E tukuna o Jiova vei Samuela: ‘Lako ina vale nei Jese. Ena tui Isireli e dua vei ratou na luvena tagane.’ E lako sara o Samuela. Ni raica na ulumatua i Jese, e kaya: ‘Qo sara ga o koya.’ Ia e tukuna vei Samuela o Jiova ni sega ni digitaki koya. E kaya: ‘Au raica na loma ni tamata, sega ni kena irairai ga.’

E kauta tale yani e ono na luvena tagane o Jese. Ia e kaya o Samuela: ‘E sega ni digitaki ratou qo o Jiova. Se vo tale e dua?’ E kaya o Jese: ‘E sega ni tiko qo o Tevita, e gone duadua. E vakatawa sipi tiko.’ Ni lako yani o Tevita, e kaya vei Samuela o Jiova: ‘Qori o koya!’ E livia sara o Samuela na waiwai e ulu i Tevita, e lumuti koya me tui Isireli.

Dua na gauna e muri, era veivaluvaluti na Isireli kei ira na kai Filisitia. E tiko nodra tuawa dauvala na kai Filisitia, na yacana o Koliaci. E vakalialiai ira na Isireli e veisiga ni kacivaka: ‘Tala mai e dua me keirau vala. Ke qaqa, keimami na qaravi kemuni. Ia keu qaqa, oni na qaravi keimami.’

A lako o Tevita ina keba ni Isireli, e kauta eso na kakana vei ratou na tuakana eratou sotia. Ni rogoca na ka e tukuna o Koliaci, e kaya: ‘Mai me keirau vala!’ Ia e tukuna o Tui Saula: ‘O se gone.’ E kaya o Tevita: ‘Ena vukei au o Jiova.’

E vinakata o Saula me vakayagataka o Tevita na nona isulu kei na iyaragi ni vala, ia e kaya o Tevita: ‘Au sega ni kila na vakayagataka.’ E taura ga nona irabo, e lako ina uciwai qai digia e lima na vatu vinaka. E tawana ena nona taga qai cici vei Koliaci. E kailavaka na tuawa: ‘Lako mai, gonelailai. Au na solia na lewemu vei ira na manumanuvuka kei na manumanu kila.’ E sega ni bau rere o Tevita, e kailavaka ga: ‘O mai valuti au ena iseleiwau kei na moto, ia au na valuti iko ena yaca i Jiova. O sega ni valuti keimami, o vala tiko kei na neimami Kalou. Era na kila kece qo ni kaukaua sara o Jiova mai na iseleiwau kei na moto. Ena soli kemuni kece ina liga i keimami.’

E taura o Tevita e dua na vatu qai rabotaka ena nona igu kece. Ena veivuke i Jiova, e coba vinaka na vatu qori e yadre i Koliaci, e lutu na tuawa qo mani mate. Era dui dro na kai Filisitia mera vaqara bula. Vakacava o dau nuitaki Jiova tale ga vakataki Tevita?

Ni sa mate o Koliaci, e digitaki Tevita sara o Tui Saula me liutaka nona mataivalu. E qaqa ena levu na ivalu o Tevita, e kilai levu tale ga. Ni dau lesu mai ena ivalu, era meke na yalewa ra qai lagata: ‘E vakamatea o Saula e vica na udolu, o Tevita e vicasagavulu na udolu!’ E vuvu sara ga o Saula qai via vakamatei koya.

E dau qiri api o Tevita. Ni qiriqiri tiko ena dua na siga, e cokataka vua o Tui Saula na moto. E leve qai coba i lalaga. E saga tale vakavica o Saula me vakamatei koya. E mani dro o Tevita ina vanua talasiga.

E qai lako o Saula kei na 3,000 na sotia mera vaqarai Tevita. Era curu sara ena qaravatu a vuni tiko kina o Tevita kei na nona ilala. Era mani tukuna lo vei Tevita na nona ilala: ‘Qo sara ga na gauna mo vakamatei Saula kina.’ E lako vunivuni yani qai kotiva na bele ni isulu balavu nei Tui Saula. A sega ni bau kidava na tui. Ia e rarawataka tale o Tevita nona sega ni doka na tui digitaki i Jiova. E sega ni vinakata me ratou vakamatei Saula na nona ilala. E kailavaka vua ni a rawa sara ga ni vakamatei koya. Vakacava e cati Tevita tiko ga o Saula?

Io. E saga tiko ga me vakamatei Tevita. Dua na bogi, e lako vunivuni o Tevita kei na vugona o Apisai ina nodra keba na ilala i Saula. E moce tu o Apineri na yadra nei Saula. E kaya o Apisai: ‘Se kena gauna ga qo! Daru vakamatei koya.’ E sauma o Tevita: ‘Ena qai cakava qori o Jiova. Daru taura ga nona moto kei na saqa wai, daru lako.’

E cabe o Tevita ena ulunivanua volekata na keba i Saula qai kailavaka: ‘Apineri, cava o sega ni taqomaka kina nomu turaga? I vei nona saqa kei na moto?’ E kila o Saula na domo i Tevita, e sauma: ‘A rawa ni o vakamatei au, ia o sega ni cakava. Au kila ni o na veiliutaki tarava e Isireli.’ E mani lesu i vale o Saula. Ia era sega ni cati Tevita kece na vuvale i Saula.