E toka volekati Pepeli na koro o Uri. O ira na lewe i Uri era dau sokaloutaka e levu na kalou, era sega ni sokaloutaki Jiova. Ia e tiko ena koro qo e dua na turaga, na yacana o Eparama. E dau sokalou duadua ga vei Jiova.

E kaya vei Eparama o Jiova: ‘Biuta nomu vanua kei ira na wekamu, mo lako ina vanua au na vakaraitaka vei iko.’ E qai yalataka na Kalou: ‘O na matanitu levu, au na cakava e levu na ka vinaka vei ira e vuravura ena vukumu.’

A sega ni kila o Eparama na vanua ena talai koya kina o Jiova. E nuitaka ga na Kalou. Ratou mani vakavakarau o Eparama, o Sera na watina, o Tira na tamana, kei Loti na luvei tuakana. Eratou talairawarawa me ratou toki. Ratou mani lako ena dua na ilakolako balavu.

Sa yabaki 75 toka o Eparama ni ratou yaco yani vakavuvale ena vanua e vinakata o Jiova me ratou lako kina. Na yaca ni vanua qo o Kenani. E qai vosa ni yalayala e kea na Kalou vei Eparama: ‘Au na solia na vanua qo vei ira na luvemu.’ Ia rau sa qase sara o Eparama kei Sera, rau sega tale ga ni vakaluveni. Na cava ena cakava o Jiova me vakayacora kina nona vosa ni yalayala?

Sa dede toka nodrau bula vakawati o Eparama kei Sera. Rau biuta mai na nodrau vale totoka e Uri, rau sa tiko ena valelaca. A sega ni bau vosavosa o Sera, ia e nuitaki Jiova ga.

E vinakata o Sera me dua na luvena, e mani kaya vei Eparama: ‘Ke vakaluveni o Eka na noqu dauveiqaravi, ena vaka ga e luvequ dina na gone qori.’ Yaco na gauna, sa qai dua na luvena tagane o Eka. Na yacana o Isimeli.

Ni sa yabaki 99 o Eparama qai yabaki 89 o Sera, e yaco yani e tolu na nodrau vulagi. E veisureti sara o Eparama me ratou vakacegu ena ruku ni vunikau, me ratou kana tale ga. O kilai ratou na vulagi qo? Eratou agilosi! Ratou kaya vei Eparama: ‘Ena gauna vata qo ena yabaki mai qo, ena dua na luvemudrau tagane.’ A vakarorogo tiko o Sera ena loma ni valelaca, e dredre lo qai kaya: ‘Meu vakaluveni vakacava niu sa qase sara?’

Ena yabaki tarava, e vakasucuma o Sera e dua na gonetagane me vaka ga e yalataka na agilosi i Jiova. E vakayacani koya o Eparama me o Aisake, kena ibalebale “Dredre.”

Ni sa yabaki lima toka o Aisake, e dau vakalialiai koya o Isimeli. Ni raica qori o Sera, a via taqomaki luvena. E mani kerei Eparama me vakatalai rau na veitinani, o Eka kei Isimeli. A sega ni via cakava qori o Eparama. Ia e kaya vua o Jiova: ‘Mo rogoci Sera. Au na karoni Isimeli. Ena yaco ga noqu vosa ni yalayala ena vuku i Aisake.’