iDusidusi ni “iVola ni Soqoni ni Bula vaKarisito kei na Cakacaka Vakaitalatala”

iDusidusi ni iVola ni Soqoni ni Bula vaKarisito kei na Cakacaka Vakaitalatala

ME 6-12

Vakekeli ena Vosa ni Kalou

it-2 445

Ulunivanua

Dei tu ga, sega ni yavala, e cecere. E dau tukuni ni dei tu ga na veiulunivanua, e sega ni yavala. (Ais 54:10; Apa 3:6; vakatauvatana Sm 46:2.) Koya gona ni tukuna na daunisame na yalododonu i Jiova e vaka “na ulunivanua ni Kalou” (Sm 36:6, vmr), e rairai vakaibalebaletaka ni dei tu ga na yalododonu i Jiova, e sega ni veiveisau. Se, ni cecere na veiulunivanua, de dua e kaya tiko ni cecere na yalododonu ni Kalou ni vakatauvatani kei na yalododonu ni tamata. (Vakatauvatana Ais 55:8, 9.) Me salavata kei na kena sovaraki na ikavitu ni boulu ni cudru ni Kalou, e kaya na Vakatakila 16:20: “Era yali na veiulunivanua.” Qori e dusia nira na sega ni drovaka na cudru ni Kalou na veika cecere me vaka na veiulunivanua.—Vakatauvatana Jr 4:23-26.

ME 20-26

Vakekeli ena Vosa ni Kalou

it-2 16

Jiova

Na iVolatabu taucoko e vakabibitaka na veiliutaki cecere i Jiova. Qo e kilai kina na nona inaki levu na Kalou, ya me vakarokorokotaki na yacana. Qori e vauci kina na kena vakalasui na veika e vakalewai kina na yacana. Ia koya e bibi sara, e vinakati mera doka na yaca savasava qori o ira kece na ibulibuli vuku mai lomalagi kei vuravura. Kena ibalebale mera kila, mera doka tale ga na itutu cecere nei Jiova, me vu mai lomadra nodra vinakata mera qaravi koya, mera marautaka nodra cakava na lomana nira lomani koya dina. Nona masu vei Jiova o Tevita ena Same 40:5-10 e vakamacalataka vinaka na ivakarau ni rai qori kei na kena vakarokorokotaki donu na yaca i Jiova. (Dikeva ni vakaibalebaletaka na yapositolo na tiki ni same qori vei Karisito Jisu ena Ipe 10:5-10.)

ME 27–JUNE 2

Vakekeli ena Vosa ni Kalou

it-1 1242

Jakoli

E dau cavuti ena iVolatabu na jakoli me vakatauvatani kei na dua na ka. Kena ivakaraitaki, e tukuna o Jope na ituvaki vakaloloma e tu kina ni “tacidra na jakoli.” (Jop 30:29) Nira vakadrukai vakaca na tamata ni Kalou, e rairai cavuta na daunisame nodra lako vata yani na jakoli ena bucanivalu mera kanilaki ira na vakamatei (vakatauvatana Sm 68:23), e tagicaka: “Oni qaqiraki keimami ena vanua era tu kina na jakoli.” (Sm 44:19) Nodra viribaiti Jerusalemi na kai Papiloni ena 607 B.G.V., e salavata mai kei na nuiqawaqawa ni sa leqa na kakana. Era tini kania kina na luvedra na tinadra. E veiganiti gona nona tukuna o Jeremaia nira yaloca na ‘kainona,’ ia o ira na jakoli era lomani luvedra.—Lele 4:3, 10.

JUNE 3-9

IYAU MAI NA VOSA NI KALOU | SAME 45-47

Sere ni Nona Vakawati e Dua na Tui

it-2 1169

iValu

Ni cava na ivalu qo, ena sautu o vuravura me duanaudolu na yabaki. Ni tukuni ena same “Ena mai vakaotia o [Jiova] na ivalu e vuravura taucoko. E musuka o koya na dakaititi qai vorolaka na moto, e vakama na qiqinivalu ena bukawaqa,” e vakayacori taumada qori ena nona vakavuna na Kalou mera vakila na Isireli na vakacegu ni vakarusa na nodra iyaragi na meca. Ni vakadrukai ira na soqoni yani ena ivalu na Amaketoni o Karisito, ena vakilai ena iyalayala kei vuravura na marau kei na vakacegu. (Sm 46:8-10) O ira na vakadonui mera bula tawamudu, qo o ira na tukitukia na “nodra iseleiwau me batinisiviyara kei na nodra moto me isele ni sasamaki” ra qai “sega ni vulica tale na ivalu.” Qori na ka e “tukuna na gusu i Jiova ni lewe vuqa.”—Ais 2:4; Mai 4:3, 4.

JUNE 10-16

Vakekeli ena Vosa ni Kalou

it-2 805

iYau

E matanitu vutuniyau o Isireli, era marautaka na kana kei na gunu (1Tu 4:20; Dvu 5:18, 19), na nodra iyau e taqomaki ira mai na leqa e vu mai na dravudravua. (Vvb 10:15; Dvu 7:12) E salavata kei na inaki i Jiova nodra tikovinaka na Isireli ena vuku ni nodra cakacaka vakaukaua (vakatauvatana Vvb 6:6-11; 20:13; 24:33, 34), ia e raica tale ga mera vakasalataki ena rerevaki ni nodra guilecavi koya ni iVurevure ni nodra vutuniyau ra qai tekivu nuitaka ga na nodra iyau. (Vkr 8:7-17; Sm 49:6-9; Vvb 11:4; 18:10, 11; Jr 9:23, 24) Era vakadreti mera kila tiko ni sega ni tudei na iyau (Vvb 23:4, 5), e sega ni rawa ni soli vua na Kalou me ivoli mera vakabulai kina (Sm 49:6, 7), ena sega tale ga ni yaga vei ira na sa mate (Sm 49:16, 17; Dvu 5:15). E tukuni vei ira ni o koya e lomana na iyau ena rawa ni tini ena lawaki, ena sega tale ga ni vakadonui koya o Jiova. (Vvb 28:20; vakatauvatana Jr 5:26-28; 17:9-11.) Kena ikuri, era uqeti mera “rokovi Jiova ena [nodra] iyau.”—Vvb 3:9.

JUNE 17-23

Vakekeli ena Vosa ni Kalou

it-1 644

Toeki

E kai Itomi e nodra turaga na ivakatawanisipi nei Tui Saula, e vakacolati ena itavi ni veiliutaki. (1Sa 21:7; 22:9) O Toeki e tavuki ina lotu vakaJiu. Ni “wawa tiko ena mata i Jiova” e Nopi, kena irairai ena vuku ni dua na bubului, se so na ka dukadukali, se nanumi ni tauvi vukavuka, e raica kina o Toeki nona solia na Bete Levu o Eimeleki na madrai dauraici vei Tevita kei na iseleiwau nei Koliaci. E muri, ni vosa o Saula vei ira nona dauveiqaravi, e kaya nira veretaki koya kece ni tukuna o Toeki na ka e raica mai Nopi. E talatala o Saula me kacivi mai na bete levu kei ira na vo ni bete e Nopi qai vakatarogi Eimeleki, oti e vakaroti ira na italai mera vakamatei ira na bete. Nira sega ni via cakava qori, e vakaroti Toeki o Saula me vakamatei ira na 85 na bete. Ni cakava oti na ka torosobu qori o Toeki, e ravuti Nopi tale ga qai vakamatei ira kece na lewena, ya o ira na gone kei na qase, vaka kina na nodra manumanu.—1Sa 22:6-20.

Me vaka e laurai ena ulu ni Same 52, e vola o Tevita me baleti Toeki: “Na yamemu e gata vaka na itoro, e bukana na ca qai dau cakacaka vakailawaki. O taleitaka vakalevu na ca mai na ka vinaka, na lasu mai na tukuni ni ka dodonu. O taleitaka na vosa kece e veivakamavoataki, o iko na yame daulawaki!”—Sm 52:2-4.

JUNE 24-30

Vakekeli ena Vosa ni Kalou

it-1 857-858

Kila Oti tu na ka se Bera Mai

Nona liumuritaki Jisu o Jutasa Isikarioti e vakayacori kina e dua na parofisai vakaivolatabu, e vakaraitaka tale ga na nona kila o Jiova kei na Luvena na veika se bera ni yaco. (Sm 41:9; 55:12, 13; 109:8; Cak 1:16-20) E sega ni kena ibalebale qori ni sa kila oti tu o Jiova ni na liumuritaki Jisu o Jutasa. E tukuna eso na parofisai ni vica na itokani i Jisu era na liumuritaki koya, ia e sega ga ni tukuna vakamatata se o cei qori. E laurai tale ga ena ivakavuvuli vakaivolatabu ni sega ni kila rawa tu na Kalou na veika ena cakava o Jutasa. “Mo kua sara ni vakatotolotaka nona tabaki e dua e ligamu, mo kua ni okati ena nodra ivalavala ca eso tale, me savasava tiko ga na nomu itovo.” (1Tm 5:22; vakatauvatana 3:6.) E vakaraitaka o Jisu nona vinakata me digitaki vakayalomatua o ratou na 12 na nona yapositolo, me caka tale ga vakavinaka. Oya na vuna e masu kina vei Tamana ena dua na bogi taucoko ni bera ni vakatulewataka o cei me digia. (Lu 6:12-16) Ke sa kila oti tu o Jiova ni na liumuri o Jutasa, ena sega ni dei tu ga na nona veidusimaki. Me vaka e tukuni ena lawa, sa na okati tiko ena nodra ivalavala ca eso tale.

Koya gona, e macala mai na gauna e digitaki kina o Jutasa me yapositolo, e sega ni laurai e dua na ivakadinadina e lomana ni na liumuri. Ia e vakatara me tubu se ‘rovu mai e dua na waka gaga’ me vakadukadukalitaki koya. Qori e vakanadakuya kina na veidusimaki ni Kalou, me muria na veidusimaki ni Tevoro, e tini kina ena butako kei na lawaki. (Ipe 12:14, 15; Jn 13:2; Cak 1:24, 25; Jem 1:14, 15; raica JUDAS No. 4.) Ni sa yacova e dua na ivakatagedegede na nona bucina na ka ca o Jutasa, sa rawa kina ni kila o Jisu na ka e tu e lomana qai tukuna ni na liumuritaki koya.—Jn 13:10, 11.