“Au Via Sere!”
Na vale e sa ca tu e vakaraitaka ni sega ni kauaitaki. Sa donuya mai e vica na draki ca ena veigauna sa oti, qai sega ni vorata rawa. Sa tekivu vuca tale ga, sa voleka sara ni rusa na vale qo.
E VAKARAITAKA na ituvaki ni vale qori na bula vakawati nikua. Vakacava na nomu vakawati, e sotava tale tiko ga na leqa va qori? Ke vaka kina, nanuma tiko e sega ni dua na vakawati e galala mai na leqa. E tukuna mada ga na iVolatabu nira na “vakararawataki” o ira na vakawati.—1 Korinica 7:28.
E tokona na vakasama qori e dua na vakadidike a caka, e tukuni kina ni vakawati “e vakatulewa rivarivabitaki duadua era cakava e levu nikua.” E tomana: “E rawa ni tekivutaki ena dua na veiwekani e marautaki qai levu kina na yalayala, ia e rawa ni veisau tale me gauna rarawataki qai mosimosi duadua ena nona bula e dua.”
Ia vakacava nomu vakawati? E laurai beka kina eso na ivalavala e volai toka era?
Veiba tu ga
Vosa gaga
Tawayalodina
Veicati
Ke o siqema ni sega ni dei nomu bula vakawati, na cava mo cakava? E iwali beka ni leqa na veisere?