Vakacegui Ira na Lolosi, me Vaka a Cakava o Jisu

A TAUVIMATE bibi o Lasarusa e vakaitikotiko mai Pecani. Rau mani vakauitukutuku na ganena o Marica kei Meri vei Jisu, na nodratou itokani voleka. Ia a rawai Lasarusa na mate oya. Era sikovi Marica kei Meri o ira na nodratou itokani kei ira era tiko veitikivi “mera lai vakacegui rau.” (Joni 11:19) Ni sa yaco mai Pecani o Jisu e lai raici rau sara na nona itokani dredre. Na noda vakasamataka na ka e tukuna kei na ka e cakava, eda na vulica kina na sala meda vakacegui ira kina na lolosi.

Nomu Tiko e iVakaraitaki ni o Kauai

Ena tauri Jisu e rauta ni rua na siga me yaco kina i Pecani, ena takosova na uciwai na Joritani qai cabeta na gaunisala tatakelokelo mai Jeriko. A lako totolo yani o Marica me lai tavaki Jisu ena saula ni koro. E muri, ni rogoca o Meri ni sa yaco mai o Jisu, a vakusakusa tale ga yani me lai raici koya. (Joni 10:​40-42; 11:​6, 17-20, 28, 29) Dina ni rau lolosi voli na veitacini, ia rau a vakila na vakacegu ni tiko o Jisu.

Edaidai, na noda dau tiko kei ira na lolosi e vu ni veivakacegui. A takali o Theo e yabaki ono na luvedrau tagane o Scott kei Lydia ena dua na vakacalaka, erau nanuma lesu: “Keirau gadreva sara tu ga na nodra veitokoni na neirau vuvale kei ira na neirau itokani. Era a yaco mai ena bogi levu, ia era lako sara yani i valenibula.” Na cava era kaya na itokani qo? “Ena gauna oya, keirau sega ni gadreva mera tukuna e dua na ka. Na nodra mai tiko kei keirau e ivakaraitaki ni nodra kauai.”

E kaya na iVolatabu ni raica o Jisu na nodra tagicaki Lasarusa na wekana, e “tagi” tale ga ni ‘vusolo na lomana.’ (Joni 11:​33-35, 38) A sega ni raica o Jisu na nona tagi e matanalevu me nodra ivakarau ga na yalewa. E kila vinaka tu na mosi kei na rarawa era vakila. Na cava eda vulica kina? Nida sikovi ira na wekada era lolosi, meda kua ni madua ni tagi kei ira era tagi. (Roma 12:15) Ena yasana adua, qarauna mo kua ni vakatagici koya e lolosi tiko. Ni so era na rairai vinakata mera tagi nira tiko taudua ga.

Vakarorogo ena Nomu Kauai

De a vakasamataka o Jisu me tauca eso na vosa ni veivakayaloqaqataki vei Marica kei Meri, ia a laiva ga me rau vosa e liu. (Joni 11:​20, 21, 32) Ni sa vosa vei Marica, e taroga e dua na taro, oti e vakarorogo.​—Joni 11:​25-27.

E ivakaraitaki ni veikauaitaki dina na noda dau vakarorogo vinaka. Nida cakava qori eda sa vakacegui ira tiko kina na lolosi. Eda na vakadinadinataka nida dua na dau vakarorogo vinaka nida taroga eso na taro ena uqeti ira na lolosi mera talaucaka kina na lomadra. Ia qarauna ga mo kua ni vakasaurarataki koya me drau veitalanoa ke sega ni via vosa. De dua era sa oca ra qai vinakata mera vakacegu mada.

Era na rairai lecaiyalodra na wekada era lolosi qai so na gauna era na tokaruataka na veika era tukuna. So era na tukuna na vusolo ni lomadra. A kaya o Meri vei Jisu vaka kina o Marica: “Turaga, ke oni a tiko eke, ke a sega ni mate o ganequ.” (Joni 11:​21, 32) Na cava a cakava o Jisu? A rogoci rau ena nona kauai qai sega ni kaya vei rau na lomana. E kila vinaka tu na rarawa kei na mosi era sotava na lolosi.

Ke o sega ni vakadeitaka na ka mo kaya ni o sikova na wekamu e lolosi voli, o na rairai tekivuna na veivosaki ena nomu taroga, “O vinakata mo talanoataka?” Ke sa talanoa tiko, mo vakatudaliga. Mo raici koya sara tiko ga mo kila rawa kina na lomana.

E sega ni rawarawa na nomu saga mo kila na lomai koya e lolosi. Baleta “e dau veisau na ka eda gadreva,” e vakamacalataka o Lydia. “So na gauna keirau sega ni tarova rawa na neirau tagi e matadra na vulagi. Ia keirau vinakata me dau donu na nodra rai na so. O ira gona na neirau itokani era saga ena nodra vinaka kece mera kila na ivakarau ni loma i keirau.”

A cakava vinaka sara qo o Jisu. E kila tu o koya na ‘ca ni loma’ ni tamata yadua “kei na nona rarawa.” (2 Veigauna 6:2; 9) A duidui na ivalavala e sauma kina o Jisu na nodrau vosa na veitacini ni rau mai tavaki koya. O Marica a vosa tiko ga, oya na vuna a vosa vakadede kina vua o Jisu. Ia o Meri a tagi voli, mani vosa vakalekaleka ga vua o Jisu. (Joni 11:​20-28, 32-35) Na cava eda vulica vei Jisu? De na vinaka me vakatau vua e lolosi na veika drau na veivosakitaka. Nomu tu vakarau ni rogoci koya ena rairai vakacegui koya sara ga.

Vosa ni Veivakacegui

A sega ni lulevaka se beitaka e dua o Jisu ni rau tukuna vua o Meri kei Marica: “Ke oni a tiko eke.” A veivakacegui na nona vosa vei Marica ena nona kaya: “Ena tucake tale na ganemu.” (Joni 11:23) Na vosa oya e vukei Marica kina o Jisu me namaka, me nanuma tale ga ni tiko na inuinui.

Se mani lekaleka vakacava na nomu vosa ni veivakacegui, o qai tauca mai vu ni lomamu ena vukei ira sara ga na lolosi. Na vosa ni veivakacegui e rawa ni cavuti se volai. Ena rawa ni veivakacegui tiko ena loma ni dua na gauna na ivola se card ni rawa ni wiliki vakavica. Ni oti e ciwa na vula na takali nei Bob na watina, a vakawilika kece tale tiko o Kath na card era a vakau yani vua. “A vukei au dina ena gauna oya,” e tomana, “Au vakila sara ga na vakacegu.”

Na cava soti o na rawa ni tukuna vakalekaleka ena nomu ivola ni veivakacegui? O rawa ni tukuna na ka e baleta na wekamu sa takali​—dua beka na ka a yaco drau kilavata se dua na nona itovo e dau talei vei iko. E kaya o Kath: “Niu wilika na vosa totoka e vakamacalataki Bob kei na nona itovo e vakavuna na noqu via dredre kei na noqu tagi. Au dredre kubukubu tale ga ena italanoa lasa e tukuni me baleti koya, au lai vakasamataka lesu kina na veigauna marautaki ni neirau bula. E volai tale toka ga ena levu na card na tikinivolatabu era talei dina vei au nikua.”

Veivuke e Yaga

A cakava o Jisu na ka eda na sega ni cakava rawa me vukei iratou kina na vuvale i Lasarusa. Oya na nona vakaturi Lasarusa. (Joni 11:​43, 44) Ia eda na cakava ga na ka eda rawata, me vaka beka noda vakarautaka e dua na kakana, lomasoli mo veivakaicilitaki, savasava, qarava na gone, talai, se o vakarautaka na sala ni veilakoyaki. Koya gona e sega ni vakabekataki ni veika lalai eda cakava ena dela ni loloma ena vakamarautaka dina na wekada e lolosi.

E macala ni o ira era lolosi era na rairai vinakata mera tiko taudua ena so na gauna. Ia o na vakaliuliu ena gauna veiganiti mo veitaratara kina kei ira. E kaya e dua na tina a lolosi voli: “E sega ni vakaiyalayala na gauna ni lolosi, e sega tale ga na tikinisiga ena vinaka kina na bula.” Eso era dau vakasamataki ira na wekadra sa takali ena tikinisiga era dau okata me bibi, me vaka na vakananumi ni siga ni vakamau se na siga a takali kina. Ni o tiko ena gauna va qori, o sa itokani vinaka dina ena gauna ni rarawa.​—Vosa Vakaibalebale 17:17.

Na veivakacegui a cakava o Jisu e okati kina na inuinui a vakavulica vei iratou na nona tisaipeli: “Sa moce na nodatou itokani o Lasarusa, ia au sa lako qo meu lai vakayadrati koya.” (Joni 11:11) A vakadeitaka vei iratou na nona imuri ni na yaco dina na veivakaturi. E tarogi Marica: “O vakabauta?” A sauma o koya: “Io Turaga.”​—Joni 11:​24-27.

O vakabauta ni o Jisu ena vakaturi ira na mate? Ke o vakabauta, ena vinaka mo wasea na inuinui totoka qori vei ira era lolosi voli. Mo vukei ira ena so na sala e yaga. Na vosa o tauca kei na veika o cakava ena vakacegui ira dina.​—1 Joni 3:18.

[Mape ena tabana e 9]

(Raica tale na ivola)

PERIA

Uciwai ni Joritani

Jeriko

Pecani

Wasa Tuituina

Jerusalemi

SAMARIA