Sa Kaci Tiko na Vuku—O Bau Rogoca?
“Sa daukaci ko vuku, se segai? Ka dautabalaka na domona ko yalomatua? Sa tu e na dela ni tikina cecere, e na bati ni sala e na kena basoga ni sala . . . E na mata ni katuba, sa dauvunau ko koya.”—VOSA VAKAIBALEBALE 8:1-3.
E YAGA vakalevu na vuku. Ke sega na vuku, ena levu noda cala. Ia eda na kunea e vei na vuku dina? A vakasamataka tiko o koya e vola na Vosa Vakaibalebale na nona vuku tawavakaiyalayala na Dauveibuli. E tu vakarawarawa vei keda kece na vuku qori ena dua na ivola vakamareqeti, na iVolatabu. Dikeva mada qo:
E kaya na ivola na World Book Encyclopedia, ni iVolatabu e “ivola veisoliyaki vakalevu duadua ena itukutuku ni kawatamata.” Ni vakatauvatani kei na so tale na ivola, na iVolatabu e vakadewataki vakalevu duadua ena duidui vosa.” Nikua, e sa tabaki vakatikina se tabaki taucoko na iVolatabu ena rauta na 2,600 na vosa, ra qai wilika rawa e sivia na 90 na pasede na lewe i vuravura.
E dua tale na sala e ‘kaci tiko ga kina vakadomoilevu’ na vuku. E tukuni ena Maciu 24:14: “Ena vunautaki mada na itukutuku vinaka ni matanitu ni Kalou ena veiyasa i vuravura me ivakadinadina ina veimatanitu kece, sa na qai yaco na icavacava [ni vuravura qo].”
Na “itukutuku vinaka” qori e vuku dina, ni laurai na vuku ni Kalou ena nona vakarautaka na nona Matanitu me iwali ni leqa ni kawatamata. Na Kalou e tauyavutaka na Matanitu qori me lewa na vuravura taucoko, mera sa vakarurugi ga na lewe i vuravura ena dua na matanitu. (Taniela 2:44; 7:13, 14) Qori na vuna a masuta kina o Jisu Karisito: “Me yaco mai na nomuni matanitu. Me caka na lomamuni e vuravura me vaka e caka tiko mai lomalagi.”—Maciu 6:9, 10.
Era raica na iVakadinadina i Jiova me itavi dokai na nodra kacivaka na Matanitu ni Kalou ena 239 na vanua! Io, sa ‘kaci’ tiko ena “mata ni katuba” na vuku, oya na vuku vakalou. O bau rogoca?