iDusidusi ni iVola ni Soqoni ni Bula vaKarisito kei na Cakacaka Vakaitalatala

iDusidusi ni iVola ni Soqoni ni Bula vaKarisito kei na Cakacaka Vakaitalatala

NOVEBA 10-16

IYAU MAI NA VOSA NI KALOU SERE I SOLOMONI 3-5

E Bibi me Totoka na iRairai e Loma

g04 12/22 9 ¶2-5

Na iRairai e Bibi Duadua

Vakacava e rawa nira taleitaka eso na noda itovo vinaka? E kaya o Georgina, sa voleka ni tini na yabaki nona vakawati: “Ni toso tiko na gauna, au volekati watiqu vakalevu ena nona daudina kei na nona yalodina vei au. Na ka e bibi duadua vua me vakamarautaka na Kalou. Qori na vuna e dau veinanumi kina qai dau loloma. Ni bera ni vakatulewa e dau taroga noqu rai, au kila kina niu mareqeti. Au kila ni lomani au vakalevu.”

E kaya o Daniel, e vakamau ena 1987: “E totoka tu ga vei au o watiqu. E sega wale ga ni totoka na kena irairai, ia au lomani koya vakalevu ena nona itovo vinaka. E dau veinanumi, e kauaitaka tale ga na ka me baleti ira eso tale. E dau vakaraitaka na itovo talei vaKarisito. Qori e dua na ka au taleitaki koya kina vakalevu.”

Ena vuravura ca qo, meda kua ni kauaitaka ga na irairai e sau. E bibi meda kila ni lekaleka na yaga ni keda irairai vinaka e sau. Ia e rawa nida bucina eso na itovo talei eda na rairai vinaka kina. E kaya na iVolatabu: “E rawa ni lasu na matakamica, e rawa ni seavu na matavinaka, ia na yalewa e dokai Jiova ena vakacaucautaki.” Ia e veivakasalataki na iVolatabu: “E vaka na mama koula ena ucu ni vuaka na yalewa matavinaka e cata na yalomatua.”—Vosa Vakaibalebale 11:22; 31:30.

E vakasalataki keda na Vosa ni Kalou meda raica vakabibi “na tamata e loma, e tokara na isulu e sega ni rusa rawa, oya na yalomalumalumu kei na yalomalua, e talei sara ena mata ni Kalou.” (1 Pita 3:4) Io, e bibi dina na itovo vinaka, sega ni irairai vinaka e sau. Eda rawa kece ni saga me vinaka na noda itovo.

NOVEBA 17-23

IYAU MAI NA VOSA NI KALOU SERE I SOLOMONI 6-8

Mo Dua na Bai, Sega ni Katuba

it “Sere i Solomoni” ¶11

Sere i Solomoni

Kena irairai ni sa qai vakadonuya o Solomoni me lesu na goneyalewa ni Sulamaiti i nona vale. Ni ratou raici koya na ganena ni lako tiko yani, eratou taroga: “O cei qo e lako cake tiko mai na vanua talasiga, e ravita tiko na nona daulomani?” (Sso 8:5a) Ratou sega ni kila na ganei goneyalewa ni Sulamaiti ni sa dodomo tiko o ganedratou. Ni se ka lailai na goneyalewa qo, e tukuna me baleti koya e dua na ganena: “E dua tiko na ganedatou lailai, e sega na sucuna. Na cava me datou cakava vei ganedatou ena siga e mai vosaki kina?” (8:8) E tukuna e dua tale na ganena: “Ke bai o koya, edatou na tara e delana na bai lailai siliva, ia ke katuba o koya, edatou na latia ena papa sitari.” (8:9) Ia ni vorata rawa na Sulamaiti na veitemaki kece, ya ni lomavakacegu tiko ga ena nona loganivaini qai yalodina vua e domona (8:6, 7, 11, 12), e tukuna kina: “O yau na bai, na sucuqu e vaka na valececere. E matana gona au vaka e dua e vakila na vakacegu.”—8:10.

yp 188 ¶2

Vakacava na Veiyacovi ni Bera na Vakamau?

Ni savasava e dua na itabagone, ena taqomaki mai na levu na leqa. E vakamacalataka na iVolatabu e dua na goneyalewa e savasava tiko ga, ia e domona vakalevu na nona itau. Oya na vuna e tukuna kina: “O yau na bai, na sucuqu e vaka na valececere.” A sega ni vaka na ‘katuba e vuki tadola,’ ya ni ‘tadola’ tu ga ni vakatovolei ena itovo dukadukali. Ni savasava na nona itovo, e dei kina me vaka na bai cecere e sega ni lakovi rawa! E veiganiti kina me tukuni vua ni ‘savasava,’ e rawa ni tukuni tale ga vei koya ena qai watina: “E matana . . . au vaka e dua e vakila na vakacegu.” Na nona vakacegu na goneyalewa qori e rawa kina ni rau lomavakacegu.—Sere i Solomoni 6:9, 10; 8:9, 10.

yp2 33

Nona iVakaraitaki na Sulamaiti

E kila na goneyalewa ni Sulamaiti ni vinakati me matata vua na ka e vauca na veidomoni. E tukuna vei ira nona itokani: “Moni bubului vei au . . . moni kua ni saga moni vakayadrata se uqeta meu veidomoni niu sega ni makutu kina.” E kila na goneyalewa ni Sulamaiti ni rawa ni vakaleqa totolo nona vakatulewa na ivakarau ni lomana. Kena ivakaraitaki, e kila ni rawa nira vakaukauataki koya eso tale me domona e dua e sega ni donu vua. Na ivakarau mada ga ni lomana e rawa ni vakatulewa ca kina. Ia e dei tu ga na goneyalewa ni Sulamaiti me vaka e dua “na bai.”—Sere i Solomoni 8:4, 10.

Me vaka na goneyalewa ni Sulamaiti, vakacava o yalomatua tale ga ena ka e vauca na veidomoni? Vakacava o na rogoca nomu vakasama, sega ni lomamu? (Vosa Vakaibalebale 2:10, 11) Eso na gauna era na rairai vakasaurarataki iko eso mo vakaitau ni se bera mada ga ni o vakarautaki iko. O na rawa mada ga ni nanuma mo sa vakawati. Kena ivakaraitaki, ni o raica e dua na cauravou kei na dua na goneyalewa ni rau veitauriliga, vakacava o via cakava tale ga? O na via vakawatitaka e dua e sega ni tautauvata nomudrau vakabauta? E yalomatua na goneyalewa ni Sulamaiti ena veika e vauca na veidomoni. O rawa tale ga ni va ya.