Na Ka Dina ena iVolatabu e Veisereki
A TUKUNA o Jisu Karisito vei ira na rogoci koya tiko: “Oni na kila na ka dina, na ka dina ena qai sereki kemuni.” (Joni 8:32) E okati e keri na noda sereki mai na nodra veivakamuai na timoni, o ira na daulasu kei na dauveivakacalai era bukana na vakatevoro, qori e vakadinadinataki ena vica na ivakaraitaki tarava.—Joni 8:44.
Na irogo yadua qori e vakabibitaka na veisereki ni ka dina vakaivolatabu. Io, na ka dina duadua ga e veisereki. E vinaka mo dikeva sara ga na iVolatabu. O na lomavakacegu ena ka o raica kina.
[Kato/iYaloyalo ena tabana e 16]
Era ivakaraitaki ga na itaba
● O Susanna a dua tu na bete yalewa ni valenisoro mai Brazil. A vinakata me vakayagataka na kaukaua vuni a tu vua me vukei ira kina na vakaloloma. E marautaka na nona dau “veivosaki kei tinana sa mate.” Ia ni toso na gauna, a cikevi Susanna o “tinana” me vakamatei koya me rau lai tiko vata ena vuravura ni yalo. Qori e vakararawataki Susanna qai vakavuna me dau tadra kina eso na ka vakarerevaki. E qai vulica o Susanna kei watina na iVolatabu kei ira na iVakadinadina i Jiova. A sega ni rawarawa me rau ‘vorata tiko na Tevoro,’ ia e qai ‘dro tani vei rau.’ (Jemesa 4:7) Erau sa qai lomavakacegu ena gauna qo, sa dau moce vinaka tale ga o Susanna. E vola: “E levu dina na ka meu vakavinavinakataka vei Jiova, ia au vakavinavinakataka vakalevu sara na nona sereki keirau mai na butobuto vakayalo.”
[Kato/iYaloyalo ena tabana e 16]
● O Timoci mai na Ra kei Aferika e didivara qai galu.a Era sega ni vukei koya rawa na vuniwai, a mani golevi ira na dauveivakabulai, ia e ka ni rarawa ni sega ni yaco na nona nanuma. E vola: “Au rarawataka sara ga na noqu mai dabuitaki.” A qai vulica o Timoci na iVolatabu kei ira na iVakadinadina i Jiova, era vakamacalataka vua na inaki ni Kalou oya me vakaotia kece na tauvimate kei ira na vakaleqai na yagodra. E tukuna o Timoci: “Au vakanamata sara ga ena vuravura vou ni Kalou, ni na ‘rogo na daligadra na didivara . . . ka sere na yamedra na galu.’ ” (Aisea 35:1-6) Ena gauna mada qo, e marautaka tiko na nona vakayagataka na DVD player lailai e rawa ni veikauyaki me vunautaka kina na ka dina vakaivolatabu vei ira na didivara, mera vakila tale ga na veisereki dina.
[iVakamacala e ra]
a Eso na yaca sa veisau.
[Kato/iYaloyalo ena tabana e 17]
● O Evelyn mai Estonia a vakaitavi tu vakalevu ena ka vakatevoro. A via vakamurimuri Jisu ena nona dau veivakabulai. A vinakata sara ga me vukei tinana ni dau tauvimate. Ena nona sasaga gona me kila na vu ni mate kei na kena iwali, a vulica kina na ivakavakayagataki ni pendulum. Ni toso na gauna, a qai vulica na iVolatabu. Na cava a qai yaco? E tukuna: “Au sa qai kila ni cala sara tu ga na ka au cakava. Au vakama na ivola ni vakatevoro kei na pendulum.” Nikua sa vunautaka tiko vei ira eso tale na ka dina e veisereki ena iVolatabu.
● A susu o Mary ena dua na yanuyanu mai Papua New Guinea, era dau rerevaki kina na mate. Ni mate e dua ena nona koro, e dau lai moce ena ruku ni nona loga e dua tale. E cakava qori ni rerevaka de na qai vakasagai koya na yalo i koya e mate ke tiko taudua. A qai vulica ena iVolatabu nira moce tu na mate—era tu ena ibulubulu, ra qai waraka na veivakaturi ena Parataisi e vuravura. (Luke 23:43; Joni 11:11-14) Na nona kila qori e vakavuna na nona sa sega ni rerevaki ira na mate.
● O Alicia e susugi ena vuvale lotu vaKarisito mai Merika, a taleitaka na ivola kei na iyaloyalo vakatevoro. A qai vakasamataka vakabibi na ka dina vakaivolatabu a vulica ena gauna sa oti. A liaca ni sa ‘kana tiko ena teveli i Jiova kei na nodra teveli na timoni,’ mani veisautaka na nona ivalavala, ia qo sa vinaka na nona lewaeloma ena mata ni Kalou.—1 Korinica 10:21.