E liutaki ira voli na tamata i Jiova o Josua ena dua na gauna balavu, e qai mate ni sa yabaki 110. Ni se bula, era sokaloutaki Jiova na Isireli, ia ni sa mate era qaravi matakau me vakataki ira ga na kai Kenani. Nira sega ni vakatotomuri Josua, e vakatara o Jiova me vakararawataki ira e dua na tui ni Kenani o Japini. Era kerea na veivuke i Jiova na Isireli, mani lesi Peraki me nodra iliuliu vou. Ena vukei ira mera lesu vei Jiova.

E kacivi Peraki na parofita yalewa o Tepora me lako yani vua. E qai tukuna vua na itukutuku i Jiova: ‘Kauta e tini na udolu na tagane mo dou lai sota kei na mataivalu i Japini ena uciwai o Kisoni. O na vakadrukai Sisera e kea, na iliuliu ni mataivalu i Japini.’ E tukuna o Peraki vei Tepora: ‘Au na lako ga ke o tomani au.’ E mani kaya o Tepora: ‘Au na tomani iko. Ia mo kila tiko ni o na sega ni vakamatei Sisera. E tukuna o Jiova ni na vakamatei koya e dua na marama.’

E mani tomani Peraki o Tepora kei na nona mataivalu e Ulu i Tepori mera lai vakavakarau ena ivalu. Ni rogoca ga qo o Sisera, e kauta sara ena buca na nona qiqinivalu kei ira nona sotia. E tukuna o Tepora vei Peraki: ‘Nikua ena solia vei iko o Jiova na qaqa.’ E ciciva sobu na ulunivanua o Peraki kei na tini na udolu nona sotia me vala kei na mataivalu kaukaua i Sisera.

E qai vakavuna o Jiova me luvu na uciwai o Kisoni. E sega ni toso rawa na qiqinivalu i Sisera ena levu ni soso, mani biuta nona qiqinivalu me dro. E qaqa na mataivalu i Peraki kei na nona sotia, ia e dro o Sisera! E lai vuni sara ena nona valelaca e dua na marama o Jaili. E solia vua o Jaili na sucu me gunuva qai ubi koya ena itutuvi. E lutu sara nona moce na dauvala qo. E lako lo o Jaili qai tukia e uluna na pini ni valelaca, mani mate.

E vaqarai Sisera sara o Peraki. E gole yani e tuba o Jaili qai kaya: ‘Mai, au na vakaraitaka vei iko na turaga o vaqara tiko.’ Ni curu i loma o Peraki, e raici Sisera ni sa mate tu. Erau vakacaucautaki Jiova sara ena sere o Peraki kei Tepora ni vakadrukai ira na meca qai solia na qaqa vei ira na Isireli. E vakilai na vakacegu e Isireli ena 40 na yabaki tarava.

E yaco na dausiga e Isireli, mani toki i Moapi e dua na marama ni Isireli na yacana o Neomai. E tomani koya o watina kei rau na luvena tagane. Dua na gauna e muri e qai mate o watina. Rau vakawatitaka na luvena tagane e rua na yalewa ni Moapi, o Ruci kei Oripa. Ia ni toso na gauna, rau mate tale ga na luvena tagane.

Ni rogoca o Neomai ni sa oti na dausiga e Isireli, e via lesu tale ina nona vanua. Rau tomani koya o Oripa kei Ruci. Ni ratou taubale tiko, e kaya sara vei rau o Neomai: ‘Kemudrau na vugoqu vinaka, drau a qaravi rau vinaka na luvequ tagane. Au vinakata mo drau vakawati tale. Raica, drau lesu i Moapi.’ Rau kaya sara: ‘Dua na ka neirau lomani iko! Keirau sega ni via lesu.’ E tukuna tiko ga o Neomai me rau lako. E mani lesu o Oripa, ia e tiko ga o Ruci. E kaya o Neomai vei Ruci: ‘Sa lesu o Oripa vei ira na wekana kei na nona kalou. Lesu vata kei koya mo lako ina vale nei tinamu.’ E kaya o Ruci: ‘Au na sega ni biuti iko. Na kainomu era na kainoqu, na nomu Kalou ena noqu Kalou.’ Cava ena vakasamataka o Neomai ni rogoca qori?

Rau yaco e Isireli o Neomai kei Ruci ni sa tekivu tamusuki na varile. Dua na siga, e lai tomika o Ruci na ivovo ni varile ena were nei Poasa, na luvei Reapi. E rogoca o Poasa ni marama ni Moapi o Ruci, a sega tale ga ni via biuti Neomai. E kaya vei ira nona tamata cakacaka mera biuta tu mai eso na varile me rawa ni kumuna o Ruci.

Ena yakavi ya, e tarogi Ruci o Neomai: ‘O cakacaka i vei nikua?’ E tukuna o Ruci: ‘Nona were e dua na turaga na yacana o Poasa.’ E kaya vua o Neomai: ‘Erau veiwekani o Poasa kei watiqu. Mo cakacaka tiko ga ena nona were kei ira na vo ni goneyalewa. O na taqomaki kina.’

E cakacaka tiko ga o Ruci ena were nei Poasa me yacova ni oti na tatamusuki. E raica o Poasa ni yalewa vinaka, e dau cakacaka tale ga. Ena gauna ya, ke mate e dua na tagane qai sega na luvena, ena vakawatitaki watina e dua na wekana. E mani vakawatitaki Ruci o Poasa, dua sara na luvedrau tagane o Opeti. E qai makubui Opeti o Tui Tevita. Era marau na itokani nei Neomai, era kaya: ‘E soli Ruci vei iko o Jiova qai lomani iko vinaka, qo sa dua sara na makubumu. Me vakacaucautaki ga o Jiova.’