iDusidusi ni iVola ni Soqoni ni Bula vaKarisito kei na Cakacaka Vakaitalatala
ME 6-12
IYAU MAI NA VOSA NI KALOU | 2 KORINICA 4-6
Eda “Sega ni Soro”
it-1 724-725
Vosota
E bibi meda vakasamataka tiko ga na noda inuinui vaKarisito, oya na bula tawamudu kei na bula uasivi. Ena sega sara ni vakadaroya na inuinui qori na nodra veivakamatei na dauveitusaqati. (Rom 5:4, 5; 1Ce 1:3; Vta 2:10) Ena ka wale na noda rarawa ena gauna qo ni vakatauvatani kei na vakayacori ni inuinui totoka qori. (Rom 8:18-25) Nida vakanamata ena bula tawamudu, ena “lekaleka qai mamada ga” na veika rarawa eda sotava. (2Ko 4:16-18) Nida nanuma tiko ni lekaleka ga na veika rarawa da qai dei ena noda inuinui, eda na sega ni yalolailai, eda na yalodina tiko ga vua na Kalou o Jiova.
ME 13-19
IYAU MAI NA VOSA NI KALOU | 2 KORINICA 7-10
“Noda Soli ka ni Veivuke”
w98 1/11 25 ¶1
“Na Kalou e Taleitaki Koya e Soli ka ena Marau”
E vakamacalataka o Paula vei ira mai Korinica na nodra ivakaraitaki vinaka e Masitonia nira via veivuke ena leqa tubukoso. E vola o Paula: “Nira vakatovolei vakaca ena ka rarawa era sotava, era marau vakalevu ra qai dravudravua, ia e vuabale na nodra lomasavu.” A sega tale ni vinakati mera vakamasuti mai Masitonia. Ia e kaya o Paula nira “vakamasuti keitou tiko ga mera bau vakaitavi ena soli ka ni veivuke.” E talei dina na nodra soli ka ena marau mai Masitonia nida vakasamataka nira “dravudravua” sara.—2 Korinica 8:2-4.
ME 20-26
IYAU MAI NA VOSA NI KALOU | 2 KORINICA 11-13
“Votoki Paula na ‘Votonikau’”
it-2 177
iRegu
Na “iRegu ni Veitacini.” Era dau veikidavaki na lotu vaKarisito taumada ena “iregu ni veitacini” (Rom 16:16; 1Ko 16:20; 2Ko 13:12; 1Ce 5:26) se “iregu ni veilomani” (1Pi 5:14), kena irairai nira dau veireguci ga na yalewa, ra dau veireguci tale ga na tagane. Na ivakarau ni veikidavaki qo e rairai tautauvata kei na veikidavaki vakaIperiu ena gauna makawa, nira dau regu nira veikidavaki. E rairai sega ni vakamatatataka sara na iVolatabu na kena matailalai, ia “na iregu ni veitacini” se “iregu ni veilomani vakaveitacini” e vakaraitaka na nodra veilomani kei na duavata na ivavakoso lotu vaKarisito.—Jn 13:34, 35.
ME 27–JUNE 2
IYAU MAI NA VOSA NI KALOU | KALATIA 1-3
“Au Tukuna Sara ga e Matana”
it-1 880
iVola Vei Ira Mai Kalatia
Ni cavuta o Paula, “Kemuni na kai Kalatia lialia,” e sega ni dusia ni vakasamataki ira tiko na kai Kalatia ena yasayasa ena vualiku kei Kalatia. (Kal 3:1) Ia e dusia ga nona vunauca o Paula eso ena ivavakoso ni rawai ira na nodra vuku butobuto na Jiu, nira via tauyavutaka ga na nodra yalododonu nira muria na ituvatuva ni Lawa e soli vei Mosese, sega nira muria na ‘yalododonu ena vuku ni vakabauta’ e vakabibitaki ena veiyalayalati vou. (2:15–3:14; 4:9, 10) Na “ivavakoso e Kalatia” (1:2) e volavola kina o Paula, era lewena na Jiu kei ira na sega ni Jiu. Qori o ira na tavuki ena lotu vakaJiu kei ira na lewe ni Veimatanitu era sega ni cili, e macala ni vica qori era tikitiki Sikoteladi se Ailadi. (Cak 13:14, 43; 16:1; Kal 5:2) E cavuti gona mera lotu vaKarisito e Kalatia, nira vakaitikotiko ena vanua e vakatokai me o Kalatia. Na ibalebale gona ni ivola qori, oya ni volavola tiko o Paula vei ira e kila vinaka ena ceva ni vanua o Roma, sega ni o ira ena vualiku, a rairai sega ni veisiko kina.