iDusidusi ni iVola ni Soqoni ni Bula vaKarisito kei na Cakacaka Vakaitalatala
JULAI 7-13
IYAU MAI NA VOSA NI KALOU VOSA VAKAIBALEBALE 21
iVakavuvuli Vuku me Marau Kina na Vakawati
Sala ena Marau Kina na Vakawati
Vakaraitaka na yalomalumalumu. “Moni kua ni cakava e dua na ka ena veileti se yalo ni nanumi koya ga, ia moni yalomalumalumu ena nomuni okati ira na kena vo mera uasivi kemuni.” (Filipai 2:3) Ni rau dau nanumi rau ga na veiwatini, rau na veiba vakalevu se o cei e vakavuna na leqa. Ia rau sega ni saga me rau walia ena yalomalumalumu. Ni rau vakaraitaka na yalomalumalumu, rau na sega ni veibataka se o cei e donu.
JULAI 21-27
IYAU MAI NA VOSA NI KALOU VOSA VAKAIBALEBALE 23
iVakavuvuli Vuku me Baleta na Gunu
it-1 656
Mateni
E vakacala na iVolatabu. Ni dua e gunu me yacova ni mateni, e sega ni vakadonuya na iVolatabu. E vakamacalataka o koya e vola na Vosa Vakaibalebale na ka ena yacovi koya e gunu vakasivia. E kaya: “O cei e rarawa? O cei e nuiqawaqawa? O cei e veiba? O cei e vosavosa? O cei e mavoa wale? O cei e matamocemoce? O ira na gunu waini tiko vakabalavu, o ira na lai qara na waini veiwaki. Mo kua ni raica na waini damudamu ni tatibi ena bilo [na rairai vinaka ni waini, e tatibi] qai totoka na kena igunugunu [ni siro totolo ena itilotilo], ni oti oya e kati me vaka na gata, e solia na ka gaga me vaka na gata batigaga [rawa ni vakavu tauvimate, (kena ivakaraitaki, rawa ni vakacacana na yate se liva) e vakaleqa noda vakasama, (ena veilecayaki), rawa tale ga nida mate kina]. Ena raica na matamu na ka tani [e cakacaka na gunu ena noda mona, e vakamalumalumutaka; sa na laurai mai eso na ka e dau vunitaki tu; o sa na raica mai eso na ka; levu na ka o sa na talanoataka; sa na duatani nomu ivukivuki], na lomamu ena tukuna na ka ca [ena basika mai na ka e tu ena nomu vakasama kei na lomamu].”—Vvb 23:29-33; Ose 4:11; Mac 15:18, 19.
E kuria o koya e vola na vosa vakaibalebale na ka e vakila o koya e mateni: “O na vaka e dua e davo e loma ni wasawasa [e veilecayaki me vaka e dua e luvu tiko, oti ya ena sega ni vakilai koya tu], vaka e dua e davo tiko ena ulu ni ivana ni waqa [qo na vanua e vakilai kina vakalevu na yavavala ni waqa, e leqataki nona bula o koya e mateni ena vakacalaka, ena rawa ni mate na yagona (stroke), veivacu, kei na so tale]. O na kaya: ‘Era vacuki au ia au sega ni vakila. Era mokuti au ia au sega ni kila [e kaya qori o koya e mateni, vaka ga e vosavosaiyalona tiko; e sega ni kila na ka e cakava tiko, kei na rarawa e sotava kina]. Au na yadra ninaica? Meu gunu tale [kena irairai ni sa yadra mai na nona mateni, ia e bobula ena gunu, e vinakata me gunu tale].’ Ena dravudravua ni vakalusia e levu na ilavo ena gunu, ena sega ni nuitaki, ena dredre me dua nona cakacaka.—Vvb 23:20, 21, 34, 35.
JULAI 28–OKOSITA 3
IYAU MAI NA VOSA NI KALOU VOSA VAKAIBALEBALE 24
Mo Kaukaua Vakayalo Mo Vosota na Veika Dredre
it-2 610 ¶8
Vakacacani
Era vakanamata tale ga na lotu vaKarisito ena icovi ni nodra vosota. E tukuna kina o Jisu: “Era marau o ira era vakacacani ena vuku ni ka e dodonu, nira na wili mera lewe ni Matanitu vakalomalagi.” (Mac 5:10) E vakayaloqaqataki ira na lotu vaKarisito na nodra kila na inuinui ni veivakaturi kei na nodra kilai koya e vakarautaka. E vakaukauataki ira mera yalodina vua na Kalou ke ra vakarerei mera vakamatei vei ira na dauveitusaqati voravora. Nira vakabauta na ka e rawati ena mate i Jisu, era sega ni rerevaka kina na mate. (Ipe 2:14, 15) Me yalodina na lotu vaKarisito ni vakacacani, e bibi me donu nona rai. “Me tiko vei kemuni na ivakarau ni rai vata ga a tiko vei Karisito Jisu, . . . [e] talairawarawa me yacova sara na mate, io, me mate ena kaunirarawa.” (Flp 2:5-8) “Ena vuku ni marau e tu e [mata i Jisu], e vosota kina na kaunirarawa qai sega ni dua na ka vua me vakamaduataki.”—Ipe 12:2; raica tale ga 2Ko 12:10; 2Ce 1:4; 1Pi 2:21-23.
OKOSITA 4-10
IYAU MAI NA VOSA NI KALOU VOSA VAKAIBALEBALE 25
Vakekeli ena Vosa ni Kalou
it-2 399
Yalomalua
Ena yalomalua e dua ni levu nona vakabauta, e yaloqaqa tale ga. Ena sega ni rawai rawarawa, e yalomatua tiko ga. O koya e sega ni yalomalua, e sega ni nuidei, e cudrucudru, e lailai nona vakabauta, e sega nona inuinui, e lekaleka nona rai. Qo na ka e tukuna na vosa vakaibalebale me baleti koya e sega ni yalomalua: “E vaka na koro e botei ni sega na kena bai, na tamata e sega ni lewa vinaka na nona cudru.” (Vvb 25:28) Ena rawai rawarawa ena rai cala, ena lai cakava sara na ka ca.
OKOSITA 11-17
IYAU MAI NA VOSA NI KALOU VOSA VAKAIBALEBALE 26
Mo Yawaki Koya e “Lialia”
it-2 729 ¶6
Uca
Draki. E rua na mataqali draki ena Vanua Yalataki, na vulaikatakata kei na vulaibatabata, e kilai tale ga me draki mamaca kei na vulaiuca. (Vakatauvatana Sm 32:4; Sso 2:11, vmr.) E lailai sara na uca e dau tau ena maliwa ni Epereli ina maliwa ni Okotova. E tau vakavudua na uca ena vula qo ni gauna ni tatamusuki. E tukuni ena Vosa Vakaibalebale 26:1 ni sega ni kena ivakarau me tau na uca ena vula ni tatamusuki. (Vakatauvatana 1Sa 12:17-19.) Ena vulaiuca e sega ni dau tau vakalevu na uca; eso na gauna e draki vinaka. Ni batabata tale ga na draki ena gauna qori, ena batabata sara ni tau na uca. (Ese 10:9, 13) E vinakati gona me dua na vanua mera vakaruru kina.—Ais 4:6; 25:4; 32:2; Jop 24:8.
w87 1/10 19 ¶12
E Yaga na Veivakadodonutaki
12 Eso e sa ganita ga mera vakavulici vakaukaua, me vaka e tukuni ena Vosa Vakaibalebale 26:3: “E kena na ose na dali, e kena na asa na varaele, kei na kau e dakudra na yalowai.” Eso na gauna e vakalaiva o Jiova me sotava na leqa na matanitu o Isireli nira talaidredre: “Nira sa talaidredre ena vosa ni Kalou, era beca na nona ivakasala o koya e Cecere Duadua. E mani vakamalumutaka na lomadra ena veika dredre, era tarabe, qai sega ni dua me vukei ira. Era kaci vei Jiova mera vukei ena nodra rarawa, e vakabulai ira o koya mai na nodra leqa.” (Same 107:11-13) Ia eso na lialia se yalowai era yalokaukaua ga nira vukei vakavica vata: “O koya e domoqa ni vunauci wasoma ena musuki vakasauri qai sega ni vakabulai.”—Vosa Vakaibalebale 29:1.
it-2 191 ¶4
Lokiloki
Kena vosa vakaibalebale. E kaya na Tui vuku o Solomoni: “E vakataki koya e musuka na yavana me vakamavoataka [ena rawa ni lokiloki kina], o koya e tataunaka na ka vua na tamata yalowai.” Ni dua e vakacakacakataki koya e lialia se yalowai, ena vakaleqai koya ga. Ena raica ni sega ni cakava vinaka o koya qori nona cakacaka, ena rarawa ga kina.—Vvb 26:6.
Vakekeli ena Vosa ni Kalou
it-1 846
Yalowai
Nida vosa vua na yalowai “me vaka na nona sesewa,” qori nida muria na ka e tukuna eda na tini yalowai tale ga kina. Meda kua gona ni va qori, e vakasalataki keda na vosa vakaibalebale: “Mo kua ni vosa vua na yalowai me vaka na nona sesewa.” Ia e tukuna na Vosa Vakaibalebale 26:4, 5 nida vosa vua “me vaka na nona sesewa,” nida vakalewa na nona rai, eda vakaraitaka ni ka vakalialia, ena sega tale ga ni tini vinaka na nona vakatulewa. Qori ena yaga vakalevu vua.
OKOSITA 18-24
IYAU MAI NA VOSA NI KALOU VOSA VAKAIBALEBALE 27
Sala ena Yaga Kina na iTokani Dina
it-2 491 ¶3
Kainomu
E tukuni ena Vosa Vakaibalebale qo noda nuitaka e dua na itokani qai kerea nona veivuke ena gauna eda leqa kina. E kaya: “Mo kua ni biuta na nomu itokani se na itokani nei tamamu, mo kua ni curuma na vale nei tacimu ena siga o leqa kina, e vinaka na kainomu [sha·khenʹ] e tiko voleka mai na tacimu e tu yawa.” (Vvb 27:10) E tukuna tiko o koya e vola na vosa vakaibalebale qori, ni bibi me mareqeti na itokani voleka ena vuvale, me kerei tale ga nona veivuke ena gauna ni leqa ni vakatauvatani kei na dua na tacida dina se wekada voleka. Ke tiko vakayawa na wekada qori, ena sega ni rawa ni veivuke me vaka na nomu itokani dina.
OKOSITA 25-31
IYAU MAI NA VOSA NI KALOU VOSA VAKAIBALEBALE 28
Na Duidui ni Tamata ca kei Koya e Yalododonu
w93 15/5 26 ¶2
O na Muri Jiova Mai vu ni Lomamu?
“O IRA na yalododonu era yalodei me vaka na laione.” (Vosa Vakaibalebale 28:1) Era vakaraitaka nodra vakabauta, era nuitaka na Vosa ni Kalou, era yaloqaqa tale ga mera qaravi Jiova, ke leqataki mada ga nodra bula.
it-2 1139 ¶3
Kila
O ira na sega ni nuitaka na Kalou. O koya e caka ca, ena sega ni okata na Kalou ena nona vakatulewa se ni tuvanaka e dua na ka. (Jop 34:27) E vakacalai koya na lomana, e lai vakatulewa cala kina, e sega tale ga ni yalomatua. (Sm 36:1-4) Ke kaya mada ga ni qarava na Kalou, e sega ni nuitaka na Kalou, e nuitaka ga na rai ni tamata. (Ais 29:13, 14) E raica vakamamada nona ivalavala vakamadua, e “ka ni qito” (Vvb 10:23) qai cakava na ka ca, e voravora, e sesewa nona vakasama, e nanuma kina ni sega ni raica se kila na Kalou na ka ca e cakava tiko, e vaka ga ni sega vua na Kalou na kaukaua me kila na nona inaki. (Sm 94:4-10; Ais 29:15, 16; Jr 10:21) E vaka ga me kaya tiko: “E sega o Jiova” (Sm 14:1-3) qai guilecavi koya. Ni sega ni dusimaki koya na ivakavuvuli vakaivolatabu, e sega kina ni vakatulewa vakadodonu, e sega ni kila vinaka na ituvaki, me vakasamataka na veika e okati kina qai vakatulewa vakavinaka.—Vvb 28:5.
it-1 1211 ¶4
Yalodina
Ni dua e yalodina, ena sega ni rawata qori ena nona kaukaua vakatamata, ia e rawati ga ena nona vakabauti Jiova, nuitaki koya, kei na nona kaukaua me veivakabulai. (Sm 25:21) E yalataka na Kalou ni nodra “isasabai,” e nodra “idrodro” tale ga na yalodina tiko. (Vvb 2:6-8; 10:29; Sm 41:12) Nira kauaitaka tiko ga na veivakadonui i Jiova, era nuidei kina qai dodonu tiko ga na nodra sala. (Sm 26:1-3; Vvb 11:5; 28:18) Me vaka ga e vakadinadinataka o Jope, era na rawa ni rarawa o ira e sega nodra cala, era na mate tale ga kei ira na daucaka ca nira veiliutaki na tamata ca, ia e vakadeitaka o Jiova ni kila vinaka nodra yalodina o ira e sega nodra cala. E yalataka tale ga ni na vakalougatataki ira, era na vakila na vakacegu ena dua na gauna mai muri, era na taukena tale ga na veika vinaka. (Jop 9:20-22; Sm 37:18, 19, 37; 84:11; Vvb 28:10) Ia me vakataki Jope, na nona dokai kei na nona mareqeti e dua e sega ni vakatau ena levu ni nona iyau, ia e vakatau ga ena nona yalodina. (Vvb 19:1; 28:6) Era marau na gone e va qori nodra itubutubu (Vvb 20:7), era vuli vakalevu ena ivakaraitaki vinaka nei tamadra, e vinaka kina na kedra irogorogo, era dokai tale ga.