Rau Veisau na Dau Vala, me Rau Dau Veisaututaki

A TABAKI ena ilavelave ni Awake!, 8 Tiseba, 2002, na italanoa kei Toshiaki Niwa, e dua na pailate vakacegu ni Japani, a vakavulici me lewe ni dua na ilakolako matawaqavuka ena dua na kabakoro a vakatokai na kamikaze mission ena iKarua ni iValu Levu. E talanoataka o Niwa, ni a tiko vakawawa ena dua na raraniwaqavuka ni mataivalu e volekata na korolevu o Kyoto ena Okosita 1945, a waraka tiko na kaci ni bolemate me valuti kina na manua ni Mereke. Mani sega ni vakarogoi mai na kaci oya, ni vica ga na siga e tarava sa cava na ivalu. Ni oti tale e vica na yabaki a tekivu vulica na iVolatabu o Niwa kei ira na iVakadinadina i Jiova. E vulica nira sega ni vakaitavi ena ivalu o ira na vinakata mera vakamarautaka na Kalou. Era doka na tamata kece, wili kina o ira na vakaitikotiko ena vanua tani se na vanua cava ga era cavu tu mai kina. (1 Pita 2:​17) A dauvala e liu o Niwa, ia oqo sa dau veisaututaki ena nona wasea yani na itukutuku ni duavata e kune ena Vosa ni Kalou.

Ni wilika na italanoa i Niwa o Russell Werts, mai Mereke, e tarai koya sara ga baleta ni a vala ena ivalu vata ga oya​—ia erau a sega ni tovata. “O kaya ena nomu italanoa ni o a tiko volekata na korolevu o Kyoto ena Okosita 1945, ena nomu waraka me tekivu na kaba vakaivalu,” e vola o Werts vei Niwa. “Ena gauna vata oqori au a vakaitavi tale tiko ga ena iotioti ni vakavakarau me baleta na kaba vakaivalu oya. Ke a sega ni mudu na ivalu, daru sa na mate ruarua beka ena yasana daru a dui to kina. Keirau a qai iVakadinadina i Jiova tale ga vakaveiwatini e muri, me vakataki kemudou ga vakavuvale. E marau dina na yaloqu niu vakasamataka, e dina daru a veimecaki kaukaua daru qai vakaitavi ena veivakamatei, ia oqo daru sega wale ga ni veitokani, daru sa veitacini sara tale ga!”

Me vakataki Toshiaki Niwa kei Russell Werts, e levu era a veimecaki kaukaua tu era sa duavata ra bula veiyaloni ena gauna oqo, nira vulica ra qai bulataka na Vosa ni Kalou, na iVolatabu. Era sa mai iVakadinadina i Jiova na Jiu kei na kai Arapea, na kai Armenia kei na kai Taki, kai Jamani kei na kai Rusia, ira na Hutu kei na Tutsi, era sa yaco mera lotu Vakarisito dina. E dina kina na vosa i Jisu: “A ka oqo era na kila kina na tamata kecega ni dou sa noqu tisaipeli, kevaka dou sa veilomani.”​—Joni 13:35.

[iYaloyalo ena tabana e 19]

O Toshiaki Niwa kei Russell Werts ena iKarua ni iValu Levu