Sa yabaki 40 o Aisake rau qai veiwatini kei Repeka. E lomani koya vakalevu. Toso na gauna, e sucu e rua na luvedrau tagane, rau drua.

E qase o Iso, e gone o Jekope. E taleitaka o Iso na cakacaka e tautuba, e kenadau ena vakasasa manumanu. Ia o Jekope e dau via tu ga e vale.

Dau kena ivakarau ena gauna ya, me soli e levu na qele kei na ilavo vua na ulumatua tagane ni sa mate o tamana. E dau kilai qori me ivotavota. Ratou okata tale ga na vuvale i Aisake na ka e yalataka o Jiova vei Eparama me ivotavota. A sega ni kauaitaka o Iso na vosa ni yalayala qori, ia e raica vakabibi o Jekope.

Dua na gauna a lai vakasasa o Iso ena siga taucoko. Ni lesu mai, dua na ka nona wawale. E boica sara na kakana e vakasaqara tiko o Jekope qai kaya: ‘Au sa viakana! Solia mada mai eso na sitiu damudamu qori!’ E kaya o Jekope: ‘Au na qai solia ga ke o yalataka mada vei au na nomu ivotavota.’ E kaya o Iso: ‘Na cava na kena yaga vei au, nomu yani. Au vinakata ga meu kana.’ Vakacava, e donu na ka e cakava o Iso? Sega, ni solia e dua na ka vakamareqeti me isosomi ni veleti sitiu.

Ni sa qase sara o Aisake, sa kena gauna qo me vosa vakalougatataka nona ulumatua. Ia o Repeka e vukei koya e gone, ya o Jekope, me nona na kalougata. Ni kila qori o Iso e cudru sara ga. E mani nakita me vakamatei tacina. Rau via taqomaki Jekope o Aisake kei Repeka, rau tukuna vua: ‘Lako vei nomu momo o Lepani, tiko e kea me oti mada na cudru nei Iso.’ A muria o Jekope na nodrau ivakasala na nona itubutubu, mani dro me bula.

E yalataka o Jiova vei Jekope ni na taqomaki koya me vaka ga nona taqomaki Eparama kei Aisake. A vakawati e Karana o Jekope qai vakaitikotiko kina, e levu nona vuvale kei na nona iyau.

E qai tukuna vua o Jiova: ‘Mo lesu i nomu vanua.’ E mani lesu o Jekope kei ratou na nona vuvale ena dua na ilakolako balavu. Ratou sota sara kei na le vica e gaunisala, ratou kaya vei Jekope: ‘Sa lako tiko mai o Iso na tuakamu kei na 400 tale na tagane!’ E rere o Jekope ni na mai mokuti koya kei ratou nona vuvale o Iso. A masu vei Jiova: ‘Au kerea moni vakabulai au, me kua ni vakaleqai au o tuakaqu.’ Ena siga tarava e vakauta o Jekope e levu na iloloma vei Iso, ya na sipi, me, bulumakau, kameli kei na asa.

Ni tiko taudua o Jekope ena bogi ya, a raica e dua na agilosi! A qai veimulomulo kei na agilosi qori me yacova na mataka. A mavoa o Jekope, ia e sega ni soro. E kaya na agilosi: ‘Biuti au meu lako.’ E kaya o Jekope: ‘Au na biuti iko ga ke o vakalougatataki au.’

A qai vakalougatataki koya na agilosi qori. E kila sara o Jekope ni na taqomaki koya o Jiova.

Ena mataka ya, ni rai tu yani vakayawa o Jekope, e raici Iso kei na 400 na tagane. A liu tiko o Jekope vei ratou na nona vuvale, qai cuva vakavitu e mata i tuakana. E cici yani o Iso qai mokoti koya. Rau tabaka na veitagicaki ni rau sa veiyaloni tale. Na cava na rai i Jiova ena ka e cakava o Jekope?

Oti rau veitalatala o Iso kei Jekope, rau dui gole ena nodrau vale. E 12 taucoko na luvena tagane o Jekope. Qo na yacadratou: o Rupeni, Simioni, Livai, Juta, Tani, Nafitalai, Kata, Aseri, Isakari, o Sepuloni, o Josefa, kei Penijamini. A qai vakayagataki Josefa o Jiova me vakabulai ira nona tamata. O kila se cakava vakacava? Meda raica mada.