A tiko e Kenani o Loti vei Eparama na tamana lailai. Toso na gauna sa levu na nodrau manumanu, sa lailai na vanua mera tiko kina. E kaya vei Loti o Eparama: ‘E sega ni rawa ni daru tiko vata ga ena dua na vanua. Yalovinaka, digia na vanua mo lako kina, au na lako ena yasana kadua.’ Sa dau veinanumi dina o Eparama, se vakaevei?

A digia o Loti na vanua bulabula volekata na koro o Sotoma, e vanua suasua, e levu tale ga kina na co drokadroka. Eratou mani toki kina vakavuvale.

E ca sara na nodra itovo na lewe i Sotoma, kei na koro voleka o Komora. A vakatulewataka o Jiova me vakarusa ruarua na koro qori. Ia e vinakata na Kalou me vakabulai Loti kei na nona vuvale, mani tala e rua na agilosi me tukuna vei ratou: ‘Dou biuta vakatotolo na koro. Sa vakarau vakarusa o Jiova.’

A sega ni biubiu sara o Loti, e vakaberabera tiko ga. Rau mani taura na agilosi na liga i Loti, na liga i watina, kei rau na luvedrau yalewa qai kauti ratou tani vakatotolo mai na koro, rau kaya: ‘Cici! Dro mo dou bula, kua ni raimuri, de dou mate!’

Ni ratou yaco ina koro o Soa, e vakavuna o Jiova me tau na sulifure kei na bukawaqa e Sotoma kei Komora. E vakarusai vakadua na koro ruarua ya. A sega ni vakarorogo vei Jiova o wati Loti ni raimuri, mani durumasima! Ia e bula o Loti kei rau na luvena yalewa ni ratou talairawarawa vei Jiova. De dua, eratou rarawa vakalevu ni talaidredre o tinadratou. Ia eratou marau ni ratou muria na ivakaro i Jiova.

A vakavulici Aisake o Eparama me lomani Jiova, me nuitaka tale ga na ka kece e yalataka. Ni sa yabaki 25 toka o Aisake, e kerea o Jiova me cakava o Eparama e dua na ka dredre. Na cava ya?

E kaya na Kalou: ‘Kerekere, kauta na luvemu duabau, mo cabora me isoro ena dua na ulunivanua e Moraia.’ E sega ni kila o Eparama na vuna e kerea kina qori o Jiova. Ia e talairawarawa ga.

Ena matakalailai tarava, eratou lako i Moraia o Eparama, Aisake kei na rua na dauveiqaravi. Oti e tolu na siga, eratou raica tu yani vakayawa na veiulunivanua. E kaya o Eparama vei rau na dauveiqaravi me rau wawa tiko, me lai vakacaboisoro mada kei Aisake. E solia na buka vei Aisake me cola, e taura o koya na isele. A tarogi tamana o Aisake: ‘I vei na manumanu me cabori?’ E kaya o Eparama: ‘Luvequ, ena vakarautaka o Jiova.’

Ni rau yaco ena ulunivanua, rau tara sara e dua na icabocabonisoro. E vesuka o Eparama na liga kei na yava i Aisake, qai vakadavori koya ena icabocabonisoro.

Ni taura cake o Eparama na isele, e rogo mai lomalagi na domo ni agilosi i Jiova, e kaya: ‘Eparama! Kua ni vakamavoataka na cauravou! Au sa qai kila qo ni o vakabauta na Kalou, ni o yalorawarawa ni cabori luvemu.’ E raica sara o Eparama e dua na tamanisipi ni tao tu na kena ileu ena veikau lalai. E totolo ga ni sereki Aisake qai cabora na tamanisipi.

Tekivu ena siga qori, e vakatokai Eparama o Jiova me nona itokani. O kila na vuna? Ni cakava na ka kece e vinakata o Jiova, ke sega mada ga ni kila na vuna.

E tukuna tale vei Eparama o Jiova na ka e yalataka: ‘Au na vakalougatataki iko, au na vakalevutaka nomu kawa se o ira na luvemu.’ Kena ibalebale, o Jiova ena vakalougatataki ira na tamata vinaka ena vuku i Eparama kei na nona vuvale.