Lewadodonu Dina ena Kauta Mai na Matanitu ni Kalou

E PAROFISAITAKI ena iVolatabu ni sa na vakarau sosomitaka na vuravura qo e dua na vuravura vou ena tauyavutaka na Kalou. Ena veiliutaki tale ga ena vuravura vou qori e dua ga na Matanitu—na Matanitu ni Kalou, e kena tui o Jisu Karisito. (Vakatakila 11:15) Ena vakaotia vakacava na Matanitu ni Kalou na veika tawadodonu? Ena cakava qori ena rua na sala.

1. Na Matanitu ni Kalou ena vakarusa na tawadodonu kei na guce ni veiuliutaki vakatamata. E tukuna na Taniela 2:44: “E na nodra gauna na tui ko ya [veimatanitu] ena qai vakatura na Kalou ni lomalagi e dua na matanitu . . . ena vurumemeataka ga ka vakaotia na veimatanitu [kece qori vakatamata], ka na tu ga ka sega ni mudu.”

2. Na Matanitu ni Kalou ena vakarusai ira na tamata ca qai vakabulai ira na yalododonu. E tukuni ena Same 37:10: “Malua mada vakalailai, ena qai takali na tamata ca.” Na tikina e 28 e kaya: “Sa vinakata na ka dodonu ko Jiova, ka sa sega ni biuti ira na nona tamata era yalosavasava; Era sa maroroi ka sega ni mudu.”

O ira na “yalosavasava” qori era na raica na kena vakayacori na ka e tukuna o Jisu ena masu a vakavulici ratou kina na nona imuri. A kaya: “Me yaco mai na nomuni matanitu. Me caka na lomamuni e vuravura me vaka e caka tiko mai lomalagi.” (Maciu 6:10) Na cava na loma ni Kalou me baleta na vuravura?

Ni sa na Veiliutaki e Vuravura na Matanitu ni Kalou . . .

Ena oti na veidabui kei na veivakalolomataki. E tukuni ena Iperiu 1:9 me baleti Jisu: “O vinakata na ivalavala dodonu, o cata na ivalavala e beci kina na lawa.” Ni dua na iLiuliu lewadodonu o Jisu ena “vakabula ko koya na dravudravua ni sa tagi; Kei koya sa vakararawataki ka sa sega e dua me vukei koya. . . . Ena vakabula na yalodra mai na lawaki kei nai valavala kaukauwa: Ena ka talei talega e matana na kedra dra.”—Same 72:12-14.

Ena sautu o vuravura ena kakana. “Ena qai vuataka na vuana ko vuravura; Ena qai vakalougatataki keda na Kalou, io, na noda Kalou.” (Same 67:6) “Ena sa tu e vuravura e na dela ni veiulu-ni-vanua na sila e qumi rawarawa ga.” (Same 72:16) Ena dua na gauna a vakania vakacakamana o Jisu e vica vata na udolu na tamata—qori e vakaraitaka na ka ena cakava ena Matanitu ni Kalou.—Maciu 14:15-21; 15:32-38.

Ena sega ni vakaleqa na lewadodonu na malumalumu vakatamata. “E sega ni vunitaki vua e dua na kabuli, ia e luvawale qai laurai levu na ka kece e matai koya eda na saumitaro vua.” (Iperiu 4:13) E tukuni me baleti Jisu: “Ena sega ni lewa ko koya me vaka na ka sa rairai walega vua, se vunauca me vaka na ka sa rogoca e daligana: Ena lewai ira vakadodonu ga na dravudravua, ka lewa vakadodonu e na vukudra na yalomalumalumu e vuravura.”—Aisea 11:3, 4.

Voleka ni Veiliutaki na Matanitu ni Kalou!

Na torosobu tiko ga ni ituvaki ni bula e vuravura e vakadinadinataka ni sa voleka sara ni vakarusai. E kaya na Same 92:7: “Ni ra sa tubu me vaka na co ko ira nai valavala ca, ka sa bulabula na daucaka ca; sa ka ga me ra kawa boko laivi.” Na cava mo cakava me vakadonui iko kina na Kalou mo bula? A tukuna o Jisu Karisito: “Ena rawata na bula tawamudu o koya e vulica tiko ga na veika e baleti kemuni na Kalou dina duadua ga, kei Jisu Karisito oni tala mai.”—Joni 17:3.

Vakacava o via vulica na ka totoka qori? Me vakataki ratou ga o Heide, Dorothy, kei Firuddin ratou sa cavuti oti mai, o rawa ni kerei ira tale ga na iVakadinadina i Jiova mera vukei iko. Era na marautaka mera sauma nomu taro, o na sega tale ga ni vakacolati se sauma kina e dua na ka.

[Kato/iYaloyalo ena tabana e 17]

NANUMI NI SA TAWAYAGA NA BULA

E vakaitikotiko mai Merika o Emily, a laurai vua na kenisa ni dra ni se qai yabaki vitu. O ira na nona itokani era tauvi matetaka ga ena so na gauna, ia e vica vata na yabaki e vakayacori voli kina vei Emily na veiqaravi vakavuniwai lelevu, wili kina na chemotherapy. E tukuna: “Dua na mate rerevaki na kenisa ni dra!”

Dua na ituvaki dredre e toka kina qori o Emily, ia e dei tu ga nona vakabauta. E vakanamata ina gauna ena veiliutaki kina na Matanitu ni Kalou, ‘ena sega ni tukuna kina e dua ni tauvimate.’ (Aisea 33:24) E tukuna o Emily: “Noqu tikinivolatabu taleitaki na Marika 12:30: ‘Mo lomani Jiova na nomu Kalou ena lomamu taucoko, ena nomu bula taucoko, ena nomu vakasama taucoko, kei na nomu kaukaua taucoko.’ Niu masu vei Jiova, e dau vakaukauataki au o koya. Au vakavinavinakataki Jiova ena noqu vuvale, na ivavakoso au lewena, kei na inuinui ni bula tawamudu ena vuravura Parataisi. Na inuinui qori e vukei au sara vakalevu.”

[iYaloyalo ena tabana e 16]

Ni sa veiliutaki na Matanitu ni Kalou, ena sautu o vuravura ena kakana, vakilai na lewadodonu dina qai sega na veivakaduiduitaki