Cava e Vakatokai Kina o Jisu me Luve ni Kalou?
Kena isau vakaivolatabu
Na cava eda vulica ena matavosa “Luve ni Kalou?” (Joni 1:49) Qori e dusia sara ga ni Kalou o Jiova e Dauveibuli, se iVurevure kece ni bula, e vakavuna tale ga na bula nei Jisu. (Same 36:9; Vakatakila 4:11) E sega ni vakavulica na iVolatabu ni a susugi koya na Kalou me vaka ga e cakava e dua na tama ni susugi luvena.
Na iVolatabu tale ga e vakatokai ira na agilosi mera “luve ni Kalou dina.” (Jope 1:6) E kaya tale ga na iVolatabu me baleti Atama na imatai ni tamata, ni a “luve ni Kalou.” (Luke 3:38) Me vaka ni imatai ni ibulibuli ni Kalou o Jisu qai buli duadua e liu, e vakatokai koya kina na iVolatabu me ulumatua ni Luve ni Kalou.
A bula mai lomalagi o Jisu ni bera ni mai sucu e vuravura?
Io. A dua na kabula vakayalo mai lomalagi o Jisu ni bera ni mai bula vakatamata e vuravura. E kaya mada ga o Jisu: “O yau au lako mai cake.”—Joni 6:38; 8:23.
E buli Jisu na Kalou ni bera ni bulia na veika tale eso. Qori na vuna e vakatokai Jisu kina na iVolatabu ni:
“O koya. . . na ulumatua ni kabuli kece.”—Kolosa 1:15.
O koya “na imatai ni ibulibuli ni Kalou.”—Vakatakila 3:14.
E vakayacora o Jisu na parofisai me baleti koya e “vu mai liu sara o koya, mai na gauna makawa dina.”—Maika 5:2; Maciu 2:4-6.
Cava e cakava o Jisu ni bera ni lako mai vuravura?
Vakacolati ena itutu cecere mai lomalagi. E masuta o Jisu me baleta na itutu qori: “Tamaqu, ni vakalagilagi au . . . ena lagilagi a tu vei au niu se tiko e yasamuni ni bera o vuravura.”—Joni 17:5.
Vukei Tamana ena buli ni veika tale eso. O Jisu e cakacaka vata kei na Kalou me “imatau ligamaqosa.” (Vosa Vakaibalebale 8:30) E kaya kina na iVolatabu me baleti Jisu: “E vakaitavi o koya ena buli ni ka kece tale eso mai lomalagi kei vuravura.”—Kolosa 1:16.
Rau cakacaka vata na Kalou kei Jisu ena buli ni veika tale eso. E okati kina na agilosi, lomalagi kei na vuravura. (Vakatakila 5:11) Eso tale na ituvaki, na nodrau veitokoni e vaka ga nodrau cakacaka vata na dau caka peleni ni vale kei na matai. Ena droinitaka o dau caka peleni na kena irairai, sa na qai tara o matai na vale.
A vakatokai na Vosa. Ni se bera ni mai bula vakatamata o Jisu, e vakatokai koya na iVolatabu “na Vosa.” (Joni 1:1) Kena ibalebale na Kalou e vakayagataki Luvena me vakasavuya na itukutuku kei na ivakaro vei ira na kabula vakayalo.
E vakayagataki tale ga me Gusunivosa ni Kalou vei keda e vuravura. De dua a vakayagataki Jisu tale ga me Vosa ni solia na ivakaro vei Atama kei Ivi ena were o Iteni. (Vakatekivu 2:16, 17) Kena irairai ni o Jisu na agilosi a taqomaki ira na Isireli nira tu ena vanua liwa, e solia tale ga na ivakaro mera muria.—Lako Yani 23:20-23.a
a Na Vosa e sega wale ga ni agilosi e vosa kina na Kalou. Kena ivakaraitaki, e vakayagataki ira na agilosi sega ni nona Ulumatua ga me vakasavuya nona Lawa vei ira na Isireli ena gauna makawa.—Cakacaka 7:53; Kalatia 3:19; Iperiu 2:2, 3.