‘Au Taleitaka Dina na Nomuni iVunau!’

‘Au taleitaka dina na nomuni ivunau! Au sa vakanananu kina ena siga taucoko.’​—SAME 119:97.

1, 2. (a) Na ituvaki cava e sotava o koya e uqeti me vola na Same 119? (b) Na cava e qai cakava, ena vuku ni cava?

A SOTAVA tiko e dua na gauna dredre dina o koya e vola na Same 119. Era vakadiloi koya ra qai vakalasui koya o ira na nona meca era sega ni via muria na lawa ni Kalou. Era vosavakacacataki koya ra qai vakacacani koya o ira na turaga. Era voliti koya na tamata ivalavala ca ra qai via vakamatei koya. Oqo e vakavuna me “sega ni moce rawa ena vuku ni nona rarawa.” (Same 119:​9, 23, 28, NW, 51, 61, 69, 85, 87, 161) Dina ga ni sotava tiko na gauna dredre, e lagata na daunisame: ‘Au taleitaka dina na nomuni ivunau! Au sa vakanananu kina ena siga taucoko.’​​—Same 119:97.

² Eda na taroga beka, “E rawa ni vakacegui koya vakacava na daunisame na ivunau ni Kalou?” E vakaukauataki koya dina na nona vakabauta tu ni kauaitaki koya o Jiova. E vakamarautaki koya tale ga na nona kila na yaga ni nona muria na ivunau oya, dina ga nira vakararawataki koya tiko o ira na tusaqati koya. E kila na daunisame ni lomani koya o Jiova. E vakavukui koya cake sara mai vei ira na nona meca qai vakabulai koya tale tiko ga na nona muria na ivunau ni Kalou. E vakila o koya na vakacegu qai vinaka na nona lewaeloma ena gauna e muria kina na ivunau.​​—Same 119:​1, 9, 65, 93, 98, 165.

3. Na cava e ka ni bolebole kina vei ira na lotu Vakarisito na nodra bulataka tiko na ivakatagedegede ni Kalou nikua?

³ E vakatovolei tale tiko ga na nodra vakabauta e so na tamata ni Kalou nikua. Ena sega sara beka nida sagai meda vakamatei me vakataki koya na daunisame, ia eda bula tiko ena “gauna cacamatua, lewalewai dredre.” Levu vei ira eda bula vata tu nikua era sega ni kauaitaka na veika e tukuna na Kalou ni vinaka se ca. E laurai ena veika era saga nira daunanumi ira ga, era domodomoiyau, era dokadoka ra qai sega ni veidokai. (2 Timoci 3:​1-5, NW) E dau vakatovolei tale ga na nodra yalodina tiko ina nodra muria na itovo vakalou o ira na lotu Vakarisito gone. Ena gauna vaka oqori e rawa ni dau dredre kina na noda lomani Jiova kei na noda cakava tiko ga na veika e dodonu. E rawa vakacava meda taqomaki keda ena gauna vaka oqori?

4. E vakaraitaka vakacava na daunisame na nona taleitaka na Lawa ni Kalou, e dodonu beka meda vakatotomuria na lotu Vakarisito?

⁴ Na ka e vukea na daunisame me vorata na veika e sotava oya ni dau tikica e so na gauna me vakananuma kina na ivunau ni Kalou. Oya na vuna e taleitaka vakalevu kina na Vosa ni Kalou. E voleka ni veitikina kece ni Same 119 e tukuni kina e so na ka e baleta na lawa i Jiova.a Era sa sega ni vauci na lotu Vakarisito nikua ena Lawa e solia vei Mosese na Kalou me soli ina matanitu o Isireli makawa. (Kolosa 2:​14,VV) Ia, e se yaga tiko ga na ivakavuvuli ni Lawa oya. Na veivakavuvuli oya e vakacegui koya sara ga na daunisame, e rawa tale ga ni vakacegui keda na tamata ni Kalou ena gauna oqo nida sotava na veika dredre.

5. Na tiki ni Lawa cava e soli vei Mosese eda na dikeva?

⁵ Meda raica mada se eda na uqeti vakacava ena tolu mada ga na tiki ni Lawa a soli vei Mosese: na vakatabui ni Siga ni Vakacecegu, na tomitomi ena vanua sa tamusuki, kei na lawa e vakatabuya na kocokoco. Eda na raica ni yaga sara ina noda sotava na veika dredre ena gauna oqo na noda kila na ivakavuvuli ni lawa tolutolu oqo.

Kauaitaki ni Noda Gagadre Vakayalo

6. Na cava soti eda gadreva kece na tamata?

⁶ A buli na tamata me gadreva e levu na ka. Ena gadreva na tamata me kana, gunu, qai vakaruru me rawa kina ni bulabula vinaka vakayago. Ia ena vinakati tale ga vua me kauaitaka na nona “gagadre vakayalo.” Ena qai marau dina kevaka e cakava oqori. (Maciu 5:​3, NW) Ni raica o Jiova ni rui bibi me vakacegui na gagadre oqo e vakaroti ira sara ga kina na nona tamata mera cegu mai na nodra cakacaka ena dua taucoko na siga me rawa nira qarava kina na nodra sokalou.

7, 8. (a) E vakaduiduitaka vakacava na Kalou na Siga ni Vakacecegu kei na vo ni veisiga? (b) Na cava e inaki ni Siga ni Vakacecegu?

⁷ Na vakatabui ni Siga ni Vakacecegu e vakaraitaka na bibi ni kena kauaitaki na veika vakayalo. Na imatai ni gauna e cavuti kina na “siga ni vakacecegu” ena iVolatabu e donuya na gauna e soli tiko kina na mana ena vanualiwa. A tukuni vei ira na Isireli mera dau kumuna na madrai mana oqo ena ono na siga. Ena ikaono ni siga, mera qai kumuna kina na “kakana me rauta na bogi rua,” baleta ni sega ni vakarautaki na kakana ena ikavitu ni siga. Na ikavitu ni siga ena siga ni “vakacecegu tabu vei Jiova,” mera dui tiko kina na tamata ena nona tikina. (Lako Yani 16:​13-​30) E vakaroti ena dua vei ira na iVunau e Tini me kua sara ga ni dua na cakacaka me vakayacori ena Siga ni Vakacecegu. Ni siga tabu, ena vakamatei o koya e sega ni rokova.​​—Lako Yani 20:​8-​11; Tiko Voli mai na Lekutu 15:​32-​36.

⁸ Na lawa ni Siga ni Vakacecegu e yaga vakayago qai yaga tale ga vakayalo vei ira na tamata i Jiova. A kaya o Jisu: “Sa caka na siga ni vakacecegu e na vukudra na tamata.” (Marika 2:​27) E sega wale ga ni siga mera vakacegu kina na Isireli mai na nodra cakacaka, ia era dau toro volekata kina na nodra Dauveibuli na Isireli mera vakaraitaka vua nira lomani koya. (Vakarua 5:​12) E siga e qaravi vakatabakidua kina na veika vakayalo. E okati kina na nodra sokalou vakavuvale, nodra masu, kei na nodra vakananuma na Lawa ni Kalou. E taqomaki ira tale ga na Isireli mera kua ni vakayagataka kece na nodra gauna kei na nodra kaukaua ena kena qarai na veika vakayago. Na Siga ni Vakacecegu e vakadeitaka tale ga vei ira ni nodra veiwekani kei Jiova e ka bibi duadua ena nodra bula. E tokaruataka o Jisu na ivakavuvuli e se sega ni veisau oqo ena nona kaya: “Sa volai, Ena sega ni bula na tamata e na madrai duaduaga, sa bula ga e na vosa kecega sa lako mai na gusu ni Kalou.”​​—Maciu 4:4.

9. Na cava era vulica na lotu Vakarisito mai na Siga ni Vakacecegu?

⁹ Sa sega ni gadrevi vei ira na tamata ni Kalou nikua mera vakatatabutaka na siga ni vakacecegu e 24 na aua na kena dede, ia na Siga ni Vakacecegu e sega ga ni itukutuku makawa meda kila wale tu ga. (Kolosa 2:​16, VV) E sega li ni vakaraitaka vei keda na kena vinakati meda vakaliuca tiko na veika vakayalo? Meda kua ni vakalaiva me vakaruguta na veika vakayalo na ogaoga vakayago se qara marau. (Iperiu 4:​9, 10) Meda tarogi keda mada: “Na cava au vakaliuca tiko ena noqu bula? Au vakaliuca tiko beka na noqu vuli vakataki au, noqu dau masu, noqu lako ina soqoni, kei na noqu vunautaka na itukutuku vinaka ni Matanitu ni Kalou? Se sa mai vakaruguta na veika e so na veicakacaka bibi oya?” Kevaka eda vakaliuca na veika vakayalo, e yalataka o Jiova ni na solia vei keda na veika meda bula kina vakayago.​​—Maciu 6:​24-​33.

10. Ena yaga vakacava na noda biuta vakatikitiki na gauna me baleta na veika vakayalo?

¹⁰ Noda vulica na iVolatabu kei na ivola vakaivolatabu, kei na noda dau vakananuma na veika era volai kina, ena vukei keda meda toro volekati Jiova. (Jemesa 4:8) Sa 40 na yabaki na nona dau biuta vakatikitiki tiko na gauna me vulica kina na iVolatabu o Susan, dina ga ni a sega soti sara ni dau taleitaka taumada. E ka ni oca vua. Ia ena levu ga ni nona vuli, na levu tale ga ni nona taleitaka. Ena gauna oqo e dau rarawa kevaka e dua na ka e vakalatilati ina nona vuli vakataki koya. “E vukei au na noqu vuli vakataki au meu raici Jiova me vaka e tamaqu,” e kaya o koya. “Au nuitaki koya, au dau vakararavi vua, e rawarawa tale ga na noqu masu vua. E vakasakiti dina na nona lomani ira na nona tamata o Jiova, na nona kauaitaki au kei na nona dau vukei au.” E ka marautaki dina na noda dau kauaitaka tale ga na veika eda gadreva vakayalo!

Lawa ni Kalou me Baleta na Tomitomi

11. Na cava e gadrevi ena lawa e baleta na tomitomi ena were sa tamusuki?

¹¹ Na ikarua ni tiki ni Lawa e soli vei Mosese e vakaraitaka na nona kauaitaki ira na nona tamata na Kalou, oya na tomitomi ena were sa tamusuki. E vakarota o Jiova ni gauna e tamusuka kina na vua ni nona were e dua na Isireli dauteitei, e dodonu mera vakatarai o ira e sega na kedra mera lai kumuna na veika era vakavoca tu mai na dautatamusuki. Mera kua ni tamusuka na dauteitei na tutu ni nodra veiwere, se mera lai betia tale na vua ni vaini e se vo tu mai. Mera kua ni lai kauta mai na ivau sila e guilecavi tu mai. Oqo e dua na isolisoli vakayalololoma vei ira na dravudravua, vulagi, luveniyali, kei ira na yada. E cakacaka dredre toka na nodra lai tomitomi oya, ia era na sega kina ni kere kakana.​​—Vunau ni Soro 19:​9, 10; Vakarua 24:​19-​22; Same 37:25.

12. Na cava e vakarawarawataka na lawa ni tomitomi me cakava na dauteitei?

¹² E sega ni vakaraitaki ena lawa e baleta na tomitomi na levu ni ka me solia na dauteitei vei ira e sega na kedra. E vakatau vua na dauteitei na nona vakarabailevutaka se vaqiqotaka na tutu ni nona were e dau caka kina na tomitomi. Na lawa me baleta na tomitomi e vakavuvulitaka na lomasoli. E rawa kina vei ira na dauteitei mera vakavinavinakataki koya e vakatubura na itei baleta ni o koya e ‘yalololoma vua na dravudravua e sa dokai Koya tiko e buli koya.’ (Vosa Vakaibalebale 14:31) E dua vei ira o Poasa. E raica o koya me soli vakalevu na sila vua na yada o Ruci, o koya e dau tomitomi ena nona veiwere. E qai vakalougatataki Poasa vakalevu o Jiova ena nona lomasoli oya.​​—Ruci 2:​15, 16; 4:​21, 22; Vosa Vakaibalebale 19:17.

13. Na cava eda vulica ena lawa makawa e baleta na tomitomi?

¹³ E se sega ni veisau na ivakavuvuli ni lawa me baleta na tomitomi. E namaka o Jiova mera dau lomasoli na nona tamata vei ira era gadreva na veivuke. Na levu ga ni noda lomasoli, na levu tale ga ni noda vakalougatataki. “Dou dausoli, ka na soli vei kemudou,” e kaya o Jisu. “Nai vakarau vinaka, ka tabaki sobu, ka kuretaki vata, ka vuabale, era na solia na tamata ki na lomaseremudou. Ia nai vakarau dou sa vakarautaka, ena vakarautaki tale vei kemudou.”​​—Luke 6:​38.

14, 15. Eda vakaraitaka vakacava na lomasoli, ena yaga vakacava oqo vei keda kei koya eda vukea?

¹⁴ E vakatura na yapositolo o Paula meda “caka vinaka vei ira na tamata kecega, ka vakalevu vei ira era veitokani e na vakabauta.” (Kalatia 6:​10) E dodonu gona meda dau kauaitaka mera vukei vakayalo na tacida lotu Vakarisito ena gauna e vakatovolei kina na nodra vakabauta. De vinakati tale ga mera vukei mera lako mai ena Kingdom Hall se me lai voli mai na kedra kakana ena sitoa? Era tu beka e so era sa qase, tauvimate, se so e dredre mera biuta na loma ni nodra vale era na marautaka meda sikovi ira se lai vukei ira? Ke da dau kauaitaka na veika era gadreva o ira oqori, de dua ena vakayagataki keda o Jiova me sauma kina na nona masu e dua e vinakata me vukei. E noda itavi na lotu Vakarisito meda veivukei vakataki keda, ni dau yaga tale ga vei keda na solia na veivuke. Io e dau marautaki dina na noda lomani ira eda vakabauta vata, vakauasivi nida kila ni marautaka o Jiova na veika eda cakava oya.​​—Vosa Vakaibalebale 15:29.

¹⁵ E dua tale na sala bibi eda vakaraitaka kina na lotu Vakarisito na noda sega ni nanumi keda ga oya na noda vakayagataka na noda gauna kei na noda kaukaua ena noda lai tukuna na inaki ni Kalou. (Maciu 28:​19, 20) O koya sa vakila na marau ni nona vukea e dua me yalataka na nona bula vei Jiova e vakadinata na vosa i Jisu: “A ka ni veivakalougatataki vakalevu me soli ka, ka vakalailai ga me taura na ka.”​​—Cakacaka 20:35.

Qarauna na Kocokoco

16, 17. Na cava e vakatabuya na ikatini ni vunau e tini, ena vuku ni cava?

¹⁶ Na ikatolu ni tiki ni Lawa ni Kalou vei Isireli eda na veivosakitaka oya na ikatini ni ivunau e tini e vakatabui kina na kocokoco. E kaya na ivunau oya: “Mo kakua ni kocova na nona vale na kai nomu; mo kakua ni domona na watina na kai nomu, se kocova nona tamata, se nona vada, se nona pulumokau, se nona asa, se dua na ka sa nona na kai nomu.” (Lako Yani 20:17) Ena sega ni rawa vua na tamata me solia na ivunau oya baleta ni sega ni kila na ka e tu e lomada. Oya na vuna e uasivi cake kina na Lawa ni Kalou mai na lawa ni tamata. Era vakila na Isireli ena Lawa oya nira na saumitaro vei Jiova, o koya e kila na ka e tu e lomadra. (1 Samuela 16:7) Na ivunau tale ga oqo e tara sara ga na waka ni levu na itovo vakasisila e vakayacori.​​—Jemesa 1:​14.

¹⁷ Na lawa me baleta na ca ni kocokoco e vakaroti ira tale ga na tamata ni Kalou mera kua ni domodomoiyau, yalokocokoco, se didivaka na ivakatagedegede ni bula era tiko kina. E taqomaki ira tale ga mera kua ni temaki ina butako kei na itovo tawakilikili. Era na tiko e so na vutuniyau eda dau qoroya ra qai gugumatua cake sara vei keda. Kevaka eda sega ni tinia na noda vakasamataka tiko ga na veika oqori, eda na sega ni marau da qai rawa ni vuvutaki ira oqori. Na iVolatabu e vakatoka na kocokoco me “lomavakatani.” E vinaka cake me kua ni tiko vei keda na itovo oqori.​​—Roma 1:​28-​30.

18. Na mataqali yalo vakacava e laurai ena vuravura ena gauna oqo, na leqa cava e kauta mai?

¹⁸ Na yalo ni vuravura nikua e tokona vakalevu na domodomoiyau kei na veiqati. Na kacivaki ni ivoli ena gauna oqo kei na volivolitaki e uqeti keda meda volia na iyaya vovou baleta nira kaya nida na sega ni marau kevaka eda sega ni volia na iyaya oya. Oqo sara ga na mataqali yalo se rai e vakacala na Lawa i Jiova. E vaka kina na kena uqeti meda rawata vakalevu na iyau. E vakadreta na yapositolo o Paula: “Ko ira era gadreva me ra vutuniyau era sa bale e na veitemaki ka tacori e na gagadre ca ka lialia e vuqa sa kuitaki ira na tamata ki na leqa kei na rusa. Na dau lomana na i lavo sa i koya na vu ni ka ca kecega, ia e so era sa gole tani mai kina mai na vakabauta ka voroka vaka i ira na yalodra e na yaluma.”​​—1 Timoci 6:​9, 10, VV.

19, 20. (a) Na cava e bibi vei ira na rokova dina na lawa i Jiova? (b) Na cava ena dikevi ena ulutaga e tarava?

¹⁹ Era kila o ira na rokova na lawa ni Kalou na rerevaki ni domodomoiyau ra qai taqomaki ira mai kina. Me kena ivakaraitaki, e masuti Jiova na daunisame: “Mo ni vaqara na lomaqu ki na nomuni tukutuku, ia me kakua ki nai yau. Sa vinaka vei au na vunau ni gusumuni ka ca na tiki ni siliva kei na koula e vakaudolu.” (Same 119:​36, 72) Nida vakabauta na veivosa oqori, ena vukei keda me veiraurau vinaka na ka eda cakava meda kua kina ni coriti ena domodomoiyau, kocokoco, kei na noda didivaka na ivakatagedegede ni bula eda tiko kina. E yaga sara vakalevu na “qaravi Kalou,” sega ni kena kumuni vakalevu na iyau.​​—1 Timoci 6:​6, NW.

²⁰ Na ivakavuvuli ni Lawa i Jiova e solia ina matanitu o Isireli makawa e se yaga tiko ga ena noda gauna lewalewai dredre oqo me vaka ga na kena yaga ena gauna e solia kina na Lawa vei Mosese. Na levu ga ni noda bulataka na kena ivakavuvuli, na levu tale ga ni noda kila vinaka na kena yaga, kei na noda taleitaka da qai marautaka. Era oloni tu ena Lawa e levu sara na ivakavuvuli e yaga vei keda. E rawa nida raica na kedra yaga ena veika era sotava e so era vakamacalataki ena iVolatabu. Eda na dikeva e so vei ira ena ulutaga e tarava.

[iVakamacala e ra]

O na Sauma Vakacava?

• Na cava e taleitaka kina na lawa i Jiova o koya e vola na Same 119?

• Na cava eda na vulica na lotu Vakarisito ena lawa e baleta na Siga ni Vakacecegu?

• E yaga vakacava vei keda na lawa ni Kalou e baleta na tomitomi?

• E taqomaki keda vakacava na lawa e vakatabuya na kocokoco?

[iYaloyalo ena tabana e 21]

Na cava e vakabibitaki ena lawa ni Siga ni Vakacecegu?

[iYaloyalo ena tabana e 23]

Na cava eda vulica ena lawa me baleta na tomitomi?