E Vakayacoka Beka Vei Iko na Vula?

ENA vica na udolu na yabaki sa oti, a vakabauti tu ni vula e lewa tu na itosotoso ni bula e vuravura. A vakabauti tale tu ga ni kena dau veiveisau na irairai ni vula e lai vakayacoka sara ina kau, ina manumanu, vaka kina vei keda na tamata. E dina e vakacala e so na vakasama makawa vaka oya na vakadidike vakasaenisi ni gauna oqo, ia e so tale na vakasama era se vakabauti tiko ga me yaco mai edaidai. Na cava na kena dina?

E so era vakadinata ni tiko na kedrau isema na veiveisau ni irairai ni matanivula kei na tubu ni kau. O koya gona era vakayagataka na ivolanivula kei na almanac mera kila kina se gauna cava mera tei senikau kina, biu maniwa, tawaitavayataki na waini se na kedra tawaitavayataki na vuata mera qai maroroi tu. E caka oqo baleta ni nanumi ke caka qai veicalati kei na vanua e qara tu kina na matanivula, ena rawa ni ca na ka e maroroi oya. E kaya vaka oqo e dua na itukutuku vei ira na dauteitei: “Me beti na kakana draudrau eda kania ena gauna e coko vinaka kina na vula, ia na kakana draudrau me maroroi me beti ena gauna se lailai kina na vula.” E tiko beka na ivakadinadina vakasaenisi ni vakasama oqo?

E so na vakadidike era sema vata na tubu ni kau kei na kena dau veiveisau na irairai ni matanivula. Ia, e levu na saenisi era sega ni duavata kina. Era tukuna ni kena dau veisau na matanivula sa rui vereverea, e sega ni vakadeitaki na kena lawa, o koya gona ena duidui na macala ni vakadidike me vakatau ena gauna e caka kina.

Ia e so na vanua e vakayacoka kina na vula sa vakadeitaki. Me kena ivakaraitaki, na nodra veitosoyaki, nodra kana, nodra vakaluveni, kei na veisau ni nodra bula e levu na kabula e salavata kei na veisau ni ua, ia na ua e salavata tale ga kei na veiveisau ni rairai ni matanivula.

E so era kaya ke vakayacoka na vula ina ua, ena vakayacoka tale ga ina tamata, ni dua na iwase levu ni yagoda e tiko kina na wai. Ia vakacava ga na ka e tukuni me baleta na isema e tiko ena kena veiveisau na irairai ni vula kei na leqa ni vakasama, na gauna e sucu kina e dua na gone, bau okati tale ga kina na nodra matenivula na marama, e vaka tale ga na veisau ni vula?

Me kilai na kena dina, e caka kina e so na vakadidike e vauca na vakasama kei na sala e cakacaka kina na mona, kei na nodra vakaluveni na marama. E duidui na ka era kunea kina na dauvakadidike. E so na dauvakadidike era tukuna nira sa kunea na kena mai veisemai na noda ivalavala na tamata kei na veiveisau ni irairai ni vula, ia e so tale era vakacala ni sega sara ga ni rau bau veisemati. Era kaya ke vakayacoka ina sucu ni tamata na veiveisau ni irairai ni vula ke a sa laurai makawa sara na nodrau veisemati. Dua tale na ka, e sega ni dua vei ira na vakadidike oqo e vakamacalataka rawa na vakayacoka ni vula ena tamata mera vakadinata na saenisi.a

E dina ni saenisi e vakaraitaka ni vula e vakayacoka ena so na kabula ena vuravura, e sega ga ni vakadeitaki rawa na levu ni vanua e vakayacoka kina. Sa rui vereverea na noda vuravura kei na veika e tu mai lomalagi, ena gauna mada ga oqo, e levu sara na sala veivakurabuitaki tawarairai era lewa na ka e veitosoyaki tu ena vuravura e se sega tu ga ni kilai.

[iVakamacala e ra]

[iYaloyalo ena tabana e 19]

Na kalou yalewa o Selene, e ivakatakarakara ni vula vei ira na kai Kirisi kei na kai Roma ni gauna makawa

[Credit Line]

Musei Capitolini, Roma