Vakamacalataka e Dua na Marama Jiu na Vuna e Dikeva Tale Kina na Nona Vakabauta

Vakamacalataka mada na nomu isususu.

Au sucu e Merika ena 1979. Rau veisere noqu itubutubu niu se yabaki tolu. A susugi au ena vakabauta vakaJiu o tinaqu, au curu tale ga ena nodra koronivuli. Niu se yabaki vitu keitou toki i Isireli me dua na yabaki, au vuli ena dua na koronivuli ena taoni lailai e vakatokai na kibbutz. Oti keirau toki i Mexico kei tinaqu.

Au muria tiko ga na noqu vakabauta vakaJiu, dina ni sega ena vanua ya na nodra valenilotu na Jiu. Au dau vakawaqa kadrala ena Siga ni Vakacecegu, au wilika na Torah—nodra iVolatabu na Jiu—qai masu niu vakayagataka na ivola ni masu na siddur. Au dau tukuna vei ira na lewe ni noqu kalasi ni tauyavu duadua e liu na neitou lotu. Au se sega ni wilika na Veiyalayalati Vou, e vakabibitaki kina nona cakacaka vakavunau o Jisu Karisito kei na nona veivakavulici. Ia a tukuna vei au o tinaqu meu kua ni wilika na ivola qori, a leqataka niu na vakacalai ena kena ivakavuvuli.

Na cava o wilika kina na Veiyalayalati Vou?

Niu sa yabaki 17, au lesu i Merika meu lai vakaotia na noqu vuli. Au sotava e dua noqu itokani e lotu vaKarisito, e kaya vei au ni na vakainaki ga na noqu bula keu vakabauti Jisu.

Au tukuna vua: “Era vakasesei tu o ira era vakabauti Jisu.”

Taroga o koya: “O sa bau wilika na Veiyalayalati Vou?”

Au tukuna: “Sega.”

Mani tukuna o koya: “Ke va qori, o kila vakacava ni dina na ka o tukuna ke o sega ni vakadeitaka?”

E tarai au sara ga na ka e tukuna, niu sega ni dau taleitaka meu vakamacalataka e dua na ka e sega na kena ivakadinadina. Au mani kauta i vale na nona iVolatabu meu wilika na Veiyalayalati Vou.

E tarai iko vakacava na ka o wilika?

Au kurabui sara ga nira vola na Veiyalayalati Vou na Jiu. Toso noqu wiliwili, au vulica ni o Jisu e dua na Jiu yalololoma, e yalomalumalumu qai dau vinakata me vukei ira na tamata, sega ni vakalolomataki ira. Au gole tale ga ena laibri meu lai kauta mai eso na ivola me baleti koya. Ia au sega ni vakadeitaka ena dua na ivola qori ni o Jisu na Mesaia. So mada ga na ivola qori e vakatokai koya me Kalou, ia au sega ni vakabauta. Ke dina qori, sa vaka meda tukuna tiko ni o Jisu a masu tiko ga vua. O Jisu mada ga a mate, ia e tukuna na iVolatabu me baleti koya na Kalou: ‘Oni sega sara ni mate.’a

Na cava o qai cakava?

Au kila ni ka dina e sega ni dau veisaqasaqa, au mani saga meu kila na ka dina qori. Au masuta na Kalou mai vu ni lomaqu, e imatai tale ga ni gauna meu sega ni vakayagataka na noqu ivola ni masu na siddur. Ni bera ni oti na noqu masu, erau tukituki ena katuba e rua na marama erau iVakadinadina i Jiova. Rau solia vei au e dua na ivola era dauveivakavulici kina ena iVolatabu. Na ivola rau solia kei na momona ni nodrau ivakamacala, au vakadeitaka kina ni yavutaki vakaivolatabu na nodra vakabauta. Kena ivakaraitaki, era vakabauta na iVakadinadina ni o Jisu e sega ni tiki ni Letoluvakalou, ia e “Luve ni Kalou”b e “ulumatua ni ibulibuli ni Kalou.”c

Sega ni dede au lesu tale i Mexico qai lai tomana na noqu vulica na iVolatabu kei ira na iVakadinadina. Au qoroya sara ga niu vulica kina e levu na parofisai me baleta na Mesaia! Ia au se lomatarotaro tiko ga: ‘E baleti Jisu duadua ga na parofisai kece qori? Vakacava ke dua wale ga na tamata vuku qai nanumi ga ni Mesaia?’

A veisau vakacava nomu rai?

Au vulica vei ira na iVakadinadina na parofisai e sega ni rawa ni cakava e dua e nanumi ni Mesaia. Kena ivakaraitaki, ni se vo tu e 700 na yabaki, a parofisaitaka o Maika ni na sucu na Mesaia e Peceliema, e Jutia.d O cei e rawa ni lewa na vanua a sucu kina? O Aisea tale ga a tukuna ni na vakamatei na Mesaia me vaka e dua na daubasulawa, qai bulu vata kei ira na vutuniyau.e Na parofisai kece qori a vakayacori vei Jisu.

E uqeti au tale ga na ivolatukutuku me baleta na yatukawa i Jisu. E tukuna na iVolatabu ni na basika na Mesaia mai na yatukawa i Tui Tevita.f Me vaka nira dau maroroya na Jiu ena gauna ya na ivolatukutuku ni kawa, era sega ni veibataka rawa na kena meca ni basika mai na yatukawa i Tevita o Jisu. O ira mada ga na lewenivanua era vakatokai koya me “Luvei Tevita.”g

Ena 70 S.K.—ni oti e 37 na yabaki nona mate o Jisu—era vakarusai Jerusalemi na mataivalu i Roma, kena irairai ni yali se vakarusai na ivolatukutuku ni kawa. Koya gona, me veidonui kei na ivolatukutuku ni kawa, e dodonu me basika na Mesaia ni bera na 70 S.K.

E tarai iko vakacava na veika o dikeva qo?

E parofisaitaki ena Vakarua 18:18, 19, ni na vakatubura na Kalou mai Isireli e dua na parofita e vakataki Mosese. E kaya na Kalou, “na tamata sa na sega ni vakarorogo ki na noqu vosa sa na tukuna ko koya e na yacaqu, au na tarogi koya kina.” Na noqu vulica vinaka na iVolatabu taucoko, au vakadeitaka kina ni parofita ya o Jisu na kai Nasareci.