Ni rau yaco i Jeriko na yamata ni Isireli, rau lai tiko ena vale ni dua na yalewa o Reapi. Ni rogoca o Tui Jeriko, e tala sara eso na sotia. E mani vunitaki rau na yamata ena delanivale o Reapi qai dusimaki ratou na sotia ena dua tale na vanua. E tukuna vei rau na yamata: ‘Au na vukei kemudrau niu kila ni tokoni kemuni o Jiova, oni na vakadruka na vanua. Yalovinaka, yalataka ni drau na vakabula noqu vuvale.’

Rau tukuna vei Reapi na yamata: ‘Keirau yalataka ni na bula ga o ira na tiko ena nomu vale. Mo vesuka na wa damudamu ena nomu katubaleka me vakabulai kina nomu vuvale.’

Erau siro ena dali na yamata ena katubaleka i Reapi. Rau lai vuni ena veiulunivanua me tolu na siga, oti rau lesu vei Josua. Era qai takosova na Isireli na Uciwai na Joritani mera lai tawana na vanua. Na imatai ni koro mera vakamalumalumutaka o Jeriko. E tukuna vei ira o Jiova mera wavokita vakadua na koro, mera cakava qo ena loma ni ono na siga. Ena ikavitu ni siga, mera wavokita vakavitu. Era qai uvuca na biukila na bete, era kaila tale ga vakadomoilevu na sotia. E kasura ga mai na bai ni koro! Ia e sega ni bale na vale i Reapi e toka ena delanibai. E bula o koya kei na nona vuvale ni nuitaki Jiova.

Era rogoca na veivanua e Kenani na ka e yaco mai Jeriko. Era mani tovata na tui mai na veivanua qori mera valuti Isireli. Ia era sega ni cakava qori na kai Kipioni. Era vakaisulu makawa ra qai lako vei Josua, era kaya: ‘Keimami gole mai vakayawa. Keimami rogoca na veika me baleti Jiova kei na ka e cakava ena vukumuni mai Ijipita kei Moapi. Keimami na qaravi kemuni ke o yalataka ni o na vakabulai keimami.’

E vakabauti ira o Josua, mani yalataka ni na sega ni vakarusai ira. Ni oti e tolu na siga e qai kila nira sega ni gole mai vakayawa. Era kai Kenani ga. E tarogi ira o Josua: ‘Na cava oni lasutaki keimami kina?’ Era kaya: ‘Keimami a rere! Keimami kila ni vala tiko ena vukumuni o Jiova na nomuni Kalou. Yalovinaka, kua ni vakamatei keimami.’ E mani yalataka o Josua ni na vakabulai ira.

Sega ni dede, eratou via vakarusai ira na kai Kipioni e lima na tui e Kenani kei na nodratou mataivalu. E lako ena dua na bogi taucoko o Josua kei na nona mataivalu me vakabulai ira na kai Kipioni. Ena mataka tarava e qai tekivu na vala. Era dui dro ga na kai Kenani. Na veivanua ga era gole kina e vakatauca vei ira o Jiova na ucaqereqere lelevu. E qai kerei Jiova o Josua me tu vakadua na matanisiga. Na cava e kerea kina qori o Josua ni se sega ni bau yaco vakadua? Ni nuitaki Jiova vakalevu. A tu vakadua na matanisiga ena siga taucoko qori me yacova ni ratou vakarusai na tui e Kenani kei na nodratou mataivalu.