Dua na ka nodratou kurabui na yalewa ni sa lala na ibulubulu! E cici sara o Meri Makitala vei “Saimoni Pita kei na tisaipeli e dau lomana o Jisu,” oya na yapositolo o Joni. (Joni 20:2) Ia eratou raica na vo ni yalewa ena ibulubulu e dua na agilosi. E dua tale na agilosi e toka ena loma ni ibulubulu, e “vakaisulu balavu vulavula.”—Marika 16:5.

E tukuna sara vei ratou e dua na agilosi: ‘Kua ni rere, au kila ni dou vaqarai Jisu, o koya a vakamatei ena kau. E yali eke o koya, sa vakaturi me vaka ga a tukuna. Mai, dou mai raica na vanua a davo toka kina. Dou kusa, dou lai tukuna vei ratou na nona tisaipeli ni sa vakaturi mai na mate, raica! sa liu tale ga i Kalili.’ (Maciu 28:5-7) Eratou “sautaninini ena levu ni nodratou kidroa,” ratou lai tukutuku sara vakatotolo vei ratou na tisaipeli.—Marika 16:8.

E sotavi rau sara o Pita kei Joni o Meri. E wacegucegu qai kaya: “Era sa kauta na Turaga mai na ibulubulu, ia keitou sega ni kila na vanua era vakadavori koya kina.” (Joni 20:2) Rau cici sara ina ibulubulu o Pita kei Joni. E liu i kea o Joni, lai duri tu ga e tuba qai iro e loma ni ibulubulu, sa raica wale ga na vadreti.

Ni yaco yani o Pita, e curu sara i loma. E raica na isulu lineni kei na isulu a viviraki kina na ulu i Jisu. Ni curu yani o Joni, e vakadinata na ka e tukuna o Meri. Qo na ka e dau vakamacalataka vei ratou o Jisu, ia rau sega ni kila ni sa vakaturi o koya. (Maciu 16:21) Erau veilecayaki sara ga, rau mani lesu i vale. Ia e lesu ina ibulubulu o Meri qai toka ga e kea.

Ia ni ratou gole na vo ni yalewa me ratou lai tukuna vei ratou na tisaipeli ni sa vakaturi o Jisu, eratou sotavi Jisu qai kaya vei ratou o koya me ratou kua ni rere, ia me ratou tukuna vei ratou na nona tisaipeli me ratou lai sota e Kalili.—Maciu 28:9, 10; Luke 24:8-10.

Ni yaco na uneune rau qai rairai na agilosi ena ibulubulu, eratou “sokonu” na yadra, eratou “vaka sara ga na mate.” Ni ratou sa kilai yalodratou, ratou gole sara ina korolevu me ratou “lai tukuna vei ira na iliuliu ni bete na ka kece e yaco.” Era mani veivosaki na bete kei ira na nodra qase na Jiu. Era vakatulewataka me ratou vaqumi na sotia me ratou kua ni tukuna na ka dina e yaco, ia me ratou kaya: “Keitou a moce tu ena bogi, ratou lako mai na nona tisaipeli qai butakoca na yagona.”—Maciu 28:4, 11, 13.

E rawa ni vakamatei e dua na sotia ni Roma ke moce ena gauna ni nona yadra, era yalataka kina na bete: “Ke rogoca na kovana [na nodratou lasutaka ni ratou moce], dou kua ni leqa, keitou na qai vakamacalataka vua.” (Maciu 28:14) Eratou taura na sotia na ilavo eratou vaqumi kina, eratou cakava na ka era tukuna na bete. Sa qai tete vei ira na Jiu na italanoa lasu ni butakoci na yago i Jisu.

E se tagi tiko ga o Meri Makitala ena ibulubulu. Ni iro e loma ni ibulubulu e raica e rua na agilosi erau vakaisulu vulavula! Erau dabe toka ena vanua e vakadavori kina na yago i Jisu, dua e uluna, dua e yavana. Erau tarogi Meri: “Na cava o tagica tiko?” E sauma o Meri: “Era sa kauta na noqu Turaga, au sega ni kila na vanua era vakadavora kina.” E raivuki qai raica e dua tale. E cavuta na taro vata ga erau tukuna na agilosi qai tomana: “O vaqarai cei?” A nanuma o Meri ni dausasamaki na turaga ya, mani kaya vua: “Isa kemuni, ke oni sa kauti koya ina dua tale na vanua, yalovinaka ni tukuna vei au meu rawa ni lai maroroya na yagona.”—Joni 20:13-15.

Ia sa vakaturi o Jisu, rau sa veivosaki sara tiko ga kei Meri, e sega ga ni kila ni qori o Jisu. E kacivi koya sara o Jisu: “Meri!” Sa qai kilai Jisu o Meri ena ivakarau ni nona dau vosa vua. E sauma ena marau o Meri: “Raponai!” (kena ibalebale, “Qasenivuli!”). E kila o Meri ni sa vakarau gole i lomalagi o Jisu, mani tarai koya. E kaya vua o Jisu: “Kua ni tarai au tiko niu se bera ni lako vei Tamaqu. Mo lako ga vei ratou na taciqu qai kaya vei ratou, ‘Au sa lako cake vei Tamaqu, na Tamamudou tale ga, vua na noqu Kalou, na nomudou Kalou tale ga.’”—Joni 20:16, 17.

E cici sara o Meri ena vanua era soqoni kina na yapositolo kei na so tale na tisaipeli. E kaya vei ira: “Au sa raica na Turaga!” Qori e tokona nodratou italanoa na vo ni yalewa. (Joni 20:18) Ia e “vaka ga na itukutuku wale vei ira.”—Luke 24:11.

Ratou yalolailai tu na tisaipeli ena Sigatabu na ika16 ni Naisani. Eratou sega ni taura rawa se cava sa lala kina na ibulubulu. (Maciu 28:9, 10; Luke 24:11) Ena siga vata qori, rau biubiu mai Jerusalemi o Kaliopasa kei na dua tale na tisaipeli me rau gole i Emeo, rauta ni 11 na kilomita na kena yawa.

Erau veivosakitaka voli ena nodrau ilakolako na veika e yaco. E tomani rau sara e dua na turaga qai taroga: “Cava drau veivosakitaka tiko ni drau taubale voli?” E sauma o Kaliopasa: “Kena irairai ni o iko duadua ga o sega ni kila na veika e yaco tiko e Jerusalemi ena gauna qo.” E taroga sara na turaga ya: “Na cava ya?”—Luke 24:17-19.

Erau sauma: “Na veika e baleti Jisu na kai Nasareci . . . keimami a nuitaka ni na vakabulai Isireli o koya.”—Luke 24:19-21.

Erau talanoataka o Kaliopasa kei na nona itokani na ka e yaco ena siga ya. Rau tukuna ni ratou raica eso na yalewa ni sa lala na ibulubulu i Jisu, ratou raica tale ga e dua na ka veivakurabuitaki—erau rairai yani e rua na agilosi rau qai tukuna ni sa vakaturi o Jisu. Rau kaya ni so tale era gole ina ibulubulu ra qai “raica na ka vata ga ya, me vaka ga na ka eratou mai tukuna na yalewa.”—Luke 24:24.

Erau sega ni taura rawa na tisaipeli na ibalebale ni ka e yaco. E mani vakadodonutaka na turaga ya na rai cala e vakaleqa tiko na lomadrau: “Drau sa sesewa qai berabera nomudrau vakabauta na ka kece era tukuna na parofita! Vakacava e sega ni dodonu me sotava na Karisito na veika rarawa qo me qai taura nona itutu lagilagi?” (Luke 24:25, 26) Sa qai vakamacalataka vei rau e levu na tikinivolatabu me baleti Karisito.

Eratou sa volekati Emeo na le tolu. Erau via rogoca e levu tale na ka na rua na tisaipeli, rau mani tukuna vua na turaga ya: “Ni tiko ga kei keirau, sa yakavi mai, sa voleka ni dromu na siga.” E mani gole vata kei rau, ratou kana sara. Ni masu na turaga ya, tikica na madrai qai solia vei rau, rau sa qai kilai koya, ia e yali vakasauri ena kedrau maliwa. (Luke 24:29-31) Rau sa qai vakabauta ni sa vakaturi o Jisu!

Dua na ka na bula ni nodrau veivosakitaka na ka rau sotava: “E uqeta sara ga na lomadaru na nona vosa tiko vei kedaru e gaunisala, ni sereka voli na iVolatabu, se vakacava?” (Luke 24:32) Erau lesu totolo i Jerusalemi rau qai sotavi ratou na yapositolo kei na so tale. Ni bera ni rau talanoa o Kaliopasa kei na nona itokani, rau rogoca nira tukuna eso: “Sa vakaturi dina na Turaga, a vakaraitaki koya vei Saimoni!” (Luke 24:34) Rau talanoataka sara nona rairai vei rau o Jisu. Io, erau ivakadinadina tale ga na le rua qori.

Era kidroa kece ni sa rairai o Jisu ena loma ni vale! E sega ni vakabauti me yaco qori nira lokataka na katuba ena nodra rerevaki ira na Jiu. Ia sa tu qo o Jisu ena kedra maliwa. E kaya vei ira: “Me nomuni mada ga na vakacegu.” Ia dua na ka na levu ni nodra rere. Me vaka ga e yaco ena dua na gauna sa oti, era ‘nanuma ga nira raica e dua na yalo.’—Luke 24:36, 37; Maciu 14:25-27.

Me vakadeitaka o Jisu ni rairai vei ira ena yago vakatamata, e vakaraitaka sara na ligana kei na yavana qai kaya: “Na cava oni taqayataka? Na cava e vakatitiqa kina na lomamuni? Ni raica na ligaqu kei na yavaqu, o yau ga qo. Ni tarai au mada moni raica ni sega ni vakalewe se vakasuina na yalo me vaka oni raica vei au.” (Luke 24:36-39) Dua na ka nodra marau kei na nodra qoroqoro, ia era se lomalomarua tiko ga.

E saga e dua tale na sala o Jisu mera vakabauti koya kina, e taroga: “E tiko qori e dua na ka me laukana?” E kania sara e dua na tiki ni ika tavu. Sa qai tukuna: “Qo na ka au dau tukuna niu se tiko vata voli kei kemuni [ni bera niu mate], ni dodonu mera vakayacori na ka kece e baleti au e volai ena Lawa e vola o Mosese, nodra ivola na Parofita, kei na Same.”—Luke 24:41-44.

A vukei rau o Kaliopasa kei na nona itokani o Jisu me rau kila na iVolatabu, e cakava tale ga qori vei ira na tiko e kea: “Qo na ka e volai: ni na vakararawataki na Karisito, ena qai vakaturi tale mai na mate ena ikatolu ni siga, ena vunautaki ina matanitu kece na veivutuni me vosoti kina na ivalavala ca ena yacana—me tekivu mai Jerusalemi. Mo dou na vakadinadinataka yani na ka kece qo.”—Luke 24:46-48.

A sega ni tiko e kea na yapositolo o Tomasi. Oti e vica na siga, era kaya vua ena marau na vo ni tisaipeli: “Keitou sa raica na Turaga!” E tukuna o Tomasi: “Meu raica sara na we ni ivako e ligana, meu tara na we ni ivako e ligana, meu tara tale ga na sarisarina, au na qai vakabauta.”—Joni 20:25.

Oti e walu na siga, era soqoni tale tiko na tisaipeli ena lomanivale qai loka tu na katuba, e tiko tale ga kina o Tomasi. E rairai ena kedra maliwa o Jisu ena yago vakatamata qai kidavaki ira: “Me nomudou mada ga na vakacegu.” E vuki vei Tomasi o Jisu qai kaya: “Biuta i ke na nomu iqaqalo, raica na ligaqu, daramaka tale ga na ligamu i serequ, mo vakabauta, kua ni vakatitiqa tiko.” E sauma vua o Tomasi: “Noqu Turaga noqu Kalou!” (Joni 20:26-28) Io, e qai vakabauta o Tomasi ni sa vakaturi o Jisu, qai dua na kabula vakayalo e matataka na Kalou o Jiova.

E tukuna vua o Jisu: “O sa qai vakabauta ni o sa raici au? Era marau o ira era sega ni raica ia era vakabauta.”—Joni 20:29.