Era vakanadakui Jiova tale na Isireli ra qai sokaloutaka na kalou lasu. E vitu na yabaki nodra butakoca na kai Mitiani na nodra manumanu, ra vakacacana tale ga nodra iteitei. Era vuni ena qara kei na veiulunivanua mera bula kina. Era vakamasuti Jiova me vakabulai ira, mani tala e dua na agilosi me lai raica na cauravou o Kitioni. E kaya vua na agilosi: ‘Sa digitaki iko o Jiova mo dauvala qaqa.’ E taroga o Kitioni: ‘Meu vakabulai Isireli vakacava? E sega mada ga na kequ yaga.’

Ena kila vakacava o Kitioni ni digitaki koya o Jiova? E biuta na vutinisipi ena qele qai kaya vei Jiova: ‘Ena mataka, ke suasua na vutinisipi ena tegu qai mamaca tu ga na qele, au na kila ni oni vinakata meu vakabulai Isireli.’ Ena mataka tarava, e suasua na vutinisipi qai mamaca tu na qele! Ia e kerea tale o Kitioni me mamaca na vutinisipi, me suasua na qele ena mataka tarava. Ni yaco qori, sa qai vakadeitaka o Kitioni ni digitaki koya dina o Jiova. E mani soqoni ira na nona sotia mera valuti ira na kai Mitiani.

E tukuna vei Kitioni o Jiova: ‘Au na solia na qaqa vei ira na Isireli. Ia me vaka nira le levu nomu sotia, de oni na nanuma ni oni vakavuna na qaqa. Ke dua e rere, tukuna me lesu i vale.’ Era qai lesu i vale e 22 na udolu na sotia, e vo ga e tini na udolu. E tukuna tale o Jiova: ‘Era se le levu tiko ga na sotia. Kauti ira mada ina uciwai, tukuna mera gunu. Mera digitaki ga o ira era gunu ra qai veiraiyaki tiko ena vukudra na meca.’ E 300 ga na tagane era cakava qori. E yalataka o Jiova ni o ira ga qo era na vakadruka na 135 na udolu na sotia ni Mitiani.

Ena bogi qori e tukuna vei Kitioni o Jiova: ‘Qo na gauna mo valuti ira kina na kai Mitiani!’ E solia o Kitioni vei ira na nona tamata na davui kei na saqa lala lelevu e tiko e loma na cina caucaudre. E tukuna vei ira: ‘Ni raica na ka au cakava, moni vakamuria tale ga.’ E uvuca na nona davui o Kitioni, e vorolaka nona saqa, yalovaka nona cina qai kailavaka: ‘Na iseleiwau i Jiova kei Kitioni!’ Era cakava tale ga qori na 300 na tagane. Era rere na kai Mitiani ra qai cici ena veiyasana kece. Ena levu ni nodra veilecayaki, era veivakamatei ga vakataki ira. Io, e vukei ira tale na Isireli o Jiova mera vakadruka na kedra meca.

E dua na turaga ni Isireli o Elikana, e rua na watina, o Ana kei Penina. E lomani Ana vakalevu. Ia e levu na luvei Penina, e sega ni vakaluveni o Ana. Qori na vuna e dau vakalialiai koya kina o Penina. E veiyabaki, e dau kauti ratou nona vuvale o Elikana i Sailo me ratou sokalou ena valeniveitavaki. Ni ratou tiko e kea ena dua na gauna, e raica o Elikana ni rarawa o Ana. E kaya: ‘Kua ni tagi Ana. Au lomani iko vakalevu.’

E mani lako o Ana me lai masu. Ni kerei Jiova tiko me vukei koya, e sega ni tarova rawa nona tagi. E yalataka: ‘Jiova, ke oni solia vei au e dua na gonetagane, au na soli koya me qaravi kemuni ena nona bula taucoko.’

E raica na Bete Levu o Ilai ni tagi tiko o Ana, e nanuma ni mateni. E kaya vua o Ana: ‘Sega, noqu turaga, au sega ni mateni. Au tukuna tiko vei Jiova na noqu leqa.’ E kila kina o Ilai ni cala nona nanuma, sa qai kaya vei Ana: ‘Me solia mada ga vei iko na Kalou na ka o vinakata tiko.’ E marau o Ana qai lesu tale. Oti e vica na vula, e sucu na luvena tagane, e vakayacani koya me o Samuela. Sa na marau mada ga o Ana, se vakacava?

E sega ni guilecava o Ana na ka e yalataka vei Jiova. Ni sa levu toka o Samuela, e kauti koya sara me lai veiqaravi ena valeniveitavaki. E tukuna vei Ilai: ‘Qo na gonetagane au kerea tiko ena noqu masu. Au soli koya me qaravi Jiova ena nona bula taucoko.’ Rau dau sikovi Samuela e veiyabaki o Elikana kei Ana, rau kauta tale ga na nona isulu balavu vou. E mani vakavuna o Jiova me tolu tale na luvena tagane o Ana, rua na luvena yalewa.