LESONI 18

Yaga Vei Ira na Vakarorogo

1 Korinica 9:19-23

IVAKAMACALA LEKALEKA: Me vakavure vakasama vei ira na vakarorogo na ka o tukuna, mera vakila ni yaga vei ira.

Vakasamataka na ka era sa kila tu. Kua ni vuki tukuna na ka era sa rogoca oti, vukei ira me veisau na nodra rai ena ulutaga era sa dau rogoca.

Kua ni vakalusi gauna ena ka e sa kilai levu, ia vakamacalataka vinaka na veitikina vou.
Vakekeli qai vakasama vakatitobu. Okata ena nomu ivakamacala eso na itukutuku e sa kilai tu se dua na ituvaki e se qai yaco ga mo vakavotuya kina na veitikina bibi. Vakasamataka vakatitobu na ulutaga, raica me salavata kei na itukutuku o kauta cake mai qori.

Ni o dikeva tiko nomu ulutaga, vakasamataka eso na taro va qo ‘na cava, na vuna, ninaica, i vei, o cei, kei na sala cava.’ Vakayagataka eso na taro va qori qai sauma me bulabula kina na ulutaga o vosa tiko kina.
Kena yaga. Vakamacalataka na yaga ni kena muri e veisiga na ivakavuvuli vakaivolatabu. Veivosakitaka eso na ituvaki, itovo, kei na ivakarau ena yaga vei ira na vakarorogo.