Bibi Noda iSulusulu kei na Keda iRairai

E tiko na isulu kei na sasauni eda dau taleitaka. Ke da muria eso na ivakavuvuli vakaivolatabu, eda na sega ni cakava ga na ka eda vinakata, ia na ka ena vakamarautaki Jiova. Meda dikeva eso na ivakavuvuli vakaivolatabu qori.

1. Na ivakavuvuli vakaivolatabu cava me dusimaka noda isulu kei na sasauni?

E dodonu meda dara “na isulu veiganiti, e rakorako, me laurai kina na yalomatua,” me savasava tale ga na keda irairai me vakaraitaka nida “qarava na Kalou.” (1 Timoci 2:9, 10) Meda dikeva mada e va na ivakavuvuli qori: (1) Me “veiganiti” na noda isulusulu. O na raica ena neimami soqoni ni duidui na neimami isulusulu kei na ikotikoti, e laurai kina ni keimami doka na Kalou keimami sokaloutaka. (2) Ni tukuni me “rakorako” na noda isulu, e kena ibalebale nida na sega ni dara na isulu e veivagarogaroi, se vakavuna noda rai kiviti. (3) Eda na vakaraitaka na “yalomatua” nida sega ni dara na isulu e toso vata tu kei na gauna. (4) Me laurai ena keda irairai nida “qarava na Kalou,” qori e vakaraitaka nida sokaloutaka na Kalou dina.​—1 Korinica 10:31.

2. Eda nanumi ira vakacava na tacida ena keda irairai?

E tu vei keda na galala meda digia na isulu meda dara, ia meda dau vakasamataka tale ga na nodra rai eso tale. Eda na saga meda kua ni veivakatarabetaki, eda “nanumi ira na tamata kece ena ka e yaga vei ira, me vakauqeti ira.”​—Wilika Roma 15:1, 2.

3. Na cava e bibi kina na keda irairai?

Eda dau saga me veiganiti na noda isulusulu ena veigauna, ia eda na qarauna sara nida gole ena soqoni se na vunau. Eda sega ni vinakata me beci na itukutuku bibi eda kauta tiko yani. Ia eso era na mai taleitaka na ka dina ena vuku ni keda irairai, ena “vakacaucautaki kina na ivakavuvuli ni noda iVakabula.”​—Taito 2:10.

VAKEKELI

4. E dokai o Jiova ena vinaka ni keda irairai

Na cava e dua na vuna levu meda qarauna kina na keda irairai? Wilika Same 47:2, qai veivosakitaka na taro qo:

• Nida matataki Jiova, ena laurai vakacava qori ena noda isulusulu?

• O nanuma ni dodonu meda kauaitaka na keda irairai nida tiko ena soqoni kei na noda lai vunau? Na vuna?

5. Eda na digia vakacava na noda isulu kei na sasauni?

Sarava na VIDIO.

VIDIO: “Moni Cakava na ka Kece me Vakalagilagi Kina na Kalou” (10:18)

Ke saulevu noda isulu se saulailai, e dodonu me savasava qai veiganiti kei na vanua eda tu kina. Wilika 1 Korinica 10:24 kei na 1 Timoci 2:9, 10, qai veivosakitaka na vuna eda na sega ni dara kina na isulu e  . . .

• sakulevu se sakuca.

• kabita na yago, mamare, se veivagarogaroi.

Eda sa sega ni muria na lotu vaKarisito na Lawa e soli vei Mosese, ia e vakaraitaka na rai i Jiova. Wilika Vakarua 22:5, qai veivosakitaka na taro qo:

• Na cava meda qarauna kina noda isulusulu kei na sasauni ena rairai kina vaka na yalewa e dua na tagane, se dua na tagane me vaka na yalewa?

Wilika 1 Korinica 10:32, 33 kei na 1 Joni 2:15, 16, qai veivosakitaka na taro qo:

• Na cava meda kauaitaka kina ke tarabe eso ena noda itikotiko se ivavakoso ena vuku ni keda irairai?

• Na isulusulu kei na sasauni cava e takalevu ena nomu itikotiko?

• O nanuma ni so na ka va qori e sega ni ganita na lotu vaKarisito? Na vuna?

KA O VULICA

Nida qarauna na keda irairai, e vakaraitaka nida dokai Jiova kei ira eso tale.

Railesuvi

• Na cava e bibi kina vei Jiova na noda isulusulu kei na keda irairai?

• Na cava eso na ivakavuvuli vakaivolatabu eda rawa ni muria me baleta na keda irairai?

• Era na raica vakacava na sokalou dina eso ena vuku ni keda irairai?

IKURI

Raica se tukuni iko vakacava na isulu o dara.

“Na Cava Meu Kauaitaka Kina na Noqu iSulusulu?” (Ulutaga ena jw.org)

Dikeva na vuna mo vakasama rawa ni bera ni o tatu.

“Na Cava e Kaya na iVolatabu me Baleta na Tatu?” (Ulutaga ena jw.org)

Dikeva eso tale na ivakavuvuli vakaivolatabu me dusimaka na noda vakatulewa.

“E Vakalagilagi na Kalou ena Nomu iSulusulu?” (Na Vale ni Vakatawa, Seviteba 2016)

Na cava e cakava e dua na marama me kua ni tarabe ena kedra irairai eso?

“Vakadredretaka Noqu Toso na iSulusulu kei na Sasauni” (Yadra!, Tiseba 22, 2003)