iDusidusi ni iVola ni Soqoni ni Bula vaKarisito kei na Cakacaka Vakaitalatala
© 2025 Watch Tower Bible and Tract Society of Pennsylvania
SEVITEBA 1-7
Vakekeli ena Vosa ni Kalou
it “Cavilaka” ¶1
Cavilaka
Qo nomu vakacaucautaka vakasivia e dua se vakacerecerea, nomu yameyame, marimari, lasu. E dau caka qori me vakalomavinakataki kina o koya e cavilaki, ia ena rawa ni vakaleqai koya tale. E kena inaki me rawa kina na lomana se me soli vua eso na ka, e vesumonataki o koya e cavilaki ni dodonu me solia e dua na ka vei koya e veicavilaki se vakacerecerei koya. Vakalevu ga me coriti kina o koya e cavilaki. (Vvb 29:5) Ni dua e veicavilaki e sega ni tiko vua na vuku mai cake, ia na vuku ga vakavuravura, e laurai kina na kocokoco, na veivakaduiduitaki, kei na veivakaisini. (Jem 3:17) Na itovo kece qori, na yameyame, marimari, lasu, se veivakacerecerei mo rawaka kina, e cata na Kalou.—2Ko 1:12; Kal 1:10; Efe 4:25; Kol 3:9; Vta 21:8.
SEVITEBA 8-14
IYAU MAI NA VOSA NI KALOU VOSA VAKAIBALEBALE 30
w87 15/5 30 ¶8
O na Marau ni o Rerevaki Jiova
◆ 30:15, 16—Na cava e vakabibitaki ena vica na ivakaraitaki qo?
Eratou vakaraitaka na nona sega ni lomavakacegu rawa o koya e kocokoco. Me vaka ga nodra kocova na liji na dra nira domica, e va tale ga qori o ira na kocokoco nira vinakata vakalevu na ilavo se na itutu. O Seoli tale ga e sega ni lomavakacegu rawa ni dola tu ga vei ira na mate. E vinakata tale ga na katonigone e sega ni vakasucu me vakaluveni. (Vakatekivu 30:1) Na vanua dravuisiga ena domica na wai ni uca, oti ga ena mamaca tale. Na yameyame ni bukawaqa tale ga ena yameca na ka kece e viritaki yani. Era va sara ga qori o ira na daukocokoco. Ia o ira e dusimaki ira na vuku vakalou era na sega vakadua ni rawai ena kocokoco va qori.
SEVITEBA 15-21
Vakekeli ena Vosa ni Kalou
w92 1/11 11 ¶7-8
Veivakavulici ena Gauna Vakaivolatabu
7 E Isireli makawa, era dau veituberi na itubutubu ena gauna era se gone sara kina na luvedra. (Vakarua 11:18, 19; Vosa Vakaibalebale 1:8; 31:26) E vola na daunivakadidike ni iVolatabu o E. Mangenot ena Dictionnaire de la Bible: “Sa tekivu vulica na Lawa o gone ni se qai kilavosa. Ena cavuta toka vakavica o tinana e dua na Lawa; ena gauna sa kila kina o gone, sa na qai dewa ina dua tale na Lawa o tinana. E muri, sa na qai soli vei gone na ivola e volai kina na Lawa sa rawa ni cavuqaqataka. Qori na sala era vulica kina na wilivola, nira qase mai sa rawa nira tomana na nodra vuli ka vakalotu nira wilika ra qai vakasamataka na lawa ni Turaga.”
8 Qo e vakaraitaka na iwalewale rawarawa ni nodra vuli, ya mera vulica ga vakataki ira. Na ka era vulica me baleta na lawa i Jiova kei na ka e cakava vei ira nona tamata me uqeta na lomadra. (Vakarua 6:6, 7) E vinakati me vakasamataki vakatitobu. (Same 77:11, 12) E dau muri e vica na iwalewale me kasa kina vei ira na qase kei ira na gone na ka e vulici. E okati eke na kena vakayagataki na matanivola (alphabetic acrostics) na: a, ba, ca, me tekivu kina na qaqa ni dua na serekali (me vaka ena Vosa Vakaibalebale 31:10-31), na vulici ni vosa e tautauvata na kena ivolavolai se rorogo, na kena vakayagataki tale ga na naba, me vaka ena ikarua ni iwasewase ni Vosa Vakaibalebale wase 30. Kena ivakaraitaki, era vakabauta eso na dauvakadidike nira dau cavuqaqataka na gonevuli na iVolanivula ni Keseri, e nanumi ni dua vei ira na ivola makawa duadua vakaIperiu e tiko ena valeniyaya maroroi na Archaeological Museum mai Istanbul.
SEVITEBA 22-28
Vakekeli ena Vosa ni Kalou
it “Dauvunau” ¶1
Dauvunau
Na yaca vakaIperiu Qo·heʹleth (kena ibalebale “O koya e vakasoqoni ira na tamata”), e vakamacalataka vinaka na nodra itavi na tui ena matanitu e liutaki vakalou o Isireli. (Dvu 1:1, 12) E nona itavi o koya e veiliutaki me vakaduavatataki ira na tamata ni Kalou mera yalodina vua na nodra Tui kei na nodra Kalou. (1Tu 8:1-5, 41-43, 66) Kena ibalebale ena qai kilai e dua na tui ni vinaka se ca ke ra qaravi Jiova o ira na lewena, se sega. (2Tu 16:1-4; 18:1-6) Kena ivakaraitaki o Solomoni, e dau vakasoqoni ira na Isireli kei ira na vulagi ena valenisoro. Ena ivola na Dauvunau, e vinakata me vakasoqoni ira na tamata ni Kalou mera kua ni ogataka na ka matewale ni vuravura qo, ia mera ogataka ga na ka cakacaka ni nodra Kalou e yalayala kina na matanitu era lewena. Na yaca e vakayagataki ena iVolatabu vakavalagi e kau mai na vakadewa ni Qo·heʹleth ena Greek Septuagint, e kilai me Ek·kle·si·a·stesʹ (Ecclesiastes), kena ibalebale “dua na lewe ni ekelesia (ivavakoso; ilawalawa levu).”
SEVITEBA 29–OKOTOVA 5
Vakekeli ena Vosa ni Kalou
it “Loloma” ¶39
Loloma
“Na Gauna ni Veilomani.” O Jiova ena sega ni lomani ira e kila ni sega ni ganiti ira, se o ira na muria tiko ga na sala ca. E vakaraitaki na loloma vei ira na tamata kece, me yacova nira vakaraitaka nira cata na Kalou. Qori na gauna era na sega ni lomani kina. Na Kalou o Jiova kei Jisu Karisito, rau vinakata na ivalavala dodonu, rau cata na ka ca. (Sm 45:7; Ipe 1:9) Mera kua ni lomani o ira na cata matua na Kalou dina. Io, ena sega ni dua na ka vinaka e rawati nida lomani ira tiko ga na tamata va qori, ni o ira era cata na Kalou era sega ni kauaitaka na nona loloma. (Sm 139:21, 22; Ais 26:10) Koya gona e tiko na vuna e cati ira kina na Kalou, e tiko tale ga na gauna me vakarusai ira kina.—Sm 21:8, 9; Dvu 3:1, 8.
OKOTOVA 13-19
IYAU MAI NA VOSA NI KALOU DAUVUNAU 7-8
“Lako ina Vale ni Lolosi”
it “Lolosi” ¶9
Lolosi
Na Gauna ni Lolosi. E tukuni ena Dauvunau 3:1, 4 ni tiko “na gauna ni tagi kei na gauna ni dredre, na gauna ni tagilagalaga kei na gauna ni meke.” Nida kila tiko nida na mate kece, na lomadra na vuku e via lako “ina vale ni lolosi,” sega ni vale ni kanavata. (Dvu 7:2, 4; vakatauvatana Vvb 14:13.) Koya gona, na tamata vuku ena vakayagataka na gauna qori me veivakacegui kina, ena sega ni vaqara marau. Nona cakava qori ena kila tiko kina ni vakaiyalayala ga na nona bula, ena qarauna tale ga na lomana me vakamarautaka na Dauveibuli.
OKOTOVA 20-26
Vakekeli ena Vosa ni Kalou
it “Kakase, Vakaucaca” ¶4, 8
Kakase, Vakaucaca
Na kakase ena rawa ni tini ena vakaucaca, ena leqa ga kina o koya e dauvakaucaca. E dina kina na ka e tukuni ena Dauvunau 10:12-14: “Na vosa ni gusuna na vuku e taleitaki, ia na tebenigusuna na lialia e vakaleqai koya ga. Na itekitekivu ni vosa ni gusuna e sesewa, ia na itinitini ni nona vosa e veivakaleqai vakaca. Ia na lialia e vosa tu ga.”
Eso na gauna e rawa ni vakavuleqa na kakase (rawa ni tini gona ena vakaucaca), ia na vakaucaca ena vakamosi yalo se vakatubu veiba. Eso na gauna e sega ni nakiti, eso tale na gauna e nakiti. Ia ke vinaka se ca na kena inaki, na Kalou e sega ni taleitaki koya e dauvakaucaca, ni “vakavuveiba vei ira na wekana,” qori e dua na ka e cata na Kalou. (Vvb 6:16-19) Na vosa vaKirisi ni “vakaucaca” se ‘dau veibeitaki’ na di·aʹbo·los. E vakayagataki tale ga na vosa qori ena iVolatabu me kena icavuti o Setani “na Tevoro,” o koya e dau vakaucacataka na Kalou. (Jn 8:44; Vta 12:9, 10; Vte 3:2-5) Kena ibalebale o koya sara ga e vakavuna na vakaucaca.
OKOTOVA 27–NOVEBA 2
Vakekeli ena Vosa ni Kalou
it “Veiuqeti ni Yalo Tabu” ¶10
Veiuqeti ni Yalo Tabu
E vakadinadinataki nira sega nira porokaramutaki na tagane e lesia na Kalou mera vola na nona Vosa. Eda wilika me baleta na yapositolo o Joni ni ‘ceguva na Kalou’ na Vakatakila e solia vua na agilosi ena “ivakatakilakila,” oti qori sa qai “tukuna [o Joni] na vosa ni Kalou kei na itukutuku i Jisu Karisito, io, ena ka kece e raica.” (Vta 1:1, 2) Ena “veiuqeti ni yalo tabu” e mai “tiko kina [o Joni] ena siga ni Turaga” e qai tukuni vua: “Vola ena ivolavivigi na ka o raica.” (Vta 1:10, 11) Kena irairai gona ni vinakata na Kalou mera vakayagataka na dauvola iVolatabu na nodra vakasama mera digia na vosa kei na matavosa e vakamacalataka na ka era raivotutaka (Apa 2:2), ia ena gauna vata qori e dusimaki ira tiko na Kalou me donu na ka era vola, me dina, me salavata tale ga kei na nona inaki. (Vvb 30:5, 6) E laurai ena Dauvunau 12:9, 10 na nodra sasaga na dauvola iVolatabu nira vakasamataka vakatitobu, vaqaqara, ra qai tuvana vinaka me rawa ni ‘rogo vinaka, me donu, me dina’ tale ga.—Vakatauvatana Lu 1:1-4.