Era biuti Jiova tale na Isireli mera qaravi kalou lasu. Nira ravuravu yani na Amoni, e sega sara ga ni vakabulai ira na kalou lasu qori. Era qai vakararawataki na Isireli ena dua na gauna balavu. Era kaya vei Jiova: ‘Keimami sa valavala ca. Yalovinaka, vakabulai keimami vei ira na meca.’ Era vakarusa nodra kalou matakau mera qaravi Jiova tale. E sega ni vinakata o Jiova mera rarawa tiko ga na Isireli.

E digitaki e dua na turaga qaqa o Jefica, me liutaki ira na Isireli mera valuti na Amoni. E kaya vei Jiova o Jefica: ‘Ke oni vukei keimami me keimami qaqa, au yalataka ni o koya ga e mai tavaki au e liu niu lesu i vale, au na soli koya vei kemuni.’ E rogoca o Jiova na masu nei Jefica, e vukei koya me qaqa.

O kila o cei e liu me tavaki Jefica ni yaco i vale? Na luvena yalewa duabau ga. E qiria tiko na tibereli qai meke tiko. Na cava ena cakava o Jefica? E nanuma lesu nona vosa ni yalayala qai kaya: ‘Oilei, na luvequ! O sa vakamosia dina na lomaqu. Au sa yalayala oti vei Jiova. Meu dina ena yalayala qori, au na soli iko mo lai veiqaravi ena valeniveitavaki e Sailo.’ E kaya vua o luvena: ‘Ta, ke o sa yalayala oti vei Jiova, mo cakava sara. Au kerea ga meu lako ina veiulunivanua kei ira noqu itokani yalewa me rua na vula, oti au na qai lako i Sailo.’ E qaravi Jiova ena yalodina o luvei Jefica ena valeniveitavaki e Sailo ena nona bula taucoko. Era dau gade vua e veiyabaki na nona itokani.

E rua na luvena tagane o Ilai na Bete Levu, rau veiqaravi tiko vakabete ena valeniveitavaki. Na yacadrau o Ofinai kei Finiasi. Erau sega ni muria na lawa i Jiova, rau vakalolomataki ira tale ga na Isireli. Nira kauta yani na Isireli na isoro me cabori vei Jiova, rau dau taura na lewe ni manumanu vinaka duadua me kedrau. E kila o Ilai na ka rau cakava tiko na luvena, ia e sega ni cakava kina e dua na ka. Vakacava ena vakalaiva qori o Jiova?

E gone sara o Samuela vei Ofinai kei Finiasi, ia e sega ni vakatotomuri rau. E taleitaki koya o Jiova. Ni moce tiko ena dua na bogi, e rogoca e dua na domo ni kaciva na yacana. E duri qai cici vei Ilai, e kaya: ‘O yau qo!’ Ia e kaya o Ilai: ‘Au sega ni kacivi iko. Lai davo.’ E lai davo tale o Samuela. Oti, e rogoca tale na kaci. Ena ikatolu ni gauna e rogoca kina na domo o Samuela, e kila sara o Ilai ni ya o Jiova. E mani tukuna vei Samuela ke rogo tale mai na domo, me kaya: ‘Ni vosa mai Jiova. Sa vakarorogo tiko nomuni dauveiqaravi.’

Ni davo tale o Samuela, e rogoca sara: ‘Samuela! Samuela!’ E kaya: ‘Ni vosa mai, sa vakarorogo tiko na nomuni dauveiqaravi.’ E kaya vua o Jiova: ‘Mo tukuna vei Ilai niu na totogitaki ratou vakavuvale. E kila na ka ca erau cakava tiko na luvena ena valeniveitavaki, ia e sega ni cakava kina e dua na ka.’ Ena siga tarava e lai dola katuba sara o Samuela me vaka ga e dau cakava. E rere ni tukuna vua na bete levu na ka e kaya o Jiova. Ia e kacivi koya o Ilai qai taroga: ‘Luvequ, na cava e tukuna vei iko o Jiova? Kua ni vunitaka vei au.’ E mani tukuna kece vua o Samuela.

E tokoni Samuela tiko ga o Jiova ni tubu cake tiko. Era kila kece na Isireli ni digitaki koya o Jiova me parofita, me turaganilewa tale ga.