iDusidusi ni “iVola ni Soqoni ni Bula vaKarisito kei na Cakacaka Vakaitalatala”

iDusidusi ni iVola ni Soqoni ni Bula vaKarisito kei na Cakacaka Vakaitalatala

JANUERI 1-7

IYAU MAI NA VOSA NI KALOU | JOPE 32-33

Vakacegui Ira na Nuiqawaqawa

it-1 710

Ilaiu

E sega ni dau veivakaduiduitaki o Ilaiu, ena sega ni tukuna na icavuti ni veivakacerecerei vua e dua. E kila ni vakataki Jope ga ni rau buli ena qele, e buli koya na Dauveibuli Cecere. E sega ni nona inaki o Ilaiu me vakarerei Jope, e vosa ga vua me vaka e dua na itokani dina, e cavuta na yacana, na ka ratou sega ni cakava o Elifasi, Pilitati, se o Sofa.—Jope 32:21, 22; 33:1, 6.

JANUERI 15-21

Vakekeli ena Vosa ni Kalou

it-1 492

Vakauitukutuku

E levu na sala e dau vakasavui kina na itukutuku ena gauna vakaivolatabu. Levu na gauna e vakau na itukutuku ina dua na vanua se na kena mai vanuatani ni talai e dua. (2Sa 3:17, 19; Jop 37:20) O ira na matailakolako era dauveilakoyaki era na vakasavu itukutuku mai na vanua yawa nira lai voli kakana, wai, kei na so tale na ka ena koro lelevu se na sala era muria tiko. O ira na tiko mai Esia, Aferika, kei Urope era takosova sara tiko ga na vanua o Palesitaina nira lako mai na dua vanua ina dua tale. O ira gona na tiko kina ena totolo ga nodra rogoca na itukutuku mai na veivanua yawa. Qori na itukutuku me baleta ga nodra vanua se vanuatani nira sota ena makete.

JANUERI 22-28

Vakekeli ena Vosa ni Kalou

it-2 222

Vunilawa

O Jiova na Vunilawa. O Jiova na Vunilawa dina duadua ga e lomalagi kei na vuravura. E vakavuna tale ga na lawa e vauca na ibulibuli era sega ni vosa se kila tu e dua na ka (Jop 38:4-38; Sm 104:5-19) kei ira na manumanu. (Jop 39:1-30) Ni buli keda tale ga o Jiova, eda vakarurugi ena lawa e lewa na lomalagi kei na vuravura. Ni tiko na noda itovo, eda rawa ni vakasamataka na ka, vaka kina noda bula vakayalo, eda vauci tiko ena lawa ni Kalou me baleta na itovo. (Rom 12:1; 1Ko 2:14-16) Era vauci tale ga ena lawa i Jiova na ibulibuli vakayalo me vakataki ira na agilosi.—Sm 103:20; 2Pi 2:4, 11.

E sega ni veisautaki rawa na lawa i Jiova me baleta na lomalagi kei na vuravura. (Jr 33:20, 21) Ni dei qai nuitaki na nona lawa e vauca na lomalagi kei na vuravura, o ira mada ga na saenitisi era vulica na lawa qori era rawa ni cakacakataka donu na itosotoso ni vula, vuravura kei na ibulibuli vakalomalagi ena dua ga na gauna lekaleka. O koya e beca na lawa ni lomalagi kei na vuravura ena totolo ga nona vakila na kena ca. E va tale ga qori na lawa ni Kalou me baleta na itovo savasava, e sega ni veisau, ke beci ena tiko na kena itotogi. Me vaka ga na kena muri vinaka na lawa ni lomalagi kei na vuravura, ena va sara ga qori na tau ni itotogi, ia ena sega ni yaco vakasauri. “Na Kalou ena sega ni vakalialiai. Na ka kece e kaburaka e dua ena tamusuka tale ga.”—Kal 6:7; 1Tm 5:24.

JANUERI 29–FEPERUERI 4

Vakekeli ena Vosa ni Kalou

it-2 808

Veivakalialiai

E yalodina tiko ga o Jope ena gauna kece e vakalialiai kina. Ia e qai cala nona rai, sega kina ni donu na ka e cakava, mani vakadodonutaki. E kaya vua o Ilaiu: “O cei tale na tamata e vakataki Jope, o koya e gunuva na veivakalialiai me vaka na wai?” (Jop 34:7) E kauaitaka ga vakalevu o Jope nona vakadonui koya, sega ni Kalou, e tukuna ni donu ga o koya. (Jop 35:2; 36:24) Ni ratou vakalialiai koya na tolu nona “itokani,” e raica qori o Jope ni caka sara tiko ga vua, sega vua na Kalou. Qori e vaka me soli koya tu ga vakarawarawa me vosabeci, me vakalialiai qai marautaka, vaka ga e taleitaka na wai e gunuva tiko. Ia e qai vakamacalataka na Kalou vei Jope ni o ratou na veivakalialiai tiko qori eratou tukuna na ka lasutaki baleta na Kalou. (Jop 42:7) E va tale ga qori na ka e tukuna na Kalou vua na parofita o Samuela nira sa vinakata sara ga na Isireli me dua nodra tui: “Nira sega ni beci iko, era beci au ga nira cata meu nodra tui.” (1Sa 8:7) E tukuna tale ga o Jisu vei ira na nona tisaipeli: “Era na cati kemudou na veimatanitu ena vuku ni yacaqu.” (Mac 24:9) Ni vakasamataka tiko qori na lotu vaKarisito ena donu nona rai ni vosota na veivakalialiai, qai vakalougatataki ena vuku ni nona vosota.—Lu 6:22, 23.

FEPERUERI 5-11

Vakekeli ena Vosa ni Kalou

it-1 425

Qanicovuata

Qo na iolo ni qanicovuata, me vaka na varile kei na witi. E dau vakayagataki vakaivakatakarakara na qanicovuata ena iVolatabu me dusia na kena butuki se samuti ena gauna makawa. Ni tamusuki oti, sa na sega ni yaga na qana ni sega ni rawa ni laukana, koya gona e veiganiti na kena vakaibalebaletaki ina dua na ka mamada, e sega ni yaga, se taleitaki, me tawasei na ka vinaka me biu tani na ka ca.

Ena butuki sara ga e liu na qana me lutu mai na lewena. Oti qori ena ceburaki me vukataki na qana me vaka ga e cakava na cagi ena kuvuniqele. (Raica WINNOWING.) E vakaraitaka vinaka qori na nona kauti ira tani na vukitani na Kalou o Jiova o ira, vaka kina o ira na tamata ca, kei na veimatanitu era dau veitusaqati. (Jop 21:18; Sm 1:4; 35:5; Ais 17:13; 29:5; 41:15; Ose 13:3) Na Matanitu ni Kalou ena vurumemeataki ira na meca mera mamada me rawa kina nira vukataki me vaka ga na qanicovuata.—Tan 2:35.

Na qana e sega ni yaga ena kumuni me vakamai, me kua ni cagina lesu de duka kina na ibinibini covuata. E tukuna tale ga o Joni na Dauveipapitaisotaki nira na rusa na lotu lasu. O koya na Dausamusamu, o Jisu Karisito, ena kumuni ira na witi, “ia ena vakama na qana ena bukawaqa e sega ni boko rawa.”—Mac 3:7-12; Lu 3:17; raica THRESHING.

FEPERUERI 12-18

Vakekeli ena Vosa ni Kalou

it-1 995

iBulubulu

E cavuqaqataka na yapositolo o Paula ena Roma 3:13 na ka e tukuni ena Same 5:9, ni vakatauvatana na nodra itilotilo na dau veivakacalai me vaka na “ibulubulu sa dola tu.” Era na biu na yagonimate ena ibulubulu e dola tu, e tadola gona nodra itilotilo nira cavuta na vosa gaga.—Vakatauvatana Mac 15:18-20.

FEPERUERI 19-25

Vakekeli ena Vosa ni Kalou

it-1 832

iQaqaloniliga

E vakaivakatakarakara na kena tukuni ni vakayagataka na Kalou na ‘iqaqaloniligana’ ena nona cakacaka, me vaka nona vola ena vatu na Vunau e Tini, (Ly 31:18; Vkr 9:10), nona cakamana (Ly 8:18, 19), kei na nona bulia na lomalagi (Sm 8:3). Na ‘iqaqaloniliga’ ni Kalou e cakava kina na nona cakacaka e dusia tiko na yalona tabu, se igu, me vaka e vakaraitaki ena itukutuku me baleta nona veibuli ena Vakatekivu, e tukuni kina ni yavavala voli ena delaniwai na igu kaukaua (ruʹach, “yalo”) ni Kalou. (Vte 1:2) Ia na iVolatabu vaKirisi vaKarisito e vakamacalataka vinaka na ibalebale ni kena vakayagataki vakaivakatakarakara, e tukuni ena Maciu ni o Jisu e vakasavi ira na timoni ena kaukaua ni ‘yalo tabu ni Kalou’ e qai vakamacalataka o Luke ni qori e vakavuna na “iqaqaloniliga ni Kalou.”—Mac 12:28; Lu 11:20.