O Cei na Yaca ni Kalou?

Ni o via kila e dua, na imatai ni ka o na tarogi koya kina, “O cei na yacamu?” Ke o taroga na Kalou na taro qori, na cava ena kaya?

“O yau o Jiova. Qori na yacaqu.”—Aisea 42:8.

De dua o se qai rogoca vakadua na yaca qori, ni levu na dauvakadewa ni iVolatabu era sega ni vakayagataka vakalevu na yaca ni Kalou se sega sara ga. Era dau vakaisosomitaka ena icavuti, “TURAGA.” Ia e voleka ni basika vaka7,000 na yaca ni Kalou ena vosa a volai taumada kina na iVolatabu. E tiko kina e va na matuavosa vakaIperiu na YHWH se JHVH, na kena ibalebale ena vosa vakaViti, “Jiova.”

Yaca ni Kalou vakaIperiu ena iVolavivigi Mai na Waitui Mate — iVolavivigi ni Same Mai na Waitui Mate, iMatai ni senitiuri G.V., VAKAIPERIU

Yaca ni Kalou Vakavalagi ena nona ivakadewa ni iVolatabu o Tyndale — Nona ivakadewa o Tyndale 1530, VAKAVALAGI

Yaca ni Kalou vakaSipeni ena iVolatabu na Reina-Valera — iVolatabu na Reina-Valera 1602, VAKASIPENI

Yaca ni Kalou vakaJaina ena iVolatabu na Union — iVolatabu na Union 1919, VAKAJAINA

E laurai na yaca ni Kalou ena vosa vakaIperiu, kei na levu tale na vakadewa

E BIBI ME KILAI NA YACA NI KALOU

E bibi vua na Kalou na yacana. E sega ni dua e vakatokayacataka na Kalou, o koya ga e digitaka na yacana. E kaya o Jiova: “Qo na yacaqu me tawamudu, meu nanumi kina mai na itabatamata ina dua tale na itabatamata.” (Lako Yani 3:15) E basika vakawasoma ena iVolatabu na yaca ni Kalou ni vakatauvatani kei na kena icavuti me vaka—Kaukaua Duadua, Tamada, Turaga, se Kalou. E laurai tale ga vakalevu na yacana ni vakatauvatani kei na yacadra eso me vakataki Eparama, Mosese, Tevita, se o Jisu. E nona inaki tale ga o Jiova me kilai na yacana. E kaya na iVolatabu: “Mera kila na tamata ni o kemuni, na yacamuni ga o Jiova, o kemuni ga oni Cecere Duadua e vuravura taucoko.”—Same 83:18.

E bibi vei Jisu na yaca ni Kalou. A vakavulici ira nona imuri o Jisu ena Masu ni Turaga mera kaya vua na Kalou: “Me vakarokorokotaki na yacamuni.” (Maciu 6:9) O Jisu mada ga a kaya ena nona masu: “Tamaqu, moni vakalagilagia na yacamuni.” (Joni 12:28) E bibi duadua vua na vakalagilagi ni yaca ni Kalou, qori na vuna e kaya kina ena nona masu: “Au sa vakatakila vei ratou na yacamuni au na vakatakila tiko ga.”—Joni 17:26.

E bibi vei ira na kila na Kalou na yacana. Era kila na dauveiqaravi ni Kalou ena gauna makawa ni vauci tiko ena yaca talei ni Kalou na nodra taqomaki kei na nodra vakabulai. “Na yaca i Jiova e valececere kaukaua. E cici kina na yalododonu me taqomaki.” (Vosa Vakaibalebale 18:10) “Era na bula o ira kece era masuta na yaca i Jiova.” (Joeli 2:32) E kaya na iVolatabu ni yaca ni Kalou era na kilai tani kina o ira na qaravi koya. “Era na dui muria kece na lewe ni veivanua na yaca ni nodra kalou, ia eda na muria na yaca i Jiova na noda Kalou me tawamudu, io me tawamudu.”—Maika 4:5; Cakacaka 15:14.

NA IBALEBALE NI YACANA

Na yaca e vakatakilai kina na Kalou. Era kaya e levu na dauvakadidike ni yaca i Jiova, e kena ibalebale “O Koya e Vakavuna me Yaco.” E kaya kina na Kalou o Jiova vei Mosese me baleta na ibalebale ni yacana: “Au na Cakava ga na ka au Vinakata.” (Lako Yani 3:14) Koya gona e sega wale ga ni Dauveibuli na Kalou, ni levu tale na ka e okati ena yacana. Na yacana e vakaraitaka na kaukaua e tu vua me vakayacora nona inaki, kei na nona vakayagataki ira nona ibulibuli mera cakava na lomana. Na icavuti ena rairai vakamacalataka ga nona itutu na Kalou, lewa, se kaukaua. Ia na yacana e vakaraitaka sara ga na veika e baleti koya, kei na ka e rawa ni cakava.

Vakavotui ena yacana na nona kauaitaki keda. Na ibalebale ni yaca ni Kalou e vakaraitaka nona se lomani ira tiko ga nona ibulibuli, wili kina o keda. Kena ikuri nona vakatakila na Kalou na yacana, e vakaraitaka ni vinakata meda kilai koya. Ni bera mada ga nida taroga na yacana e vakaliuliu sara ga me tukuna vei keda. Koya gona, e sega ni vinakata na Kalou meda nanuma ni tawakilai se me yawaki keda. E vinakata ga meda kila ni bula dina tiko, eda rawa ni toro voleka vua.—Same 73:28.

Noda vakayagataka na yaca ni Kalou e vakaraitaka nida via kilai koya. Kena ivakaraitaki, o na rairai kaya vei nomu itokani me kacivi iko ga ena yacamu. Cava o na kaya ke sega ni dau cakava qori? Ni toso na gauna de dua o na lomatarotarotaka ke vinakata dina mo drau veitokani se sega. E va tale ga qori na Kalou. Sa vakatakila oti o Jiova na yacana vei keda, e uqeti keda tale ga meda vakayagataka. Nida cakava qori eda sa vakaraitaka tiko vua nida via volekati koya. E kilai ira tale ga na “vakananuma [se, “vakamareqeta,” ivakamacala e ra] na yacana!”—Malakai 3:16.

Na noda vulica na yaca ni Kalou e bibi sara ga ena noda saga meda kilai koya. E sega ni yala ga e keri, e vinakati meda kila e levu tale na ka me baleti koya. Meda vulica tale ga na itovo e kilai tani kina.

O CEI NA YACA NI KALOU? Na yaca ni Kalou o Jiova. Na yaca qori e vakavotuya ni bula dina tiko, e rawa ni vakayacora nona inaki

O CEI E BULIA NA KALOU?

E levu era dau via kila na isaunitaro qori, de dua o dau vaqaqa tale ga. E rawa ni tarogi va qo: Ke dua e vakavuna se bulia na vuravura kei na ka kece e tu kina, o cei ga e bulia na Kalou?

Era vakadinadinataka na saenitisi ni tiko na itekitekivu ni lomalagi kei na vuravura. E tokona na vakasama qori na imatai ni wase ni iVolatabu, e kaya: “Ena ivakatekivu e bulia na lomalagi kei na vuravura na Kalou.”—Vakatekivu 1:1.

E sega ni rawa ni buli koya ga na lomalagi kei na vuravura, se me tu tu ga sa basika. Koya gona na ibulibuli kece, ena tiko e dua e bulia. Ke sega ni dua na ka e bula ni bera ni tauyavu na lomalagi kei na vuravura, ena sega ga na lomalagi kei na vuravura. De dua ena dredre meda kila na veika taucoko e vauci kina, ia o koya e vakavuna na lomalagi kei na vuravura e tawamudu qai tawarairai. E ka bula vakayalo na Kalou o Jiova, e kaukaua qai vuku, e vu tale ga mai vua na kabula kece.—Joni 4:24.

E kaya na iVolatabu me baleta na Kalou: “Ni bera ni sucu na veimatanitu se na nomuni vakatubura mai na vuravura kei na vanua bulabula, mai na gauna tawamudu ina gauna tawamudu oni Kalou tu ga.” (Same 90:2) E sega nona itekitekivu kei na nona itinitini, e matata ga ni bulia na ka kece ena noda vuravura “ena ivakatekivu.”—Vakatakila 4:11.