“I Jiova, Oni sa Kunei Au!”

Talanoataka o Nelly Lenz

“O drau iVakadinadina i Jiova?” Au tarogi rau na turaga erau veisiko mai vale. “Io,” erau sauma mai. Sega ni bera noqu kaya yani, “O yau tale ga!” Au se qai yabaki 13 kina, au sega ni dau lako ina soqoni ena Kingdom Hall. Rau sega tale ga ni iVakadinadina i Jiova na noqu itubutubu. Ia, na cava mada au qai kaya tu kina niu dua na iVakadinadina?

KE RA sega na iVakadinadina i Jiova, keu a sega beka ni sucu. A bukete o tinaqu ni se vakaitikotiko e Montreal, mai Quebec, e Canada. Ia, ni se qai yabaki 17 ga, eratou mani vakasaurarataki koya na nona vuvale me vakalutuka na gone. A vakadonuya.

Kerea sara o tinaqu me cegu sigadua mai na nona valenicakacaka me rawa kina ni lai vakalutu. Ia, e iVakadinadina i Jiova na nona boso, qai rogoca rawa na vu ni nona via cegu o tinaqu ena siga oya. A vakamacalataka sara vua vakalekaleka ni dua na ka vakamareqeti na bula. (Same 139:13-​16) Ni gole tiko o tinaqu i valenibula, e sega ni yali rawa ena nona vakasama na ka e tukuna nona boso. Sa mani vakatulewataka koso me sa kua ni vakalutu. Au mani sucu gona kina ena 1964, ia a lai biuti au o tinaqu ena nodra vale na gone luveniyali.

iMatai ni Gauna Au Kila Kina na Ka Dina Vakaivolatabu

Niu se qai yabaki rua, sa vakawati o tinaqu, rau mani lai kauti au mai ena vale ni luveniyali me keitou sa mai tiko vata. Rau tekivu vulica na iVolatabu kei ira na iVakadinadina i Jiova na noqu itubutubu ni keitou vakaitikotiko ena tauni o Sainte-Marguerite-du-Lac-Masson, rau sa lakova sara tale ga na soqoni ni ivavakoso. Ia, sega ni dede keitou sa toki i Boisbriand, lai mudu e kea na nodrau vuli iVolatabu.

Oti e vica na yabaki, rau tekivu vuli iVolatabu tale. Au dau via vakarorogo, niu via kila na ka e tukuna na iVolatabu me baleta na inuinui ni parataisi e vuravura. (Luke 23:43) Tekivu e kea na kena sa kadre e lomaqu na noqu lomani Jiova.

Ia, dua na siga sa tukuna o tinaqu ni rau sa muduka na nodrau vuli iVolatabu kei ira na iVakadinadina i Jiova, kena ibalebale ni keitou sa na sega tale ni qai lako ina Kingdom Hall. Dua na ka na noqu marau niu rogoca na itukutuku oya. E baleta beka niu se qai yabaki walu, qai vaka me sa rui balavu vei au na soqoni ena so na gauna. Ia, ena bogi oya, e leqa na lomaqu niu vakarau masu, de na sega ni rogoca o Jiova.

Ena yakavi ni Sigatabu e tarava, au raici ratou na iVakadinadina i Jiova keitou tiko veitikivi ni ratou lako tiko ina soqoni ina Kingdom Hall. Au tagi ena noqu taroga na Kalou, “Na cava au sega ni lako rawa kina ina soqoni, me vakataki ratou na gone oya?” Ia, a dina vei au na qaqa ni Same 33:18: “Raica, na mata i Jiova sa wanonovi ira era sa rerevaki koya, ko ira era sa nuitaka na nona loloma.”

Lako Tale ina Kingdom Hall

Ni oti e tolu na macawa, au sikovi iratou na toka tikivi keitou au qai kaya vei tinadratou, o Lilianne, niu vinakata meu lako tale ga ena soqoni. E vakamacalataka o Lilianne ni na sega ni rawa baleta ni sa sega ni via veimaliwai kei ira na iVakadinadina i Jiova o tinaqu. Ia, au cike tiko ga. Sa qai kauti i vale qai tarogi tinaqu keu rawa ni lako kei iratou. Au kurabui ni vakadonuya o Nau. E kaya ni soqoni vaka oqori ena vakavulici au ena itovo vinaka. Tekivu e kea noqu sa dau tiko ena soqoni ena Sigatabu kece.

Voleka ni yabaki tolu noqu dau lako tiko ena soqoni vakaivavakoso. Ia, niu qai yabaki 11, rau sa sere na noqu itubutubu, keirau qai toki kei tinaqu. Sa baci mudu tu noqu veitaratara kei ira na iVakadinadina i Jiova.

Au Sega ni Namaka na Noqu Sotavi Rau

Dua na siga niu dabe tiko ena ikabakaba ni neirau matanivale, rau lako sara yani e rua na iVakadinadina​—o Eddie Besson kei Don Fisher​—rau qai taroga ke rau tiko e vale na noqu itubutubu. Niu kaya ni sega, rau sa mani vakanadaku ga me rau lesu. Au cici muri rau, au qai tauca kina na vosa ena idola ni noqu italanoa.

Rau kurabui sara ga ena noqu kaya niu iVakadinadina i Jiova. Au vakamacalataka na ituvaki au sotava tiko, au qai cikevi rau me rau lesu tale mai ena yakavi oya. Ena gauna au tukuna kina vei Nau ni rau na lesu tale mai na iVakadinadina, a rarawa vakalevu qai kaya ni na sega ni vakacurumi rau i vale. A sa lalawataka sara ga me biubiu ni rau se bera ni yaco yani. Au cikevi koya tagitagi me tiko. Na gauna sara ga e vakarau curu kina i tuba, e taqiri na lali ni katuba, sa duri tu o Eddie Besson. Vakasamataka ga na noqu marau ni sa vakadonuya o Nau me vulica tale na iVolatabu!

Au sa na rawa ni tiko tale ena soqoni vakaivavakoso! Ia, ni se bera ni oti e dua na yabaki, a baci mai cegu nona vuli iVolatabu o Nau. Sa vakatabuya tale ga meu veitaratara kei ira na iVakadinadina i Jiova, qai kolotaka na nodra ivolatabaki kece e kunea rawa. Ia, au mani vunia rawa e dua na iVolatabu, dua na ivolanisere, rua na bound volume ni Watchtower, rua na ivola vakayabaki ni iVakadinadina i Jiova, kei na ivola Na Ka Dina sa Basika ki na Bula Tawamudu.a Ena iotioti ni noqu vuli iVolatabu, au tarogi Eddie Besson se cava au rawa ni cakava, niu lomani Jiova vakalevu. E uqeti au meu vuli vakataki au, meu masu wasoma tale ga. E vakadeitaka o koya ni na maroroi au o Jiova. Au se qai yabaki 14 tiko kina.

Au Cakava ga Vakataki Au na Noqu Soqoni

E keri tale ga sa tekivu kina noqu dau lako ena noqu rumu ena veisigatabu, au qai raitayaloyalotaka niu sa tiko ena soqoni. Au dau lagata na sere “Raica Dei Na I Sausau!” me tekivu qai tini kina na noqu soqoni, ni oqo ga na sere au se bau nanuma tiko. Me yacova mai nikua, na gauna kece au lagata kina na sere oqo, e dau tuturu ga na wainimataqu. Au na vulica tale ga e dua na ulutaga ena Watchtower mai na bound volume a tiko vei au. Au qai tinia noqu soqoni ena masu. Dina gona niu a sega ni sosoqoni vata kei ira na iVakadinadina, ia au vakila ga ni tiko vata kei au o Jiova.

Niu sa yabaki 17, keirau toki kei Nau e Montreal. Gauna dredre dina na veiyabaki oya, ni sega ni vakilai e vale na veilomani.

Sa Kune!

Dua na siga a ciqoma o Nau mai vei ira na iVakadinadina i Jiova e dua na ivola, E Rawa Mo Bula Tawamudu ena Parataisi e Vuravura. Niu lesu yani i vale, au raica sara ena dela ni teveli, au mani vakacega sara. Niu raica ga ni vakayagataki tiko kina na yaca ni Kalou, o Jiova, au tagi, salavata kei na noqu masuta lo, “I Jiova, oni sa kunei au!”

Au vinakata sara ga meu veitaratara kei ira na taciqu vakarisito. Ia, ena rawa vakacava? E kaya o Nau ni rairai iVakadinadina i Jiova e dua e tiko tikivi keirau. Dua gona na gauna niu lako tiko i cakacaka, au mani lai qiria sara nodratou lali ni katuba. A yadra cecekala mai na turaga e mai dolava na katuba. E kurabuitaka niu tukuna yani vua niu iVakadinadina i Jiova, au qai vinakata meu papitaiso! Mani veivosaki sara o koya kei na dua na yalewa lotu Vakarisito, o Josée Miron, me keirau sa na vuli iVolatabu. Ia, e baci tusaqata tale o Nau noqu vulica na iVolatabu. A kaya niu na qai rawa ga ni dua na iVakadinadina niu sa yabaki 18.

Meu Vakanadakui Jiova Beka me Dua Kina Noqu Vuvale?

E raica noqu boso ni vaka me sa qai ca tiko ga na veika au sotava tiko mai vale. Rau dau sureti au vakalevu vakaveiwatini ena muanimacawa meu lai gade vei rau. Niu taleitaka vakalevu na ose, levu gona na gauna keitou dau lai vodo ose vata tu. Au raici rau me vaka sara ga noqu itubutubu dina.

A kaya e dua na siga noqu boso ni rau sa rui lomani au vakalevu vakaveiwatini, rau qai vinakata me keitou sa lai tiko vata. Sa dulaka tu o koya e dua na ka au dau vinakata vakalevu​—e dua na vuvale e kune kina na veilomani. Ia ena vakatau tiko ena ka oqo​—meu muduka noqu vakasosoqoni kei ira na iVakadinadina i Jiova. Erau solia vei au e dua na macawa meu vakasamataka kina, ia au sega mada ga ni gadreva e dua na siga meu vakasama tale kina. Ena gauna vata ga oya au sa tukuna kina vei rau na noqu nanuma. E se sega vakadua ni biuti au o Jiova, au na sega tale ga ni biuti koya.

Noqu Qarava na Kalou

Ni levu na leqa au sotava tiko e vale, au mani toki kina vei tamaqu vakacabecabe. E uqeti au meu tomana tiko ga noqu vuli iVolatabu, yaco sara kina meu papitaiso ena 17 Tiseba, 1983, niu sa yabaki 19. Sega ni tukuni rawa na levu ni noqu marau niu raici Eddie Besson ena siga au papitaiso kina. Sega tale ni qai lomatarotarotaka o koya niu sa dua na iVakadinadina i Jiova!

Ia, a veisau na itovo nei tamaqu vakacabecabe niu sa papitaiso oti. Ena gauna e dau raici au kina niu masu tiko, e dau vosa vakadomoilevu, se dau viriki au sara ga ena so na ka! E vakabibitaka vei au na vuli torocake, ia e macala ni na vakaleqa noqu isausau meu dua na painia se cakacaka vakaitalatala vakatabakidua. Na kena itinitini ga sa qai vakatalai au laivi. A solia vei au e dua na jeke ni $100 qai kaya vei au, na siga au na veisautaka kina na jeke oqori, sa na vakatakila tale ga ni sega ni kauaitaki au o Jiova.

Au painia sara ena 1 Sepiteba, 1986, ia se tiko ga vei au na jeke oya me yacova mai nikua, se bera niu veisautaka! So na gauna e dau dredre sara na painia ena veikoro ni sega tu na motoka. Ia era dau vukei au sara vakalevu na mataveitacini ena ivavakoso au tiko kina.

Ni toso na gauna, au sotava sara e dua na turaga yalovinaka, e lotu Vakarisito, o Ruben Lenz. Keirau mani vakamau ena 1989. E qase ni ivavakoso tiko o Ruben ena gauna oqo e Milton, e dua na tauni e Ontario, e Canada, na vanua keirau vakaitikotiko kina me tekivu mai na 2002. Na neirau vakawati oqo sa bau dua dina na veivakalougatataki levu e solia vei au o Jiova. Au tomana tiko ga noqu cakacaka vakaitalatala vakatabakidua me yacova na gauna sa sucu kina na neirau ulumatua, o Erika, ena 1993. Sivi tale vakalailai na tolu na yabaki, sa sucu e dua tale na luve i keirau tagane, o Mika. Ni oti e vica vata na yabaki ni noqu galili voli sa qai vakalougatataki au na Kalou o Jiova, ena nona solia vei au e dua na matavuvale e lomani koya, me vakataki au ga.

Dina ga niu yawaki ira na tamata i Jiova ena gauna au tubu cake tiko mai kina, au nuitaki Jiova tu ga, kei na noqu taura dei na inuinui ni bula tawamudu ena Parataisi. (Joni 3:36) Dua na ka noqu vakavinavinaka vakalevu sara ni a kunei au o Jiova!

[iVakamacala e ra]

[iYaloyalo ena tabana e 15]

Au vodo toka ena nona ose na noqu boso

[iYaloyalo ena tabana e 15]

O Nelly Lenz kei watina o Ruben, kei rau na luvedrau, o Erika kei Mika