Na Rai ni iVolatabu

E Cala Beka na Via Rogo?

“CAVA mada e cala kina na via rogo, vakaiyau kei na kaukaua?” A laurai na taro oqo ena dua na ripote ni isoqosoqo ni lotu ena ruku ni ulutaga “Ethical Dilemmas,” (Duidui Rai me Baleta na ka e Dodonu). Na itukutuku oqori e baleta tiko na vosa a cavuta na Kalou vei Eparama: “Ka’u na vakayacori iko mo matanitu levu, ia ka’u na vakalougatataki iko, ka vakarogorogoya na yacamu.”​—Vakatekivu 12:2.

Dina ni tukuni tiko me kua ni “sagai na rogo ena nodra dabuitaki e so tale,” e tiko ena ripote oqori na ka e kaya e dua na rapai rogo ena imatai ni senitiuri: “Ke’u sega ni cakava na ka me baleti au, o cei ena qai cakava vei au?” qai tinia: “Ke da sega ni kila na ka meda cakava meda rawaka kina, ena sega tale ga ni dua e cakava vei keda.” Vakacava o ira na via qarava na Kalou, ena sega beka ni vakavu leqa vei ira na nodra vinakata na rogo? Na cava e okati ena noda kila na veika eda rawa ni cakava? E cala beka noda dau saga na rogo? Na cava na rai ni iVolatabu?

A Via Rogo Beka o Eparama?

E tukuni ena iVolatabu ni o Eparama e ivakaraitaki vinaka ena vuku ni nona vakabauta. (Iperiu 11:8, 17, VV) Ena nona yalataka na Kalou vei Eparama ni na yaco me dua na matanitu levu, qai rogo tale ga na yacana, a sega ni uqeti Eparama tiko me saga na rogo. A tukuna tiko ga na Kalou vua na nona inaki, mera na vakalougatataki na tamata ena vukuna, na ka e uasivi cake sara mai na nona via rogo e dua na tamata.​—Kalatia 3:14.

Ena nona saga me qarava na Kalou, e biuta kina o Eparama na vanua o Uri, e kune kina na bula vinaka kei na vutuniyau. (Vakatekivu 11:31) E muri, nona sega ni vinakata na veileti, a sega ni vakayagataka na kaukaua e tu vua, ia a vakatura vei Loti, na vugona, me digia na vanua vinaka duadua me tawana. (Vakatekivu 13:8, 9) Sega vakadua ni bau dua na itukutuku ena iVolatabu me tukuni kina ni a vinakata na rogo o Eparama. Ia, na nona vakabauta, talairawarawa, kei na nona yalomalumalumu e taleitaki koya kina na Kalou me vaka sara ga e nona “itokani” dina.​—Aisea 41:8, NW.

Na Rai Donu Baleta na Vakaitutu, Kilai kei na Kaukaua

Na rogo e kena ibalebale na “igu ni sasaga me rawati kina na vakaitutu, kilai, kei na kaukaua.” Ena gauna makawa, o Tui Solomoni a vakaitutu, e kilai, qai kaukaua, e levu tale ga na nona iyau. (Dauvunau 2:3-9) Ia, a sega sara ga ni bau guta na veika oqori. Na gauna sa tui kina o Solomoni a sureti koya na Kalou me kerea na ka e vinakata. Ena yalomalumalumu a kerea o Solomoni me vukei me dau talairawarawa, me soli tale ga vua na yalomatua me rawa ni liutaki ira kina vakavinaka na tamata digitaki ni Kalou. (1 Tui 3:5-9) E muri, ni sa qai vakamacalataka tiko o Solomoni na levu ni iyau kei na kaukaua e tu vua, e kaya ga ni “sa ka wale kecega ka sa ka ni oca.”​—Dauvunau 2:11.

E tukuna tiko beka o Solomoni na ka era rawa ni cakava na tamata? Ena dua na yasana e vaka kina. Ni dikeva oti na veika e sotava, sa qai tinia: “Mo rerevaka na Kalou, ka muria na nona vunau: ni sai koya ga oqo nai tavi taucoko ni tamata.” (Dauvunau 12:13) Io, e rawa sara ga nira rawaka na tamata, sega ena nodra gadreva na vakaitutu, vakaiyau, kilai, se kaukaua, ia ena nodra cakava ga na loma ni Kalou.

Vakacerecerei o Koya e Yalomalumalumu

E dina ni sega ni dua na kena ca kevaka eda dau lomani keda. Na iVolatabu tale ga e vakaroti keda meda lomani ira na kai noda me vaka ga eda lomani keda. (Maciu 22:39) Io, e sa kena ivakarau ga meda dau gadreva dina na veivakacegui kei na marau. Ia, na iVolatabu e uqeti keda meda dau cakacaka vakaukaua, da yalomalumalumu, da qai yalomalua. (Vosa Vakaibalebale 15:33; Dauvunau 3:13; Maika 6:8) O ira na tamata dau dina era na dau kilai vakalevu, ra kunea na cakacaka vinaka, ra qai dokai tale ga. Sega ni vakabekataki ke o muria na sala oqo o na sega ni dabui ira tale e so mo rawaka kina, se mo veiqatitaka na itutu.

O Jisu a vakasalataki ira na vakarorogo tiko vua mera kua ni dau digitaka na veitikina dokai ena vanua ni vakamau. E vakaroti ira mera digia ga na tikina sara e ra, me na qai veisautaka ga na vanua era dabe kina o koya e sureti ira yani. E kaya o Jisu ena nona vakamatatataka na yavu ni ivakavuvuli oqo: “O koya yadua e dau vakalevulevui koya e na vakalolovirataki, ia ko koya yadua e dau vakalolovirataki koya, e na vakalevulevui.”​—Luke 14:7-​11, VV.

Era Sega ni Via Rogo na Lotu Vakarisito Dina

Na iVolatabu e tukuna ni rau veiwekani na viavialevu kei na ivalavala ca. (Jemesa 4:5, 6) Dua tale ga na gauna a via rogo na yapositolo o Joni. E lomana dina sara ga me vakaitutu, rau qai duavata kina kei tacina, mani kerea sara ena doudou o Joni vei Jisu me nodrau e dua na tikina dokai ena Matanitu ni Kalou. (Marika 10:37) E muri, sa qai veisautaka nona rai o Joni. Ena nona ikatolu ni ivola, e warumisa nona vakalewai Tiotirifi, qai kaya ni sa rui “viavialiu.” (3 Joni 9, 10) O ira na lotu Vakarisito nikua era taura vakabibi na vosa i Jisu mera dau yalomalumalumu, mera muria nona ivakaraitaki na yapositolo sa kena turaga o Joni, ni a vulica me cata na via rogo.

Ia, na kena dina ga oya ni sega ni rawa ni tukuni nira na kilai na tamata ena vuku ni taledi e tu vei ira, nodra ivakarau vinaka, kei na nodra dau cakacaka. So na gauna era na kilai, so na gauna e sega. (Vosa Vakaibalebale 22:29; Dauvunau 10:7) So tale na gauna, era dau biu sara ga ena so na itutu o ira e lailai nodra kila, ra qai vakatikitikitaki o ira e tiko dina vei ira na kila. Ena vuravura tawayalododonu oqo, o ira na vakaitutu kei ira na kaukaua e rairai sega ni tu dina vei ira na kila.

E sega ni tiko vei ira na lotu Vakarisito na duidui rai me baleta na ka e dodonu. E vukei ira na nodra lewaeloma e vakavulici ena iVolatabu mera cata na itovo oqori. Era saga ga mera cakava ena nodra vinaka taucoko na veika kece era kitaka, me vakarokorokotaki kina na Kalou, ra qai laiva ga vua. (1 Korinica 10:31) Io, na ka gona era rawa ni saga na lotu Vakarisito mera rerevaka na Kalou, ra qai muria nona ivakaro.

[iYaloyalo ena tabana e 12]

A uqeti Eparama beka na Kalou me saga na via rogo?