A vakaitikotiko e Usi e dua na turaga e qaravi Jiova. Na yacana o Jope. E turaga vutuniyau, e vakavuvale levu. E dau yalovinaka, e vukei ira na dravudravua, ira na yada kei ira na luveniyali. E dodonu na nona ivalavala, ia e kena ibalebale qori ni na sega ni sotava na veika dredre?

A sega ni kila o Jope ni vakaraici koya tiko o Setani na Tevoro. E kaya o Jiova vei Setani: ‘O sa raica na noqu dauveiqaravi o Jope? E sega ni dua e vakataki koya e vuravura taucoko. E talairawarawa qai dau caka dodonu.’ E sauma o Setani: ‘Sa rauta me talairawarawa, ni o taqomaki koya qai vakalougatataki koya tiko. O solia vua na vanua kei na manumanu. Kauta tani na ka kece qori ena qai sega ni qaravi iko.’ E kaya o Jiova: ‘O rawa ni vakatovolei Jope. Mo kua ga ni vakamatei koya.’ Na cava e vakatara kina o Jiova me vakatovolei Jope o Setani? E nuidei ni na yalodina tiko ga.

E vakavuna sara o Setani eso na leqa me vakatovolei Jope kina. E talai ira na kai Sipa mera butakoca nona bulumakau kei na nona asa. Oti e kama kece ena bukawaqa nona sipi. Era butakoca tale ga nona kameli e dua na ilala mai Kalitia, era qai vakamatei kece na vakatawa manumanu tiko. Oti sa qai sotava o Jope na ka vakaloloma duadua. Ratou mate kece na luvena ni bale na vale eratou a kana tiko kina. E rarawa dina o Jope, ia e qaravi Jiova tiko ga.

A vinakata o Setani me vakararawataki Jope vakalevu. E qai vakavuna me tauvi bo kece na yagona, dua na ka na kena mosi. A sega ni kila na vuna e yaco kina qori, ia e qaravi Jiova tiko ga. A raica tu o Jiova na ka e yaco, dua na ka nona marau ni yalodina tiko ga o Jope.

Sa qai tala o Setani e tolu na turaga me ratou vakatovolei Jope. Eratou kaya: ‘O rairai cakava e dua na ka ca, o qai vunitaka tiko. E totogitaki iko na Kalou.’ E kaya o Jope: ‘Au sega ni bau cakava e dua na ka ca.’ E nanuma ni vakavuna kece o Jiova na nona leqa, e kaya tale ga ni sega ni dodonu.

A vakarogoca tiko na veivosaki e dua na cauravou, na yacana o Ilaiu. E qai kaya: ‘E cala na ka kece dou tukuna. Tou se sega ga ni kilai Jiova vinaka. Ena sega vakadua ni caka ca. E raica tu na ka kece, e dau vukei ira tale ga na sotava na veika dredre.’

E qai vosa o Jiova vei Jope. E kaya: ‘O tu e vei niu bulia na lomalagi kei na vuravura? Cava o kaya kina niu sega ni dodonu? O vosa tu ia o sega ni kila na vuna e dau yaco kina na ka.’ E vakadinadinataka o Jope ni cala qai kaya: ‘Au sa cala. Au dau rogoca na ka e baleti kemuni, ia qo au sa qai kilai kemuni vinaka. E sega ni dredre vei kemuni e dua na ka. Vosoti au ena ka au tukuna.’

Ni oti na veivakatovolei, e qai vakavuna o Jiova me bulabula tale na yago i Jope, me levu sara na ka e taukena ni vakatauvatani e liu. E marau qai bula balavu. A vakalougatataki ni talairawarawa ena gauna dredre mada ga. Vakacava, o na qaravi Jiova tiko ga me vakataki Jope se mani cava e yaco?

E kilai e Ijipita na vuvale i Jekope mera Isireli. Ni rau sa mate o Jekope kei Josefa, e veiliutaki e dua na Fero vou. E leqataka nira na kaukaua na Isireli vei ira na kai Ijipita. A mani vakabobulataki ira mera buli biriki, mera cakacaka tale ga vakaukaua ena iteitei. Dua na ka na nodra vakalolomataki na Isireli, ia e tubu tiko ga na kedra iwiliwili. A sega ni taleitaka qori o Fero, mani vakarota mera vakamatei kece na gonetagane ni Isireli era se qai sucu. O raitayaloyalotaka na nodra rere na Isireli?

E dua na marama ni Isireli o Jokapeti, e sucu e dua na luvena tagane rairai vinaka. A via taqomaki luvena, mani biuti koya ena dua na basikete qai vunitaka ena loma ni kuta ena Uciwai na Naile. Na ganena na gone qo o Miriama. A toka voleka ga me raica na ka ena yaco.

A mai sili ena uciwai na luvei Fero goneyalewa, e raica sara na basikete. E tagi toka e loma e dua na gone, dua na ka nona lomana. E taroga o Miriama: ‘Meu lai raica mai e dua na yalewa me susuga?’ A vakadonuya na luvei Fero, mani kacivi Jokapeti o Miriama na tinana na gone. E kaya vua o luvei Fero: ‘Kauta na gone qo lai susuga vei au, au na qai saumi iko.’

Ni sa levu na gone, e kauti koya tale o Jokapeti vei luvei Fero. A vakayacani koya me o Mosese, e susugi koya me vaka ga e luvena dina. E tubu cake o Mosese me dua na ravouvou, a rawa ni nona na ka ga e vinakata. Ia e sega ni guilecavi Jiova. E kila ni dua na Isireli, e sega ni kai Ijipita. A qai digia me qaravi Jiova.

Ni sa yabaki 40 o Mosese, e vakatulewataka me vukei ira na wekana. A raica e dua na kai Ijipita ni mokuta tiko e dua na Jiu bobula. E qai mokuti koya vakaukaua o Mosese mani mate. A buluta na yagona ena nuku. Ni kila qori o Fero, e vinakata sara ga me vakamatei Mosese. E mani dro i Mitiani. E taqomaki koya o Jiova ena vanua qori.