A tiko mai Mitiani o Mosese me 40 na yabaki. E vakawati qai vakaluveni e kea. Dua na siga ni vakatawa sipi tiko volekata na Ulu i Saineai, e raica e dua na ka vakatubuqoroqoro. E kama tiko na vunikau, ia e sega ni kamayavu! Ni toso yani me raica, e rogoca sara e dua na domo mai na loma ni vunikau, e kaya: ‘Mosese! Kua ni toso voleka mai. Luvata nomu ivava, ni o butuka tu na qele tabu.’ A vosa mai o Jiova ni vakayagataka e dua na agilosi.

Dua na ka na rere nei Mosese, mani vunia na matana. E kaya na domo: ‘Au sa raica na nodra vakaloloma na Isireli. Au na vakabulai ira mai Ijipita, au na qai kauti ira ina dua na vanua vinaka. O iko sara ga o na kauti ira tani mai Ijipita.’ Ena kurabui mada ga o Mosese, se vakacava?

A taroga o Mosese: ‘Na cava meu tukuna ke ra taroga o cei e talai au mai?’ E kaya na Kalou: ‘Tukuna vei ira ni talai iko yani o Jiova, na Kalou i Eparama, na Kalou i Aisake, kei na Kalou i Jekope.’ E qai kaya o Mosese: ‘Vakacava ke ra sega ni vakarorogo vei au?’ A vakadinadinataka vei Mosese o Jiova ni na vukei koya. E kaya vua me kolotaka nona ititoko ina qele qai vuki me gata! Ni taura o Mosese na buina, e vuki tale me ititoko. E kaya o Jiova: ‘Ni o cakava qo, era na vakadinadinataka niu talai iko yani.’

E kaya o Mosese: ‘Au sega ni kenadau ena vosa.’ E yalataka vua o Jiova: ‘Au na tukuna vei iko na ka mo kaya, au na talai Eroni tale ga me vukei iko.’ Ni kila o Mosese ni tokoni koya o Jiova, e kauta na watina kei rau na luvena tagane me ratou lesu i Ijipita.

Era vakabobulataki na Isireli mera cakacaka vakaukaua. A talai Mosese kei Eroni o Jiova me rau tukuna vei Fero: ‘Laivi ira na noqu tamata mera lai sokalou vei au ena vanua talasiga.’ E kaya ena dokadoka o Fero: ‘Au sega ni via kila na ka e kaya o Jiova, au na sega ni laivi ira na Isireli mera lako.’ Sa qai vakacakacakataki ira ga vakaukaua o Fero. Ia ena vakavulici koya o Jiova. O kila se cakava vakacava? E tauca e Tini na Kuita e Ijipita. E kaya o Jiova vei Mosese: ‘E sega ni vakarorogo vei au o Fero. Ena tiko o koya ena Uciwai na Naile ena mataka. Lai tukuna vua ke sega ni sereki ira na noqu tamata, ena vuki na wai ena Naile me dra.’ A talairawarawa o Mosese qai lako. E mokuta o Eroni na Naile ena nona ititoko ni rai tu o Fero, mani vuki na wai me dra. E bona na uciwai, e mate na ika, e sega na wai savasava me gunuvi ena Naile. Ia e sega ga ni sereki ira na Isireli o Fero.

Oti e vitu na siga, e talai Mosese tale o Jiova vei Fero, e kaya: ‘Ke o sega ni sereki ira na noqu tamata, ena roboti Ijipita na boto.’ A dodoka o Eroni na nona ititoko qai robota na vanua na boto. Era raica na kai Ijipita na boto ena nodra vale, nodra loga, kei na nodra veleti. Sa robota kece ga na veivanua! E tukuna o Fero vei Mosese me masuti Jiova me tarova na kuita qo. A yalataka ni na sereki ira na Isireli. E qai tarova o Jiova na kuita. Era kumukumuna na kai Ijipita na boto mate, e bona na vanua. Ia e sega ga ni sereki ira na Isireli o Fero.

E kaya sara o Jiova vei Mosese: ‘Me mokuta na qele o Eroni ena nona ititoko, ena qai vuki na kuvuniqele me nana, se lago lalai dau veikati.’ Sega ni bera ni sa robota na vanua na nana. Era kaya vei Fero eso na nona tamata: ‘Na kuita qo e vakavuna na Kalou.’ Ia e sega ni via sereki ira na Isireli o Fero.