E dua vei rau na luvei Jekope gone o Josefa. Ratou raica na tuakana ni taleitaki koya vakalevu o tamadratou. Na cava e qai yaco? Eratou vuvutaki koya, ratou cati koya tale ga. E tadra eso na ka o Josefa qai talanoataka vei ratou na tuakana. Eratou nanuma kina ni ratou na cuva vua ena dua na siga. Eratou sa qai cati koya ga vakalevu!

Dua na siga eratou vakatawa sipi tiko na tuakai Josefa volekata na koro o Sikemi. E talai Josefa sara o Jekope me raica se ratou vakacava tiko. Ni ratou rai tu yani vakayawa, ratou raici koya ni lako tiko yani, ratou kaya: ‘Sa lako mai qo na dautadra ya. Tou vakamatea!’ Ratou dreti koya, ratou kolotaki koya ena dua na qara. Ia e kaya o Juta, e dua vei ratou na tuakana: ‘Tou kua ni vakamatei koya! Tou volitaki koya ga me bobula.’ Ratou mani volitaki Josefa ena 20 na tikinisiliva vei ira na dauveivoli ni Mitiani era lako tiko i Ijipita.

Oti eratou tonia na kote nei Josefa ena dra ni me, eratou kauta vei tamadratou, ratou taroga: ‘Qo na kote nei luvemu?’ E nanuma sara o Jekope ni vakamatei koya na manumanu kila. Dua na ka nona rarawa. Sega ni dua e vakacegui koya rawa.

A volitaki i Ijipita o Josefa me bobula nei Potifa, e dua na vakailesilesi dokai. Ia e tiko vata kei Josefa o Jiova. A raica o Potifa ni dau cakacaka, e nuitaki tale ga. E qai lesi koya me lewa na ka kece e taukena.

E raica o wati Potifa ni cauravou kaukaua o Josefa, e matavinaka tale ga. E dau marici koya e veisiga me rau moce vata. Na cava ena cakava o Josefa? A sega ni vakadonuya, e kaya ga: ‘Sega! Qo e cala. E nuitaki au o noqu turaga, o iko tale ga o watina. Keu moce vata kei iko, au sa na valavala ca vua na Kalou!’

Dua na siga e vakaukauataki koya o wati Potifa me rau moce vata. E dreta na nona isulu ia e dro o Josefa. Ni lesu mai vale o Potifa, e kaya o watina ni vesuki koya o Josefa, ia e sega ni dina qori. E cudru sara ga o Potifa qai biuti Josefa e valeniveivesu. Ia e sega ni guilecavi koya o Jiova.

Ni tiko e valeniveivesu o Josefa, e tadra o Fero na tui Ijipita eso na ka. E sega ni dua e vakamacalataka rawa. E tukuna sara vei Fero e dua na nona dauveiqaravi ni rawa ni vakamacalataka o Josefa na kena ibalebale. E tukuna sara me kau yani vua.

E tarogi Josefa o Fero: ‘O rawa ni vakamacalataka na noqu tadra?’ E sauma: ‘Ena levu na kakana e Ijipita me vitu na yabaki, ena tarava mai e vitu na yabaki ni dausiga. Digia mada e dua na turaga vuku me kumuna na kakana, mera kua ni viakana na nomu tamata.’ E kaya o Fero: ‘Au sa digitaki iko! O na taravi au e Ijipita!’ A kila vakacava o Josefa na ibalebale ni tadra? A vukei koya o Jiova.

Ena vitu na yabaki tarava, e kumuna o Josefa na kakana. A dausiga na vuravura taucoko, me vaka ga e tukuna. Era gole yani vua o ira mai na veivanua mera voli kakana. A rogoca o tamai Josefa ni tiko na kakana mai Ijipita, mani tala e tini na luvena tagane me ratou lai volivoli.

Ni ratou yaco yani na luvei Jekope, e kilai ratou mai o Josefa ia eratou sega ni kilai koya. Ratou cuva vua me vaka ga e tadra ni se gone. A via kila o Josefa ke ratou se cati koya tiko ga na tuakana. E mani kaya vei ratou: ‘O kemudou na yamata. Dou lako mai qo mo dou raica na yasana e kabai rawarawa ena vanua qo.’ Ratou kaya: ‘Sega! Keitou le 12 na veitacini mai Kenani. Sa mate e dua na taci keitou, o koya e gone duadua e tiko yani vei tamai keitou.’ E kaya sara o Josefa: ‘Dou lai kauta mai na tacimudou gone duadua, au na qai vakabauti kemudou.’ Ratou mani lesu vei tamadratou.

Ni sa oti na kedratou kakana na vuvale i Jekope, e talai ratou tale na luvena i Ijipita. Ena gauna qo, ratou sa kauti Penijamini na tacidratou gone duadua. A vakatovolei ratou na tacina o Josefa. E vunia nona bilo siliva ena taga kakana nei Penijamini qai beitaki ratou ni ratou butakoca. Nira kunea nona dauveiqaravi na bilo ena taga nei Penijamini, eratou taqaya na tacina. Ratou cikevi Josefa me ratou totogitaki, me kua o Penijamini.

E qai kila ni ratou sa veisau na tuakana. E sega tale ni vosoti koya rawa ni tabaka na tagi qai kaya: ‘O yau ga o Josefa na tacimudou. Se bula tiko o tamaqu?’ Eratou kurabui sara ga. E kaya vei ratou: ‘Dou kua ni rarawataka na ka dou cakava vei au. Na Kalou ga e talai au mai ke meu vakabulai kemudou. Dou vakatotolo, dou lai kauti tamaqu mai.’

Eratou lesu i vale me ratou tukuna vei tamadratou na itukutuku rogo vinaka, me ratou kauti koya tale ga i Ijipita. Rau sa qai sota tale na veitamani ni oti e vica vata na yabaki.