O sa Vakarau Mo na Tiko Kina?

◼O sa vakarau mo tiko ena Soqo ni Tikina ni iVakadinadina i Jiova e kena usutu “Talairawarawa Vua na Kalou”? Na soqo ni tikina siga tolu oqo ena yaco veitarataravi. A tekivu e Mereke ena iotioti ni muanimacawa ni vula o Me, ena vakayacori tale ga ena vica na vula sa tu oqo e liu ena vica na drau na vanua e vuravura. Ena rairai caka tale ga e dua ena korolevu e voleka vei iko.

E tekivu na porokaramu ena levu na vanua ena dua na ivakatagi ena 9:30 ena mataka. Na usutu ni siga Vakaraubuka na “Vakarorogo ki na Noqu Vosa, Ka’u na Qai Nomudou Kalou.” (Jeremaia 7:​23) Ni oti e rua na vunau ena mataka e kena ulutaga “E ‘Veivakurabuitaki na Keda iBulibuli’” kei “Na Vuna Mo Nuidei Kina ni na Yaco Dina na Veivakaturi,” ena qai tini na porokaramu ena mataka ena ulunivosa e kena ulutaga, “Vakatotomuria na iVakaraitaki i Karisito ena Nomu Talairawarawa Vua na Kalou.”

Na porokaramu ena yakavi ni Vakaraubuka ena rogoci kina na ulutaga “‘Gadreva Tiko ga na iTovo Vakayalo’ Mo Bula,” “Qarauni Kemuni Mai na iValavala Kocokoco Kece Ga” kei na “Kua ni ‘Vakararavi ki na i Tukuni Buli Wale Ga.’” Sa na qai tarava e rua na vosa veitaravi e vakabibitaka e rua na ivola ena iVolatabu, na Akeai kei na Sakaraia. Ena tini na porokaramu ni siga oqo ena vosa “Sa Vakarau Oti na Rarawa Kece!”

Na usutu ni porokaramu ni siga Vakarauwai “Me ‘Vu Dina Mai Lomada’ Noda ‘Talairawarawa e na Ka Kecega,’” e yavutaki ena Roma 6:​17 kei na 2 Korinica 2:9. Na porokaramu ena mataka e okati kina e tolu na vosa veitaravi e kena ulutaga “Era Marau na Vuvale Era Muria na iVakavuvuli Vakalou.” Ena caka kina na vakatasuasua kei na veitarotarogi, me vakaraitaki na sala era dau vakaitavi kina na lewenivuvale​—o tama, tina kei ira na gone​—ena marau ni vuvale. E tini na porokaramu ena mataka ena ulutaga “Me Io na Io,” oti oqori sa ra na qai papitaiso o ira era sa rawata na kena ivakatagedegede.

Na ulutaga ni vunau ena yakavi ni Vakarauwai e okati kina “Kua ni Raica na Veika Tawayaga” kei na “Saumaki Vua na iVakatawa ni Nomuni Bula.” E tarava yani e rua na vosa veitaravi e kena ulutaga “Meda Talairawarawa Vei Ira sa Liutaki Keda.” Qai tini na porokaramu ena yakavi ena dua na vunau bibi ena soqo ni tikina oqo e kena ulutaga “Na Cava Mada e Kaya na iVolatabu?”

Na usutu ni porokaramu ni Sigatabu e kena ulutaga “Talairawarawa ina ‘Vosa Kecega Oqo . . . Me Yacovi Kemuni Kina na Ka Vinaka,’” e yavutaki ena Vakarua 12:28. Na tolu na vosa veitaravi e kena ulutaga “Vukei Ira e So Tale Mera Talairawarawa ina iVakavuvuli Vakaivolatabu” ena vukei keda meda tekivuna na vuli iVolatabu, me laulau tale ga.

Ena tini na porokaramu ena mataka ena dua na drama e kena ulutaga “Kakavaka na iSausau e Dokai Kina na Kalou.” Ni bera oya ena liu mada na vunau ni drama e kena ulutaga “Ra iTabagone​—Ena Tini Vinaka Beka na iSausau Oni sa Digia?” Na vosa oqo ena vakamacalataka na drama vakaivolatabu ena qai tarava, e baleta na yalo ni veiqaravi e tu vua na cauravou o Timoci, era vakadreti gona kina na itabagone nikua mera vakadamurimuria nona ivakaraitaki. Na iotioti ni porokaramu ni soqo ni tikina ena cava ena yakavi ni Sigatabu ena caka kina na vunau soqovi levu e kena ulutaga, “Meda Talairawarawa Vei Cei?”

Nakita rawa oqo mo na tiko kina. Ke o via kila na vanua ena caka kina na soqo oqo ena nomu yasayasa, veitaratara kei ira na iVakadinadina i Jiova ena nodra Kingdom Hall e voleka vei iko, se volavola vei ira na tabaka na ivoladraudrau oqo. Na itokani ni ivoladraudrau oqo Na Vale ni Vakatawa, ena kena ilavelave ni 1 Maji, e volai tu kina na vanua ena caka kina na soqo ni tikina e Ositerelia, Niusiladi, kei na veivanua ena Ceva ni Pasifika.