Vakamacalataka Nona Vakabauta e Dua na Vuniwai ni Sui

Na cava o taleitaka kina na ka vakasaenisi?

Au dau taleitaka na veikabula niu se gone. Au susu e Richterswil, e dua na koro totoka mai Suwitisiladi, e toka ena yasa ni drano na Zurich. Keitou dau taubale vakavuvale, qai dau vakamacalataki vei au na manumanu kei na vunikau keitou raica.

Na cava o vinakata kina mo vuniwai ni sui?

A veivuke tu vakalailai o tamaqu ena vanua ni veisele ena dua na valenibula e kea. E dau wewenigusuna na veika e raica ena gauna ni veisele. Qori e uqeti au sara ga meu vulica na veika me baleta na veisele. Au mani dua sara na vuniwai ni sui niu taleitaka na veika kece e okati ena cakacaka qori. O ira na vuniwai ni sui era vaka na idinia nira vakavinakataka na sui, masela, kei na ua me rawa nida veitosoyaki.

Au taleitaka tale ga niu dau raica nira sa bula vinaka o ira au qarava. Au marautaka dina noqu qaravi ira na lewenivanua.

Na cava o sega ni vakabauta kina ni tiko na Kalou?

Au se tekivu vakatitiqataka na Kalou niu se itabagone. E rua na vuna, kena matai, niu sega ni taleitaka na nodra ivakarau vakasisila na iliuliu ni lotu. Kena ikarua, era vakabauta na noqu qasenivuli na bula vakaidewadewa. Au mani vakabauta tale ga qori ena gauna au lai vuli kina ena dua na univesiti.

Na cava o vakabauta kina na bula vakaidewadewa?

Au vakabauti ira na parofesa. Au vakabauta ni dua ga na vanua era kawa kece mai kina na manumanu baleta ni tiko eso na ka era tautauvata kina, au vakabauta tale ga ni dau veisau na gene me lai vinaka cake kina na ibulibuli ni dua na kabula (genetic mutation).

Na cava e veisau kina nomu rai?

A sureti au e dua na noqu itokani ena nodra soqoni na iVakadinadina i Jiova. E uqeti au na ivunau momona au rogoca kei na nodra veikauaitaki na lewe ni ivavakoso. A qai sikovi au yani e dua na marama ena ivavakoso ya, au mani tarogi koya, “Au na kila vakacava ni dina na ka e volai ena iVolatabu?”

A vakaraitaka vei au e levu na ka e yaco tu nikua sa parofisaitaki tu mai ena iVolatabu. Kena ivakaraitaki, a parofisaitaka o Jisu ni na yaco ena iotioti ni veisiga qo na ivalu, “uneune kaukaua,” ena tatara na “matedewa, qai vakilai na leqa ni kakana.”a E vakaraitaka tale ga vei au na parofisai me baleta na tikoyavavala, na levu ni kocokoco kei na ka ca e yaco tu nikua.b Qori e uqeti au sara ga meu vulica vagumatua na iVolatabu, au vakabauta tale ga ni dina na ka kece e vakavuvulitaki kina. Au mani dikeva tale se a tekivu vakacava na noda bula.

Na ka o dikeva qori, e sauma beka na nomu vakatataro me baleta na bula?

Io. Ena gauna au vulica tiko kina na iVolatabu, au a vakadikeva tiko na kena dau sele na duru. Tekivu mai na icavacava ni veiyabaki ni 1960, sa qai matata vei ira na saenitisi na vakasakiti ni duruda. Era raica ni duruda e sega ni vaka na idi ni katuba, me loki ga ena dua na vanua, ia e rawa ni veimoiyaki. Na cakacaka vakasakiti qori e rawa kina nida taubale, danisi, vakasisisi, kei na levu tale na ka.

E rauta ni 40 na yabaki nodra saga tiko na dauvakadidike mera vakatotomuria na ibulibuli ni duruda. Ia e dredre ni sa rui vereverea. Ke ra bulia mada ga e dua, ena sega ni dede sa na ca tale. Se mani vakacava na vinaka ni ka e buli kina, era tukuna na kenadau ni na sega mada ga ni bau yacova e 20 na yabaki. E tiko e duruda na sela e rawa ni vakavoutaki koya ga. Na veika vakasakiti e cakava na duruda, au vakadeitaka kina ni dua na Kalou vuku e bulia, sega ni bula vakaidewadewa.

Cava nomu rai me baleta na veisau ni gene kei na ka era tautauvata kina eso na manumanu?

Na ka era tautauvata kina na manumanu e dusia ni dua e buli ira kece. Ia na veisau ni noda gene e yaga ena so na ituvaki, ena sega ga ni lai vinaka cake kina e dua na ka bula baleta ni vakacacana na noda gene. Kena ivakaraitaki, e rawa ni yaga ena so na gauna na vakacalaka. Kaya mada ke ra via kaba e dua na siti na meca. Mera yaco ina siti qori, era na kosova na wavu. A qai coqa na wavu e dua na sitimanivanua mani vakacacana sara. Ena dua na yasana, e veivuke na vakacalaka qori ena nodra tarovi na meca mera kua ni valuta na siti, ia qori ena sega ni vinaka cake kina na ituvaki ni bula ena siti, ena dua tu ga. Na veisau tale ga ni noda gene, e sega ni vakavinakataka cake na ibulibuli ni dua na ka bula. Ke va qori, e macala ni sa sega tu ga ni rawa ni bulia na duruda vakasakiti kei na vo ni tikiniyagoda.

Na cava e uqeti iko mo iVakadinadina i Jiova kina?

E veisautaka sara ga noqu bula na ivakavuvuli vakaivolatabu. Dua na ka noqu qoroya na nodra duavata na iVakadinadina i Jiova niu gole ena dua na nodra soqo cokovata ni veimatanitu ena 2003. E levu keimami se qai sota vakadua nira gole mai na duidui vanua, ia e vaka ga keimami sa veikilai makawa tu mai. Na ivakaraitaki ni veilomani qori e uqeti au sara ga meu dua na iVakadinadina i Jiova.