iDusidusi ni iVola ni Soqoni ni Bula vaKarisito kei na Cakacaka Vakaitalatala
JUNE 3-9
IYAU MAI NA VOSA NI KALOU | KALATIA 4-6
“E Yaga Vei Keda na ‘Drama Vakaibalebale’”
it-1 1018 ¶2
Eka
E cavuti Eka na yapositolo o Paula ena drama vakaibalebale me dusia na matanitu o Isireli e veidinadinati kei Jiova ena veiyalayalati ni Lawa e Ulu i Saineai, era ‘vauci kece kina na bobula.’ Era sega ni dina ena veiyalayalati qori na Isireli nira valavala ca. Oya na vuna era sega ni sereki kina mera galala, ia era cudruvi nira valavala ca qai veiganiti mera mate. Qori na sala era bobula kina. (Jn 8:34; Rom 8:1-3) E tautauvata o Eka kei Jerusalemi ena gauna i Paula. Ena sala cava? E matataka na koroturaga o Jerusalemi na matanitu o Isireli, qori na vanua e bobula kina kei ira na luvena. Ia o ira na lotu vaKarisito era lumuti ena yalo tabu era luvei “Jerusalemi mai cake,” na yalewa e taukena na Kalou. O Sera na yalewa galala e dusi Jerusalemi mai cake, e sega vakadua ni bobula. Ia a saqati Aisake o Isimeli, era tusaqati tale ga na luvei “Jerusalemi mai cake” e sereki ira o Jisu vei ira na luvei Jerusalemi era bobula. E qai vakatalai o Eka kei na luvena, qori e dusia na nona vakanadakuya na matanitu o Isireli o Jiova.—Kal 4:21-31; raica tale ga na Jn 8:31-40.
Vakekeli ena Vosa ni Kalou
O Bau Kila?
Na cava e vakatokai Jiova kina o Jisu me “Apa, Tamaqu”?
Na vosa vakaArame na ‘Apa’ e rawa ni kena ibalebale “na tamaqu” se “I Tamaqu.” E laurai vakatolu na vosa qori ena qaqanimasu ena iVolatabu, e vakaibalebaletaki vua na Tamada vakalomalagi o Jiova. Na cava mada na ibalebale ni vosa qori?
E kaya na International Standard Bible Encyclopedia: “Ena gauna i Jisu, era dau cavuta na gone na vosa apa vei tamadra me dusia nodra veivolekati kei na veidokai.” Qo e dua na vosa ni veivakamenemenei, e dua tale ga na vosa ena tekivu vulica na gone. E vakayagataka o Jisu na vosa qori me vakaraitaka nona vakamamasu vei Tamana. Ni vo e vica na aua me mate, e masu vei Jiova ena were o Kecisemani ni vakayagataka na “Apa, Tamaqu.”—Mari. 14:36.
E tomana na International Standard Bible Encyclopedia ni “dau cavuti vua na Kalou na ‘Apa,ʼ ia e sega ni matau vei ira na Jiu ena gauna e veiliutaki kina na matanitu o Kirisi kei Roma. Era raica ni vosa qori e dau cavuti vakalevu, ena veibeci ke cavuti vua na Kalou. Ia e vakayagataka o Jisu na vosa qori ena masu me dusia nona veiwekani voleka kei na Kalou.” Rua tale na vanua e basika kina na vosa qori ena iVolatabu, oya ena nona ivola na yapositolo o Paula. Qori e dusia nira vakayagataka tale ga na lotu vaKarisito ena imatai ni senituri nira masu.—Roma 8:15; Kala. 4:6.
JUNE 10-16
IYAU MAI NA VOSA NI KALOU | EFESO 1-3
“Na Veiliutaki i Jiova kei na Kena iNaki”
it-2 837 ¶4
Na ka Vuni Tabu
Na Matanitu vakaMesaia. E vakamatatataka o Paula ena nona ivola na ka vuni tabu me baleti Karisito. E kaya ena Efeso 1:9-11 na nona vakatakila na Kalou na “ka vuni tabu” me baleta na nona inaki. E kaya: “E vinaka sara ga vua qo ni vaka na nona inaki me vakarautaka e dua na veiliutaki ena kena gauna lokuci, ya me kumuna vata tale na ka kece vei Karisito, na veika mai lomalagi kei na veika e vuravura. Io, mera kumuni kece vua. E lesi keimami tale ga me keimami itaukei vata kei koya ni digitaki keimami e liu me vaka na inaki i koya e dau vakayacora na ka kece me vaka na lomana.” E okati ena “ka vuni tabu” e dua na matanitu, na Matanitu vakaMesaia ni Kalou. Na “veika mai lomalagi,” e dusi ira na veiliutaki kei Karisito ena Matanitu vakalomalagi. Na “veika e vuravura” e dusi ira na vakarurugi ena lewa ni Matanitu vakalomagi. E kaya o Jisu vei ira na nona tisaipeli ni ka vuni tabu e dusia na Matanitu ni Kalou. E kaya: “E vakatarai vei kemuni moni kila na ka vuni tabu ni Matanitu ni Kalou.”—Mar 4:11.
JUNE 17-23
IYAU MAI NA VOSA NI KALOU | EFESO 4-6
Vakekeli ena Vosa ni Kalou
it-1 1128 ¶3
Savasava
Yalo tabu. E lewa o Jiova na nona yalo tabu, e dau vakayagataka me vakayacora na nona inaki. E savasava, ka tabu qai wasei tani me vakayagataka na Kalou. Ya na vuna e vakatokai kina me “yalo tabu” kei na ‘yalo savasava.’ (Sm 51:11; Lu 11:13; Rom 1:4; Efe 1:13) Ena savasava e dua ke dusimaki koya na yalo tabu. Na itovo dukadukali ena “vakararawataka” na yalo tabu. (Efe 4:30) E sega ni laurai na yalo tabu, ia qori e vakaraitaka na nona itovo savasava na Kalou, ena rawa ni ‘vakararawataki.’ Ni dua e cala, ena “bokoca na bukawaqa ni yalo tabu.” (1Ce 5:19) Ke tomani tiko ga na ivalavala ca qori, ena “vakararawataka” na yalo tabu. Ena rawa ni kedra meca tale na talaidredre na Kalou. (Ais 63:10) O koya e vakararawataka na yalo tabu ena rawa sara ni lai vosabeca. E kaya o Jisu ni qori e dua na ivalavala ca ena sega vakadua ni vosoti ena gauna qo, kei na gauna se bera mai.—Mac 12:31, 32; Mar 3:28-30; raica SPIRIT.
it-1 1006 ¶2
Kocokoco
Laurai ena iTovo. E dau laurai levu na kocokoco, ena kilai kina na inaki ca ni lomada kei na gagadre ca. E kaya o Jemesa ni matua na gagadre ca, ena vakasucuma na ivalavala ca. (Jem 1:14, 15) E kaya na yapositolo o Paula ni dua e kocokoco, e sa qaravi matakau. (Efe 5:5) Ena nona kocokoco e dua, sa lai okata na ka e vinakata me nona kalou, sa ikarua ni ka nona sokalou vua na Dauveibuli.—Rom 1:24, 25.
JUNE 24-30
IYAU MAI NA VOSA NI KALOU | FILIPAI 1-4
Vakekeli ena Vosa ni Kalou
it-2 528 ¶5
iSoro
iSoro livi. Nira butuka na Isireli na Vanua Yalataki, era dau cabora na isoro livi kei na vo tale ni isoro. (Tvl 15:2, 5, 8-10) E okati kina na waini (“alakaolo”) qai dau livi ena icabocabonisoro. (Tvl 28:7, 14; vakatauvatana Ly 30:9; Tvl 15:10.) E vola na yapositolo o Paula vei ira na lotu vaKarisito e Filipai: “Keu sova mada ga me vaka na isoro livi ena dela ni isoro kei na veiqaravi tabu e uqeti kemuni kina nomuni vakabauta, au na reki au na marau vata kei kemuni kece.” E vakayagataka eke o Paula na vakatautauvata ni isoro livi me dusia nona yalorawarawa ni soli koya ena vukudra na lotu vaKarisito. (Flp 2:17) Ni bera nona mate, e vola vei Timoci: “Au sa livi oti me vaka na isoro waini, sa voleka tale ga na gauna meu sereki kina.”—2Tm 4:6.