Erau lai tukuna sara vei Fero o Mosese kei Eroni na ka e vinakata na Kalou: ‘Ke o sega ni sereki ira na noqu tamata, au na tala yani na lago dau gunu dra ena vanua.’ E qai curuma kece na nodra vale na kai Ijipita na qelenilago dau gunu dra, o ira na vutuniyau kei na dravudravua. E robota na vanua taucoko. Ia e sega na lago ena vanua o Koseni, na vanua era tiko kina na Isireli. Ni tekivu na ikava ni kuita, era vakaleqai ga na kai Ijipita. A vakamamasu o Fero: ‘Yalovinaka, kerei Jiova me kauta tani na lago. Sa rawa moni lako.’ Ia ni kauta tani ga o Jiova na lago, e veisau tale na lomana. Vakacava e bau vuli kina o Fero?

E kaya o Jiova: ‘Ke sega ni sereki ira na noqu tamata o Fero, ena tauvimate qai mate na nodra manumanu na kai Ijipita.’ Ena siga e tarava, sa tekivu mate na manumanu. Ia e sega ni mate na nodra manumanu na Isireli. E yalodredre tiko ga o Fero, e sega ni vakarorogo.

E qai kaya vei Mosese o Jiova me lesu vei Fero, me kaburaka i macawa na dravusa. E vuki na dravusa me pauta qai tauvi ira kece na kai Ijipita. E tutubu kina na bo e yagodra kei na nodra manumanu. Ia e bese tiko ga ni sereki ira na Isireli o Fero.

E talai Mosese tale o Jiova me kaya vei Fero: ‘O sega tiko ga ni via sereki ira na noqu tamata? Nimataka ena tau na ucaqereqere.’ Ena siga tarava e vakavuna o Jiova na ucaqereqere, kurukuru, kei na bukawaqa. Se qai vakadua me yaco qo e Ijipita. A vakacacani na kau kei na iteitei, ia e sega ni yaco qori e Koseni. E kaya o Fero: ‘Kerei Jiova mada me tarova na ka qo! Au na qai sereki kemuni.’ Ia ni mudu ga na ucaqereqere kei na uca, e veisau tale na loma i Fero.

E qai kaya o Mosese: ‘Ena kanilaka na vodre na kau e sega ni vakacacana na ucaqereqere.’ Era qai kanilaka na qelenivodre na kau kei na ka kece e vo tu. A vakamamasu o Fero: ‘Kerei Jiova mada me kauta tani na vodre.’ Ia ni tarova o Jiova, e yalodredre tiko ga o Fero.

E kaya vei Mosese o Jiova: ‘Dodoka na ligamu i lomalagi.’ Sega ni bera ni sa butobuto vakadua na lomalagi. E tolu na siga era sega ni raica rawa e dua na ka na kai Ijipita. Ia e rarama tu ga na nodra vale na Isireli.

E kaya vei Mosese o Fero: ‘Sa rawa moni lako. Biuta tu mai na nomuni manumanu.’ E kaya o Mosese: ‘Keimami na kauta na neimami manumanu, me keimami cabora vua na neimami Kalou.’ E cudru vakalevu o Fero. E kailavaka: ‘Lako tani! Keu raici iko tale, au na vakamatei iko.’

A yalataka vei Fero o Mosese ni na sega ni raici koya tale. Ia ni bera ni lako, e kaya vei Fero: ‘Ena bogilevu tutu, era na mate kece na ulumatua tagane ni Ijipita, tekivu ena nomu vuvale me yaco sara vei ira na bobula.’

E tukuna o Jiova vei ira na Isireli mera vakarautaka e dua na kakana. E kaya: ‘Vakamatea e dua na sipi, se me tagane yabaki dua qai boroya eso na kena dra ena nomuni katuba. Moni tavuna na lewena qai kania vata kei na madrai sega ni vakaleveni. Ni vakaisulu rawa, ni vakaivava, moni vakarau. Au na sereki kemuni ena bogi nikua.’ O raitayaloyalotaka na nodra marau na Isireli?

Ena bogilevu tutu, e lako na agilosi i Jiova ena vale kece e Ijipita. Na katuba e sega ni boro ena dra, e mate na kena ulumatua. Ia e lakosivita na agilosi na vale e boro ena dra. Ena vuvale kece ni Ijipita, era vutuniyau se dravudravua, e mate kina e dua na gone. Ia e sega ni mate e dua na luvedra na Isireli.

E mate mada ga na luvena tagane o Fero. Sa sega tale ni vosota rawa, e mani kaya vei Mosese kei Eroni: ‘Tucake. Ni lako tani eke. Ni lai sokalou vua na nomuni Kalou. Kauta na nomuni manumanu, ni lako!’

Era biuti Ijipita na Isireli ni cila vinaka tu na vula, era wasei vakavuvale kei na yavusa. Era le ononadrau na udolu na tagane, e levu tale ga na yalewa kei na gone. Levu tale era veitomani mera lai sokalou tale ga vei Jiova. Era sa qai galala na Isireli!

Era dau vakarautaka e veiyabaki na kakana era kania ena bogi qori, mera nanuma kina na veivakabulai i Jiova. E vakatokai me Lakosivia.