Bula Vakaidewadewa se Buli?

Na Maqosa ni Nona Bulia Nona Bure na Pi

● E kilai na pi ni kenadau sara ena bulibuli. Na cava eda tukuna kina qori?

Vakasamataka mada: Na pi e bulia qai taqomaka na nona bure ena dua na mataqali pepa e bulia ga vakataki koya.a Ena tomitomika mai na tikitiki ni wa lalai e tiko ena kau, kei na kau madu mai na levu na vanua, qori mai na tolonikau, duru ni bai, duru ni talevoni kei na iyaya ni tara vale. Sa na qai mama na wa lalai qori e levu kina na cellulose (qo e dua na mataqali wainimate e tiko ena kau e dau buli kina na pepa) qai wakia vata kei na nona weli e dregadregata, e levu kina na protein. Ena tara sara kina na nona bure, ena gauna sa mamaca kina e sa na veisau me dua na pepa, e kaukaua, mamada, ena sega tale ga ni vuca rawarawa. E talei dina na weli ni manumanu vuka lailai qo baleta ni bulia rawa kina na pepa e rawa ni vakatakatataka se vakabatabatataka na bure ni pi, qori e veiraurautaka kina na katakata ena loma ni bure ena draki batabata.

Na pi e tara na nona vale ena nona vakayagataka na gusuna. Ni sa tara oti, ena vaka ga na irairai ni iviu e buli ena pepa. E tiko na kena qara lalai e ono na kena lalaga, e sega tale ga ni suasua rawa. Na ono na lalaga qori e vakaukauataka na bure ni pi, qai veirauti tale ga na kena levu. Ia o ira na pi era bula ena vanua suasua, era vakayagataka vakalevu na nodra weli baleta na ka e tiko kina e rawa ni taqomaka na nodra bure me kua ni suasua. Oya na vuna era dau vaqara kina eso na vanua rurugu mera taqomaki vinaka kina. Era sa qai vaqara e dua na tolo ni kau ena vanua rurugu qori mera tara kina nodra bure. Nira tara na nodra bure na pi, era sega ni dau vakacacana na veikabula, ni vakatauvatani kei na noda bulia na pepa nikua ni dau vakaduka na wai, na cagi kei na qele!

E macala ga nira vakadikeva tiko na daunivakadidike kei ira na daudroini ni vale na maqosa ni nona bulibuli na pi ena kena sagai me buli na mataqali iyaya ni vale vinaka duadua qai mamada, kaukaua, rawarawa ni vakayagataki, ena sega tale ga ni vakaleqa na veikabula ena gauna e vuca kina.

Na cava o nanuma? Na mona ni manumanu vuka lailai qo e vaka ga e rua na mata ni nuku, ia e rawa ni bulia na pepa me tara kina na nona bure. Vakacava na ka e rawa ni cakava qori kei na wainimate e vakayagataka kina, e bula vakaidewadewa se buli?

[iVakamacala e ra]