iDusidusi ni “iVola ni Soqoni ni Bula vaKarisito kei na Cakacaka Vakaitalatala”

iDusidusi ni iVola ni Soqoni ni Bula vaKarisito kei na Cakacaka Vakaitalatala

JANUERI 6-12

Vakekeli ena Vosa ni Kalou

it-1 543

Vunikau ena iVolatabu

E cavuta na daunisame eso na ka me baleta na vuniolive ni yalataka vei ira na rerevaki Jiova: “Na luvemu era na vaka na vu ni olive gone era wavolita na nomu teveli.” (Sm 128:1-3) E dau musu na taba ni olive se sulina qai tei me dua na vuna vou. E rawa tale ga ni tubu mai na waka ni olive qase eso na sulina, me bula tiko ga kina. Me vaka na sulisuli qori, o ira na gone era wavoliti tamadra era qarava tale ga na nodra itavi me marau kina na vuvale.

JANUERI 13-19

IYAU MAI NA VOSA NI KALOU SAME 135-137

“Noda Turaga e Cecere Sara Vei Ira Kece na vo ni Kalou”

it-2 661 ¶4-5

Kaukaua, Cakamana

E vakatubuqoroqoro ni lewa na Kalou na veika e bulia. Me vakaraitaka o Jiova ni Kalou dina, ena rairai vinakati me lewa na ka kece e bulia, ena cakava qori ena sala ena veisemati kina kei na yacana. (Sm 135:5, 6) Era muria na matanisiga, na vula, na vo ni vuravura, kei na kalokalo na nodra itosotoso, era muria na draki (cagi, uca, kei na so tale) na kena lawa, era kumuni vata tale ga na vodre ra qai toki na manumanuvuka, e vakadinadinataki ni dodonu ga me lagiti na yaca ni Kalou.

Na Kalou o Jiova e rawa ni vakayagataka na ka e bulia kei na draki mera tukuna ni o koya dina ga na Kalou, ya ni vakayagataki ira mera vakayacora eso tale na ka, vakabibi ena gauna e vinakata kina. E sega ni veivakurabuitaki sara na dausiga ni vanua, na bisa ni uca, se dua tale na draki va qori, ia ena qai veivakurabuitaki ga ke vakayacori na ka e parofisaitaka o Jiova. (Vakatauvatana 1Tu 17:1; 18:1, 2, 41-45.) Levu na gauna, e vakatubuqoroqoro ena kena levu kei na kena kaukaua (Ly 9:24), se qai laurai vakadua, e sega ni kena ivakarau, se tawanamaki tale ga.—Ly 34:10; 1Sa 12:16-18.

Vakekeli ena Vosa ni Kalou

it-1 1248

Na vosa Ja e dau vakayagataki vakalevu me veisemati kei na ivakarau ni yalo ena veivakacaucautaki kei na lagasere, masu kei na vakamamasu, e vakavotui tale ga ena kena marautaki na qaqa kei na veivakabulai, se na kena vakadinadinataki na liga kaukaua ni Kalou. E levu tu na kena ivakaraitaki. Na matavosa, “Moni vakacaucautaki Ja na tamata!” (Aleluya) e dau vakacaucautaki kina na Kalou. Ena Same, na imatai ni vanua e laurai kina na Same 104:35. Ena so tale na same e rawa ni laurai ena kena itekitekivu ga (Sm 111, 112), so tale na gauna ena loma ni same (135:3), eso na gauna ena kena icavacava (Sm 104, 105, 115-117), ia levu ga na gauna ena kena itekitekivu kei na icavacava (Sm 106, 113, 135, 146-150). Ena ivola na Vakatakila, levu na gauna era vakacaucautaki Jiova na ka bula mai lomalagi nira cavuta na matavosa qori.—Vta 19:1-6.

Na vo ni vanua e laurai kina na “Ja,” e dusia tale ga na veivakacerecerei ena sere vei Jiova kei na kerekere. E okati kina na sere e lagata o Mosese ena vuku ni nona veivakabulai o Ja. (Ly 15:2) Na kena e vola o Aisea ni cavuti vata na rua na yaca “Ja Jiova” e vakabibitaka na ka e tukuni. (Ais 12:2; 26:4) Ni vakabulai vakacakamana o Esekaia ni sa voleka tu ni mate, e cavuta vakarua na Ja ena nona serekali ni veivakacerecerei me vakaraitaka na levu ni nona marau. (Ais 38:9, 11) E tukuni eke ni sega ni rawa nira vakacaucautaki Ja na mate, ia o ira na bula tiko era na vakacaucautaki koya. (Sm 115:17, 18; 118:17-19) E laurai ena so tale na same na masu ni vakavinavinaka ni veivakabulai, veitaqomaki, kei na veivakadodonutaki.—Sm 94:12; 118:5, 14.

JANUERI 20-26

Vakekeli ena Vosa ni Kalou

it-1 862 ¶4

Veivosoti

E vinakati me veivosoti na lotu vaKarisito, se mani vakacava na levu ni ca e caka vua. (Lu 17:3, 4; Efe 4:32; Kol 3:13) Na Kalou ena vosoti ira ga era dau veivosoti. (Mac 6:14, 15) Ia ke dua e valavala ca bibi mani biu tani mai na ivavakoso na “daucaka ca” qori, toso na gauna ena dodonu me vosoti ke vakaraitaka ni sa veivutuni dina. Ena gauna qori e rawa nira vakaraitaka kece na lewe ni ivavakoso na nodra lomani koya. (1Ko 5:13; 2Ko 2:6-11) Ia era na sega ni vosota na lotu vaKarisito e dua e nakita nona valavala ca qai sega ni veivutuni. Ena wili me meca ni Kalou.—Ipe 10:26-31; Sm 139:21, 22.

JANUERI 27–FEPERUERI 2

Vakekeli ena Vosa ni Kalou

it-2 1151

Weli gaga

Vosa Vakatautauvata. E vaka na weli gaga ni gata na nodra lasulasu kei na vakaucaca na tamata ca, e vakarogorogocataka e dua. (Sm 58:3, 4) E tukuni me baleti ira na dauvakaucaca: “E tu ena daku ni tebenigusudra na weli gaga ni gata,” me vaka ga ni tiko ena daku ni tebenigusuna na gata na itawatawa ni weli gaga kei na batina lelevu ena galegalena e cake. (Sm 140:3; Rom 3:13) Ke vakayagataki vakatani na yameda ena vakaucaca, kakase, vakavulica na ka lasu, se vosavakacaca, e vakaraitaka ni “sinai ena ka gaga e veivakamatei.”—Jem 3:8.

FEPERUERI 3-9

Vakekeli ena Vosa ni Kalou

it-1 111 ¶9

Manumanu

E vakavulica na iVolatabu mera karoni vinaka na manumanu, mera lomani tale ga. Io, e vakaraitaka o Jiova ni dau vakarautaka vakayalololoma na ka mera bula kina, mera bulabula tale ga. (Vvb 12:10; Sm 145:15, 16) E vakaroti ena Lawa e soli vei Mosese mera qaravi vinaka na manumanu. Ni lako sese na manumanu, me vakasukai vua na kena itaukei; ke bikai koya na ka e colata tiko, me vagalalataki. (Ly 23:4, 5) Mera lomani nira vakacakacakataki. (Vkr 22:10; 25:4) Mera cegu tale ga na manumanu ena Siga ni Vakacecegu me vaka ga na tamata. (Ly 20:10; 23:12; Vkr 5:14) Me lewai vinaka na manumanu rerevaki se vakamatei. (Vte 9:5; Ly 21:28, 29) Me kua ni vakawataki vata e rua na mataqali manumanu.—Vns 19:19.

FEPERUERI 10-16

Vakekeli ena Vosa ni Kalou

it-1 316

Manumanuvuka

E tukuna na daunisame vei ira na “manumanuvuka” mera vakacaucautaki Jiova (Sm 148:1, 10). Era cakava qori na manumanuvuka ena vereverea ni kedra ibulibuli. Dua na manumanuvuka e rawa ni 1,000 ina sivia ni 20,000 na vutina. Ia e dua na vuti ni manumanu, e tiko na suina (shaft) e vu mai kina e vica vata na drau na sui lalai (barb), nida raica yani e vaka tu e dua na lawalawa. Ena loma ni lawalawa qori e tu kina e vica vata na drau na sui lalai, ena dua na sui qori e tiko na kena icori. E tukuni gona ni dua na taba ni ruve e ono na idi na kena balavu, e tiko kina e rauta ni vica vata na drau na udolu na sui lalai (barbule) qai vica vata na milioni na sui lalai sara (barbicel). Na ibulibuli ni manumanuvuka kei na tabana e uasivia na vereverea ni ibulibuli ni waqavuka kei na igu e vinakati me vuka kina. Ni vakalomana na sui ni manumanuvuka e mamada kina. Na sui mada ga ni manumanu ni cagi (frigate bird) e 2 na mita na balavu ni tabana e rawa ni voleka ni 110 na karamu na kena bi. Eso na sui ni tabadra na manumanuvuka lelevu e tiko na kedra ivakadei me vaka ga na ivakadei ena loma ni taba ni waqavuka.

FEPERUERI 17-23

Vakekeli ena Vosa ni Kalou

it-1 846

Lialia

Qo e sega ni vakaibalebaletaka e dua e ulu malumalumu, ia na “lialia” e volai ena iVolatabu, e dusia e dua e sega ni via muria na ivakatagedegede dodonu ni Kalou. Qo e vica na kena vosa vakaIperiu: kesilʹ (“na yalowai”; Vvb 1:22), ʼewilʹ (“na sesewa”; Vvb 12:15), na·valʹ (“na lialia”; Vvb 17:7), kei lets (“na dauveivakalialiai”; Vvb 13:1). Na vosa vaKirisi aʹphron e dusi koya e “sesewa” (Lu 12:20), a·noʹe·tos e dusia e dua e “lialia” (Kal 3:1), kei mo·rosʹ e vakaibalebaletaka e dua e “sese” se “lialia” (Mac 23:17; 25:2).

FEPERUERI 24–MAJI 2

Vakekeli ena Vosa ni Kalou

it-1 1211 ¶4

Yalodina

E rawa nida yalodina tale ga va qori, ia e sega ni rawati ga ena noda kaukaua. E rawati ga nida vaqaqacotaka noda vakabauta kei na noda nuitaki Jiova vakalevu kei na nona kaukaua me veivakabulai. (Sm 25:21) E yalataka o Jiova ni o koya na “isasabai” kei na “idrodro,” ena taqomaka nodra sala na yalodina. (Vvb 2:6-8; 10:29; Sm 41:12) Nira kauaitaka o ira qori me vakadonui ira o Jiova, era na taqomaki kina, e rawa tale ga nira muria na sala dodonu mera rawata kina nodra isausau. (Sm 26:1-3; Vvb 11:5; 28:18) E vaka me lomaleqa o Jope ni raica nodra rarawa na tamata tawacala ena veiliutaki ni tamata ca, ra qai mate vata kei ira na daucaka ca. Ia e veivakadeitaki o Jiova ni kila vinaka nodra bula na yalodina qai yalataka ni na sega ni mudu na nodra ivotavota, ena vakacegu nodra veigauna se bera mai, era na taukena tale ga na ka vinaka. (Jop 9:20-22; Sm 37:18, 19, 37; 84:11; Vvb 28:10) Kena ibalebale ena rai nei Jope, e dodonu me dokai o koya e yalodina mai vei koya e vutuniyau. (Vvb 19:1; 28:6) Mera marau na gone e va qori na nodra itubutubu (Vvb 20:7), nira okati ena ivakaraitaki totoka nei tamadra, e rogovinaka kina na yacadra, era dokai tale ga kina.