E Yavu Vinaka Beka ni Vakawati na Bula Vata ni Bera na Vakamau?

E KAYA na ivola na Journal of Marriage and Family ni “sa takalevu tu ena veivanua vutuniyau e vuravura” na nodrau na bula vata mada e liu e lewe rua ni bera ni rau qai vakamau. E “nodra rai tale ga e rauta ni veimama na tagane kei na yalewa era tiko vata ga vaka oqori, ni sala oqo erau na vakatovolea kina se rau veiriti se sega.” Kena ibalebale ni sa rawa sara ga “ni vakavotui e kea na veika erau sega ni veiriti kina na lewe rua, me qai yaco na vakamau sa na rawa ni malumu na nodrau bula, ena dei tale ga,” e kaya na Journal.

“Ia, e veibasai dina oqori kei na ka e laurai ni dau yaco,” e kaya tale na Journal. “E kune vei ira na sa vakamau ia era a dau tiko vata mada e liu, nira sega ni dau marautaka nodra bula vakawati, e lailai na gauna era vakayagataka vata ena ka era dau taleitaka, era sega ni dau lomavata, ra sega soti ni veitokoni, sega nira walia vinaka nodra leqa, [qai] dau tatavutuvutu na nodra bula vakawati . . . Kena ikuri, o ira na dau bula vata mada e liu ra qai vakamau e muri, e laurai ni dau rawarawa na nodra veisere ni vakatauvatani kei ira era tekivuna na nodra bula vata ena nodra vakamau ga vakavinaka.”

Me vaka e vakaraitaki ena ka eda vakadeuca oqo, e so na ka ena dodonu vinaka tu beka ena rai vakatamata, ia e sega sara ga ni ka vakavuku. Sa dina ga kina na vosa ena Jeremaia 10:23: “Sa sega ni vu mai vua na tamata . . . me lewa na nonai lakolako.” E ka vakayalomatua gona meda rai ga ina Vosa ni Kalou, na iVolatabu, ni tu kina na ivakasala momona me baleta na vakawati! (2 Timoci 3:16) Me kena ivakaraitaki, e kaya na iVolatabu me baleta na bula vakawati: “O koya oqo sa na biuta kina na tamana kei tinana na tagane, ka kabita na watina: a rau na lewe dua ga.”​—Vakatekivu 2:24; Maciu 19:5.

Ke muri na veidusimaki vakalou oqori, sega ni rai vakatamata e dau cala qai veilecayaki, ena rawa ni marautaki vakalevu kina na bula vakawati, ena dei sara tale ga.​—Vosa Vakaibalebale 3:5, 6.