NA RAI NI IVOLATABU
Veiyacovi Ni Bera Na Vakamau
E cala beka na veiyacovi ni bera na vakamau?
“E loma ni Kalou, . . . ya moni vakatabui kemuni mai na veidauci.”—1 Cesalonaika 4:3.
KA ERA TUKUNA ESO
E vakadonui ena so na vanua na nodrau veiyacovi e rua na uabula erau se bera ni vakamau. Ena so tale na vanua e sega ni cala me rau vakayacora e rua na itabagone erau sega ni vakamau na ivalavala e uqeta na veiyacovi, me vaka na veimoko, veiregu, veiyagoi kei na so tale.
KA E KAYA NA IVOLATABU
E vakayagataki ena iVolatabu na vosa “veidauci” me vakaibalebaletaka na veiyacovi ena taudaku ni vakamau, qo e wili kina na vakayagataki ni gusu ena yago tabu, veiyacovi vakatagane se vakayalewa, veiyacovi ena sala ni valelailai kei na so tale. Ia e tukuna na Kalou vei ira era sokalou vua mera ‘vakatabui ira mai na veidauci.’ (1 Cesalonaika 4:3) Na veidauci e cala bibi, e okati vata kei na veibutakoci, vakatevoro, mateni, qaravi matakau, laba kei na butako.—1 Korinica 6:9, 10; Vakatakila 21:8.
VUNA MO KAUAI KINA
E vakamatatataka na iVolatabu ni na “lewai ira na dau veidauci . . . na Kalou.” (Iperiu 13:4) Koya gona, nida muria na lawa ni Kalou me baleta na veiyacovi e vakaraitaka nida lomana na Kalou o Jiova. (1 Joni 5:3) Na Kalou ena vakalougatataki ira era muria na nona lawa.—Aisea 48:18.
E dodonu beka vei ira era sega ni vakamau mera vakayacora eso na itovo e uqeta na veiyacovi?
“Me kua mada ga ni cavuti ena kemuni maliwa na veidauci, na ka tawasavasava ena kena veimataqali, se kocokoco.”—Efeso 5:3.
KA ERA TUKUNA ESO
Levu era vakabauta ni cala ke rau veiyacovi e rua erau se bera ni vakamau, ia e sega ni cala ke rau vakayacora na ivalavala e uqeta na veiyacovi.
KA E KAYA NA IVOLATABU
E sega ni cavuti ga ena iVolatabu na veidauci ni vakamacalataki na ivakarau vakasisila ni veiyacovi, e cavuti tale ga kina na “ivalavala tawasavasava” kei na “ivalavala vakasisila.” (2 Korinica 12:21) E matata vakasigalevu ni cata na Kalou eso na ivalavala e uqeta na veiyacovi e caka ena taudaku ni vakamau, ke sega mada ga kina na veiyacovi.
E tukuna na iVolatabu ni veiyacovi e baleti rau ga na tagane kei na yalewa erau sa vakamau. E vakacala tale ga e dua e “dau garosa.” (1 Cesalonaika 4:5) Na cava na kena ibalebale? Vakasamataka mada na ivakaraitaki qo: E dua na yalewa e sega beka ni lomana me veiyacovi kei nona itau. Ia erau se cakava tiko ga na ivalavala e uqeta na veiyacovi. Na nodrau cakava qori erau sa garova tiko e dua na ka e dodonu me qai marautaki ga ena gauna ni vakamau. Sa vakacalai rau gona na nodrau “garosa.” Qori e vakacala na iVolatabu.—Efeso 5:3-5.
Mo vorata vakacava na veiyacovi vakasisila?
“Dro tani mai na veidauci.”—1 Korinica 6:18.
VUNA MO KAUAI KINA
E tukuna na iVolatabu ni o ira era veiyacovi ni bera na vakamau era na vakaleqa nodra veiwekani kei na Kalou.—Kolosa 3:5, 6.
KA E KAYA NA IVOLATABU
E vakarota na iVolatabu mo “dro tani mai na veidauci.” (1 Korinica 6:18) Kena ibalebale me vakayawaki koya na yalewa se tagane mai na veitemaki ena coriti kina me veiyacovi. (Vosa Vakaibalebale 22:3) Kena ivakaraitaki, me dua e savasava tiko ga e bibi me yalana nona dau vakailala kei ira era sega ni muria na ivakavuvuli ni Kalou me baleta na veiyacovi. E vakarota na iVolatabu: “Ena vuku mai ko koya sa malele vata kei ira na vuku: Ia ko koya era veitokani vata kei na lialia ena rusa.”—Vosa Vakaibalebale 13:20.
Eda na vakayacora tale ga na ivalavala vakasisila ke da vakatawana ena noda vakasama na veika dukadukali. (Roma 8:5, 6) E ka vakavuku gona meda qarauna na ivakatagi, iyaloyalo, ivola, kei na veika eso e vakaraitaki kina na veiyacovi se na ivalavala e uqeta na veiyacovi e cata na Kalou.—Same 101:3.