Siga ni Veivakarusai Vakadomobula e Veicalati kei na Ka o Nanuma

E DINA ni duidui na noda rai me baleta na siga ni veivakarusai vakadomobula eda sa raica mai, ia e tolu na ka e tautauvata kina. Kena imatai, era yavutaki ga mai na rai ni tamata, e laurai tale ga nida sega ni dau vakamacalataka donu na tamata na ka dina me baleta na gauna se bera mai. Kena ikarua, ke rawa na bula ena siga ni veivakarusai, kena irairai ni tiko eso era na bula sivia na siga qori. Kena ikatolu, o ira na bula sivia na veivakarusai vakadomobula era na sasaga vakaukaua mera bula tiko ga.

Ia e veivakacegui na ka e tukuna na iVolatabu me baleta na ka ena yaco ena gauna se bera mai. E vakadeitaka sara ga na iVolatabu ni dua na veisau levu sa voleka ni vakayacori. Ia era na bula ga o ira kece era cakava na ka e vinakata na Kalou. E sega tale ga ni tukuna na iVolatabu ni na vaqeavutaki na vuravura me dravusa se me cevata ena sivia ni batabata. Ena veisautaki ga na vuravura me dua na parataisi.

Ia e dredre mera vakabauta e levu na ka e tukuna tu na iVolatabu me baleta na veigauna se bera mai. O ira na dauveivakadiloi era raica me ka ni tatadra wale ga na ivakavuvuli vakaivolatabu me baleta na veivakararawataki levu, Amaketoni, na duanaudolu na yabaki kei na Parataisi. Na ka kece qori era dau veitalanoataka qai veibataka vakalevu na daunicioloji, era vakadikeva tale ga na kena ibalebale. Era veisisivitaka na ka era vakadikeva, ia e veisaqasaqa. E tukuna e dua na dauvolaivola o Bruce A. Robinson me baleta na iotioti ni veisiga: “Kena irairai ni levu cake na ivola e volai me baleta na vakasama veilecayaki qori mai na kena volai eso tale na ivakavuvuli ni lotu ni veivanua vaKarisito.” Na cava qai yaco kina? Na veilecayaki.

Ia e matata na ka e tukuna na iVolatabu. Na iVolatabu e vosa ni Kalou qai sega ni vinakata o koya me veilecayaki na ka eda kila me baleta na veika ena yaco ena gauna se bera mai. Raica mada eso na taro e dau tarogi vakalevu, qai dikeva na ka e tukuna na iVolatabu. Ke o via kila e levu tale na ka, kerea me dua na nomu ivola Na Cava Sara Mada e Kaya na iVolatabu? tabaka na iVakadinadina i Jiova.

Ena vakarusai na vuravura kei na kawatamata?

“Era na taukena na vanua ko ira na yalododonu, ka tiko kina ka sega ni mudu.”​—Same 37:29.

O cei era na vakarusai?

“Ni ra na tiko ga e na vanua na yalododonu, ka ra na tiko dei kina na yalodina. Ia ko ira na tamata ca era na muduki tani e vuravura, kei ira na dautalaidredre era na cavu laivi maikina.”​—Vosa Vakaibalebale 2:​21, 22.

Vakacava o ira era sega ni doka na Kalou ena gauna sa oti, a bau totogitaki ira na Kalou?

Na Kalou “e sega tale ga ni tuvakasuka me totogitaka na vuravura makawa, ia e maroroi Noa, e dauvunautaka na ka dodonu, kei na vitu tale ena gauna e luvuca kina na vuravura e sega ni doka na Kalou. E vukica tale ga na koro o Sotoma kei Komora me dravusa me kedrau itotogi, me ivakaraitaki ni ka ena yacovi ira era sega ni doka na Kalou.”​—2 Pita 2:​5, 6.

Eda rawa ni kila na tikinisiga ena tauca kina na Kalou nona lewa?

“E sega ni dua e kila na siga ya kei na kena aua, era sega ni kila na agilosi mai lomalagi, e sega ni kila na Luvena, e kila duadua ga o Tamana. Na gauna ena tiko kina na Luve ni tamata ena vaka ga na siga i Noa. Ni bera na waluvu, era kana, era gunu, era vakawati na tagane kei na yalewa, me yacova na siga e vodo kina i waqa o Noa; era sega ni bau kauai me yacova ni tekivu na waluvu qai kuitaki ira kece, ena vaka kina na gauna ena tiko kina na Luve ni tamata.”​—Maciu 24:​36-39.

E tiko na ivakatakilakila ni sa voleka na ivakataotioti ni veisiga?

“Ni na duatani sara na iotioti ni veisiga, ena vakilai kina e levu na ka dredre. Nira na dau lomani ira ga na tamata, era na lomana na ilavo, era na dau tukutukuni ira, era na qaciqacia, era na dau vosavakacaca, era na talaidredre vei ira nodra itubutubu, era na sega ni dau vakavinavinaka, era na sega ni yalodina, sa na yali vei ira na veilomani vakaveiwekani, era na sega ni via okati ena dua na veiyalayalati, era na dau vakaucaca, era na sega ni lewa vinaka na yalodra, era na voravora, era na sega ni vinakata na ka e dodonu, era na dau veinakicataki, era na domoqa, era na dokadoka, era na lomana ga na marau era sega ni lomana na Kalou, e vakarairai ga na nodra qarava na Kalou, e sega na kena dina.”​—2 Timoci 3:​1-5.

Na cava ena yacovi ira na kawatamata e vuravura ena veigauna se bera mai?

Na Kalou “ena qusia tale ga na wainimata kece mai na matadra, sa na sega tale na mate, na lolosi, na tagiyaso, kei na mosi. Sa sega na veika e dau yaco e liu.”​—Vakatakila 21:4.

E dina ni sega ni tukuna na iVolatabu na ka kece ena yaco ena gauna se bera mai, ia e vakadeitaka vei keda ni tiko na inuinui ni kawatamata. Ena sega ni caka rawa na levu ni ka totoka eda na marautaka ena gauna qori. Mo vakadeitaka ni dina na itukutuku qori qai nuidei ni na vakayacora na Kalou o Jiova na ka e yalataka.

[Tikina bibi ena tabana e 25]

Na Kalou “ena qusia tale ga na wainimata kece mai na matadra”