Me Kilai Rawarawa

Ka e Cakava o Jisu

VIDIO: Vakaraitaka o Jisu ni Kauaitaki Keda na Tamada

1. Sarava na VIDIO, se wilika Maciu 6:25-27, qai sauma na taro qo:

1. E vakaraitaka vakacava o Jisu ni kauaitaki keda o Jiova?

2. E kilai ira vinaka na manumanuvuka o Jisu, ia na tikina rawarawa cava e vakabibitaka? Na cava e talei kina na iwalewale qori?

Na Cava Eda Vulica Vei Jisu?

2. Ni rawarawa na noda veivakavulici, ena guiguilecavi dredre, ena tara tale ga na lomadra na vakarorogo.

Vakatotomuri Jisu

3. Kua ni vosa vakalevu. Kua ni tukuna na ka kece o kila me baleta na ulutaga drau vulica tiko, kauaitaka ga na ka e vulici tiko. Ni o taroga oti na taro, mo yalovosovoso ni waraki nomu gonevuli me sauma. Ke sega ni kila na kena isau, se tukuna e dua ka e veisaqasaqa kei na ivakavuvuli vakaivolatabu, taroga eso tale na taro me donu kina na nona ivakamacala. Ni sa matata ga vei gonevuli na tikina bibi, drau toso sara ena parakaravu tarava.

4. Vukei gonevuli me sema na ka vou e vulica kei na ka sa kila rawa tu. Kena ivakaraitaki, ni bera ni tekivu na lesoni me baleta na veivakaturi, de vinaka mo drau raica vakalekaleka na ka sa kila rawa tiko o gonevuli me baleta na kedra ituvaki na mate.

5. Digia vinaka na vosa vakatautauvata. Ni bera ni o vakayagataka e dua na ivakatautauvata, mo taroga:

1. ‘E kilai rawarawa na vosa vakatautauvata qo?’

2. ‘Ena taura rawa o gonevuli?’

3. ‘Ena vukei koya me nanuma vinaka na tikina bibi?’