niusiveva sa tukuni mai cake na nona ivakamacala e dua na italatala ni lotu. A tarogi na italatala qori ke ra na lai totogitaki i eli o ira kece era sega ni kilai Jisu ena gauna era mate kina. A sauma: “Eda sega ni kila. De dua e tiko na iTuvatuva Vakalou [me baleti ira qori].”

E BIBI NA PAPITAISO

E kaya na New Catholic Encyclopedia: “E bibi na papitaiso me rawa kina na bula. Me vaka e tukuna o Karisito, ena curu rawa ga ena Matanitu ni Kalou e dua ke sucu tale ena wai kei na Yalo Tabu (Jn 3.5).” Qori na vuna era nanuma kina eso ni o ira era mate ni bera nira papitaiso era kolotaki i eli se ra na vakararawataki ena dua tale na sala.

Ia eso tale era nanuma ni ka vakalialia na vakabauta qori. E milioni era sega ni kila na iVolatabu ena gauna era mate kina. E veiganiti beka mera vakararawataki tawamudu? Na cava e kaya na iVolatabu?

INUINUI E YALATAKI ENA IVOLATABU

E vakamatatataka na iVolatabu ni Kalou e kauaitaki ira era sega ni bau kila na lomana. E vakadeitaka vei keda qori na Cakacaka 17:30, e kaya: “Ni vakalaiva voli mai na Kalou na gauna ni lecaika ya.” Na inuinui cava e tukuna na iVolatabu me baleti ira na sa mate ia era se sega ni bau kila na Kalou?

Na isaunitaro qori e laurai ena ka e tukuna o Jisu vua na daubasulawa rau a mate vata. A kaya vei Jisu na daubasulawa: “Nanumi au ni oni sa tiko ena nomuni matanitu.” Cava qai kaya o Jisu? “Au tukuna vakadodonu vei iko nikua, daru na tiko vata mai Parataisi.”—Luke 23:39-43.

Vakacava a yalataka o Jisu vua na daubasulawa ni na lai bula i lomalagi? Sega. A se sega ni “sucu tale” ena wai kei na yalo tabu, na ka e dodonu me yaco vua e dua me rawa ni curu ena Matanitu vakalomalagi. (Joni 3:3-6) A yalataka ga vua o Jisu ni na bula e Parataisi. Ni Jiu na daubasulawa, e kila vinaka na vuravura Parataisi, ya na were o Iteni e vakamacalataki ena imatai ni ivola ena iVolatabu. (Vakatekivu 2:8) Na ka e yalataka qori o Jisu, e solia vua na inuinui ni na vakaturi ni sa vukici na vuravura me Parataisi.

E yalataka mada ga na iVolatabu “nira na vakaturi mai na mate na yalododonu kei ira na sega ni yalododonu.” (Cakacaka 24:15) Era okati mera “sega ni yalododonu” o ira na sega ni muria na ivakatagedegede ni Kalou nira sega ni kila na loma ni Kalou. O Jisu ena vakaturi koya na daubasulawa “sega ni yalododonu” a veivosaki kei koya, kei ira tale ga na milioni se bilioni era mate ena lecaika. Era na qai vulica ena vuravura Parataisi na ka e vinakata na Kalou, qai soli vei ira na gauna mera vakaraitaka nira lomani koya ena nodra talairawarawa ena nona ivakaro.

ERA NA VAKATURI NA SEGA NI YALODODONU

Nira vakaturi na sega ni yalododonu, vakacava era na lewai ena veika era cakava ni bera nira mate? Sega. E kaya na Roma 6:7: “O koya e mate e sa bokoci na nona ivalavala ca.” O ira gona na sega ni yalododonu sa saumi nodra ivalavala ca ena gauna era mate kina. Ia era na lewai ena ka era cakava nira vakaturi oti, sega ni veika era cakava ena lecaika ni bera nira mate. E yaga vakacava vei ira qori?

Nira vakaturi na sega ni yalododonu, ena soli vei ira na gauna mera vulica kina na lawa ni Kalou e volai tu ena ivolavivigi vakaivakatakarakara. Era na qai lewai me “salavata kei na ka era cakava,” ya nodra talairawarawa ina lawa ni Kalou se sega. (Vakatakila 20:12, 13) E levu e sa qai imatai ni gauna qori mera vulica qai cakava na loma ni Kalou mera rawata kina na bula tawamudu.

Na ivakavuvuli vakaivolatabu qori sa vukei ira e levu mera vakabauta tale na Kalou. E dua vei ira qori o Yeong Sug, a susu ena vuvale lotu Katolika kaukaua. Eso nona lewe ni vuvale era bete, a lai vuli sisita tale ga o koya ena itikotiko ni lotu Katolika. Ia a biubiu mai kea ni sega ni taleitaka na veika e caka tiko kina. E dredre tale ga vua me vakabauta na ivakavuvuli ni bukawaqa mai eli, baleta e tawadodonu qai sega ni ivakaraitaki ni loloma.

A qai vakaraitaka vua mai na iVolatabu e dua na iVakadinadina i Jiova na malanivosa qo: “Ni ra sa kila ko ira sa bula ni ra na mate: ia ko ira na mate era sa sega ni kila e dua na ka, a sa sega tale na kedrai voli.” (Dauvunau 9:5) E vukei Yeong Sug na iVakadinadina i Jiova me raica nira sega ni totogitaki tiko ena bukawaqa mai eli nona qase. Ia era moce tu ena ibulubulu, ra waraka tiko na veivakaturi.

Ni kila o Yeong Sug ni levu era se sega ni bau rogoca na ka dina mai na iVolatabu, e raica kina vakabibi na ka e kaya o Jisu ena Maciu 24:14: “Ena vunautaki mada na itukutuku vinaka ni matanitu ni Kalou ena veiyasa i vuravura me ivakadinadina ina veimatanitu kece, sa na qai yaco na icavacava.” Sa vakaitavi tiko ena gauna qo ena kena vunautaki na itukutuku vinaka kei na inuinui totoka e yalataki ena iVolatabu.

“SEGA NI DAU VEIVAKADUIDUITAKA NA KALOU”

E kaya na iVolatabu ni “sega ni dau veivakaduiduitaki na Kalou,” ia e “vakadonui ira era dokai koya ra qai cakava na ka e vinakata mai na veivanua kece.” (Cakacaka 10:34, 35) Meda nuidei ni na vakaraitaka na lewadodonu qori na Kalou e dau “vinakata . . . nai valavala dodonu kei na lewa dodonu.”—Same 33:5.