E bogi tolu nodratou tiko voli e Pecani o Jisu kei ratou na tisaipeli ena nodratou ilakolako mai Jeriko. Ia ena matakacaca ni Moniti, ika10 ni Naisani ratou gole sara i Jerusalemi. Sa via kana o Jisu qai raica e dua na vunilolo. Ia vakacava e vua tu?

Ratou donuya tu qo na icavacava ni vula o Maji, ena qai vua na vunilolo ena June. Sa tu na drauna ni kadre totolo, e nanuma kina o Jisu ni na vua totolo tale ga. Ia e sega na vuana. E veivakacalai na drau ni vunilolo, mani tukuna o Jisu: “Me kua tale ni dua e kana lolo vei iko me tawamudu.” (Marika 11:14) E malai sara na vunilolo, e qai kilai ena siga tarava na kena ibalebale.

Ni ratou yaco e Jerusalemi o Jisu kei ratou nona tisaipeli, e lako sara o Jisu ina valenisoro a sikova ena yakavi nanoa. E sega ni veisiko ga, e cakava sara ga e dua na ka e tautauvata kei na ka e cakava ena tolu na yabaki sa oti ena Lakosivia ni 30 G.V. (Joni 2:14-16) E vakasavi ira na “veivoli tiko e loma” ni valenisoro qai vukica “nodra teveli na veisau ilavo kei na nodra idabedabe na volitaki ruve.” (Marika 11:15) E sega ni vakatara mada ga me dua e cola iyaya takoso e loma ni valenisoro me gole ina dua tale na yasa ni korolevu.

Na cava e vakasavi ira kina o Jisu na dauveisau ilavo kei ira na volitaki manumanu ena valenisoro? E kaya: “Vakacava e sega ni volai, ‘Ena vakatokai na noqu vale me nodra vale ni masu na veimatanitu’? Ia dou sa vukica me nodra qara na daubutako.” (Marika 11:17) E vakatokai ira mera daubutako nira lavaka vakasivia na isau ni manumanu e voli me isoro. E okata ya o Jisu me veivakaisini se butako.

Nira rogoca na iliuliu ni bete, na vunivola, kei na turaga na ka e cakava o Jisu, era saga tale mera vakamatei koya. Ia era sega ni kila mera cakava vakacava qori, nira tabili tiko ga yani na lewenivanua mera rogoci koya.

Era lako yani ina Lakosivia na Jiu kei ira era tavuki ina lotu vakaJiu. Era maliwai ira tale ga qori na kai Kirisi era lako yani ena soqo mera lai sokalou. De dua era doudou ni golevi Filipi na ilala qori nira rogoca na yacana vaKirisi, era kerea sara vua mera raici Jisu. E lomatarotarotaka o Filipi nodra kerekere, mani lai veivosakitaka kei Adriu. Oti rau gole sara ina valenisoro me rau lai tukuna vei Jisu.

E kila o Jisu ni sa vo ga e vica na siga me vakamatei, e sega kina ni gauna vinaka me sauma nodra vakatataro na lewenivanua se me vaqara rogo. E mani cavuta vei rau na tisaipeli e dua na vosa vakatautauvata: “Sa yaco mai na gauna me vakalagilagi kina na Luve ni tamata. Au tukuna vakadodonu vei kemudrau, ke lutu ina qele e dua na vua ni witi qai sega ni mate, ena dua tiko ga na vua ni witi, ia ke mate ena qai vua vakalevu.”—Joni 12:23, 24.

Ena rairai sega ni yaga e dua na vua ni witi. Ia ke lutu ina qele qai “mate,” e rawa ni kadre tale me sorenitei, toso na gauna sa na vua vakalevu. Ena vakasama vata qori, e uasivi o Jisu. Ia nona yalodina vua na Kalou me yacova na mate era na bula tawamudu kina o ira era dau vakuai ira tale ga. E kaya kina o Jisu: “O koya e lomana nona bula ena vakayalia, ia o koya e cata nona bula ena vuravura qo ena maroroya me rawata kina na bula tawamudu.”—Joni 12:25.

E sega ni nanumi koya ga o Jisu, ni vakamacalataka: “Ke dua e via qarava na veika e baleti au, me muri au, na vanua au tiko kina ena tiko tale ga kina na noqu dauveiqaravi. O koya e qaravi au, ena rokovi koya o Tamaqu.” (Joni 12:26) Dua dina na icovi totoka qori! O ira e rokova o Jiova era na tomani Karisito ena Matanitu ni Kalou.

Ni vakasamataka na rarawa levu ena sotava kei na nona mate, e tukuna kina o Jisu: “Au sa rarawa sara ga, na cava meu kaya? Tamaqu, ni vakabulai au ena gauna qo.” Ia e sega ni vakalecalecava o Jisu na bibi ni kena vakacavari na loma i Tamana. E tukuna: “Ia qo na vuna au lako mai kina ena gauna qo.” (Joni 12:27) E tokona o Jisu na inaki kece ni Kalou, okati e keri nona mate vakaisoro.

E tiko ena valenisoro o Jisu ena Moniti na ika10 ni Naisani, qai tukuna ni sa vakarau vakamatei. Ni kauaitaka na irogorogo kei Tamana, e kaya: “Tamaqu, moni vakalagilagia na yacamuni.” E rogo sara mai lomalagi e dua na domo: “Au sa vakalagilagia oti, au na vakalagilagia tale.”—Joni 12:27, 28.

Era kurabui na lewenivanua era tu e kea. Era nanuma eso ni kurukuru, eso tale era kaya: “E vosa vua e dua na agilosi.” (Joni 12:29) Ia qori na domo i Jiova, e sega tale ga ni imatai ni gauna ya mera rogoca kina na lewenivanua na domo ni Kalou me tekivu mai na cakacaka vakaitalatala i Jisu e vuravura.

Ni papitaiso o Jisu ena tolu veimama na yabaki yani e liu, a rogoca o Joni na Dauveipapitaisotaki ni kaya na Kalou me baleti Jisu: “Qo na Luvequ lomani, au vakadonuya.” Oti na Lakosivia ni 32 G.V., a vakamataliataki o Jisu ni ratou rai tu o Jemesa, Joni, kei Pita. Eratou rogoca na le tolu qori nona tukuna na Kalou: “Qo na Luvequ lomani, au vakadonuya. Dou rogoci koya.” (Maciu 3:17; 17:5) Ia qo na ikatolu ni gauna era rogoca kina e levu na domo i Jiova!

E kaya o Jisu: “E sega ni rogo mai na domo ya ena vukuqu, ena vukumuni ga.” (Joni 12:30) E dusia qori ni Luve dina ni Kalou o Jisu, na Mesaia yalataki.

Nona yalodina o Jisu me yacova na mate e vakavotuya na ivakarau ni bula meda muria, e vakadeitaka tale ga ni dodonu me vakarusai na iliuliu ni vuravura o Setani na Tevoro. E tukuna o Jisu: “E sa lewai tiko na vuravura qo, ena biu laivi na turaga ni vuravura qo.” Na mate i Jisu e ivakaraitaki ni qaqa, sega ni druka. Ena sala cava? E vakamacalataka o koya: “Ia o yau, keu laveti cake mai vuravura, era na galeleti au na matatamata kece.” (Joni 12:31, 32) Nona mate ena kaunirarawa o Jisu ena vagolei ira na lewenivanua vua, mera rawata kina na bula tawamudu.

Nira rogoca na ilala levu nona cavuta o Jisu nona “laveti cake,” era kaya: “Keimami rogoca ena Lawa ni na tiko ga me tawamudu na Karisito. Ia o qai tukuna vakacava ni na laveti cake na Luve ni tamata? O cei na Luve ni tamata qo?” (Joni 12:34) E tu na ivakadinadina ni Luve dina ni tamata o Jisu, na Mesaia yalataki. Era rogoca mada ga e levu na domo ni Kalou, ia era sega ni ciqomi koya.

Me vaka ga e dau cakava o Jisu, e tukuna ni o koya “na rarama.” (Joni 8:12; 9:5) E uqeti ira na ilala levu: “Ena tiko vakalekaleka kei kemuni na rarama. Ni lako ni se tiko kei kemuni na rarama me kua ni rawai kemuni na butobuto . . . Ni vakaraitaka ni oni vakabauta na rarama moni luve ni rarama, ni se tiko vei kemuni na rarama.” (Joni 12:35, 36) E biuti ira sara o Jisu ni se sega ni dodonu me mate ena ika10 ni Naisani. Ena qai “laveti cake” me vakoti ena kaunirarawa ena Lakosivia ni ika14 ni Naisani.—Kalatia 3:13.

Nida vakasamataka na cakacaka vakaitalatala i Jisu, e macala ni vakayacori na parofisai ena nodra sega ni vakabauti koya na Jiu. E parofisaitaka o Aisea nira na vakamatabokotaki na lewenivanua, era na sega ni via saumaki mera vakabulai nira yalokaukaua. (Aisea 6:10; Joni 12:40) Io, levu na Jiu era bese ni ciqoma na ivakadinadina ni o Jisu e nodra iVakabula yalataki, na sala ina bula.

E “vakabauti” Jisu o Josefa na kai Arimacea, o Nikotimo, kei na levu tale na iliuliu. Ia vakacava era na cakava sara kina e dua na ka se ra na lomalomarua nira rere de ra vakatalai mai na valenilotu se ni “bibi vei ira na veivakadonui ni tamata”?—Joni 12:42, 43.

Sa qai vakamacalataka o Jisu na ka e vauci ena noda vakabauti koya: “O koya e vakabauti au, e sega ni vakabauti au ga, e vakabauti koya tale ga e talai au mai, o koya e raici au e raici koya tale ga e talai au mai.” E bibi vei keda na ka dina e vakarota na Kalou me vakavulica tiko ga o Jisu, sa rauta me kaya o Jisu: “O koya e beci au qai sega ni rogoca noqu vosa, e tiko e dua me lewai koya. Na vosa au cavuta ena qai lewai koya ena iotioti ni siga.”—Joni 12:44, 45, 48.

E tinia o Jisu: “Niu sega ni vosa vakataki au ga, ia o Tamaqu e talai au mai e vakaroti au ena ka meu tukuna kei na ka meu vakavulica. Au kila tale ga ni nona ivakaro e vu ni bula tawamudu.” (Joni 12:49, 50) E kila o koya ni sa voleka me vakadavei nona dra me kedra isoro o ira era cakacakataka nodra vakabauti koya.—Roma 5:8, 9.