E kaya vei Mosese o Jiova: ‘Lako mai ina ulunivanua. Au na vola noqu lawa ena vatu raraba meu solia vei iko.’ E cabe o Mosese, e tiko e kea me 40 na siga 40 na bogi. E qai vola o Jiova ena gauna qori na iVunau e Tini ena rua na vatu raraba, e solia sara vei Mosese.

Era nanuma na Isireli ni sa biuti ira o Mosese. Era kaya vei Eroni: ‘Keimami vinakata me dua e liutaki keimami. Mo cakava e dua na neimami kalou!’ E kaya o Eroni: ‘Ni solia mai na nomuni koula.’ E vakawaicalataka qai bulia e dua na ivakatakarakara ni luvenibulumakau. Era kaya na Isireli: ‘Qo na noda Kalou e kauti keda tani mai Ijipita!’ Era sokalou sara ina luvenibulumakau koula, ra qai marau. Vakacava e donu na ka era cakava? Sega. Era yalataka mera qaravi Jiova duadua ga, ia qo era sega ni dina ena nodra yalayala.

E raica tu o Jiova na ka e yaco, e kaya sara vei Mosese: ‘Lako sobu vei ira na Isireli. Era sa talaidredre vei au, era qarava tale ga na kalou lasu.’ E siro mai na ulunivanua o Mosese ni toka e ligana e rua na vatu raraba.

Ni volekata yani na keba, e rogoca sara nodra lagasere. E raica tale ga nira meke ra qai cuva tiko ina luvenibulumakau. Dua na ka nona cudru. E viritaka i ra na vatu raraba qai kakavorovoro. E vakarusa na ivakatakarakara qai tarogi Eroni: ‘Cava o rogoci ira kina qo mo cakava na ka ca?’ E tukuna o Eroni: ‘Kua ni cudru. O sa kilai ira vinaka qo. Era vinakata e dua na kalou, au mani viritaka nodra koula ina bukawaqa qai basika mai na luvenibulumakau qo!’ E cala na ka e cakava o Eroni. E lesu o Mosese ina ulunivanua qai vakamasuti Jiova me vosoti ira.

O Jiova e vosoti ira na yalorawarawa ni muria nona vosa. Vakacava, o raica na bibi ni nodra talairawarawa na Isireli ina veiliutaki i Mosese?

Ni tiko e Ulu i Saineai o Mosese, e kaya vua o Jiova me tara na valeniveitavaki. Qo e dua na mataqali valelaca mera sokaloutaki Jiova kina na Isireli. Nira veitokiyaki, ena rawarawa nodra kauta.

E kaya o Jiova: ‘Tukuna vei ira na tamata mera cautaka na ka e rawa nira solia me tara kina na valeniveitavaki.’ Era solia na Isireli na koula, siliva, kopa, na vatutalei kei na iukuuku. Era solia tale ga na vutinisipi, na lineni, na kulinimanumanu, kei na levu tale na ka. Na levu ni nodra lomasoli, e tukuna kina vei ira o Mosese: ‘Sa rauta! Ni kua ni kauta tale mai e dua na ka.’

Era veivuke ena tara ni valeniveitavaki e levu na tagane kei na yalewa era kenadau. E vakavukui ira o Jiova ena cakacaka. So era cakava na wa, talitali se culacula. So tale era vakadabe vatu, ceuceu ena kau se cakacaka ena koula.

Era muria sara ga na itaratara ni valeniveitavaki e tukuna o Jiova. Era cakava e dua na kena ilatilati totoka me wase rua kina, dua me Loqi Tabu, dua tale me Loqi Tabu Sara. E tiko ena Loqi Tabu Sara na kato ni veiyalayalati. E caka mai na kau na akasia kei na koula. E tiko ena Loqi Tabu e dua na itutu ni cina koula, dua na teveli kei na icabocabo e dau vakamai kina na ka boivinaka. E toka ena kena rara e dua na beseni kopa kei na dua na icabocabonisoro levu. Na kato ni veiyalayalati e vukei ira na Isireli mera nanuma tiko nodra yalayala vei Jiova, mera talairawarawa vua. O kila se cava na veiyalayalati? Qo e dua na mataqali yalayala.

O Jiova e digitaki Eroni kei ratou na luvena tagane me ratou veiqaravi vakabete ena valeniveitavaki. Eratou na maroroya vinaka qai vakacaboisoro kina vei Jiova. Na bete levu duadua ga o Eroni, e vakatarai me curu ena Loqi Tabu Sara. Ena cakava vakadua e veiyabaki me cabora kina na isoro ni nona ivalavala ca, nona vuvale, kei na matanitu taucoko o Isireli.

Era tara vakaoti na Isireli na valeniveitavaki ni oti e dua na yabaki nodra biuti Ijipita. Qori na vanua mera sokaloutaki Jiova kina.

E vakasinaita o Jiova na valeniveitavaki ena nona lagilagi, e basika tale ga e delana na o. Ke toka ga vakadua na o, era na sega ni toki na Isireli. Ia ke tubu cake, era na kila sara ni sa kena gauna mera toki. Era na luvata na valeniveitavaki, qai muria na o.