Veisiko i Itali

E LEVU na duidui e laurai e Itali, dua na yasana e veinuku balavu, dua tale na yasana na ulunivanua sukusukura; e katakata na draki ena ceva qai batabata sara ena noca. E vanua ni volukano, ia e vica ga se buebue tiko me vaka na ulunivanua na Stromboli kei Etna.

O Itali na vanua duadua ga e Urope e levu na kena lewenivanua. E levu era takoso kina, o ira na kai Arapea, o ira mai Byzantine, Kirisi, o ira mai na babatokalau kei Varanise, wili tale ga kina o ira mai Finisia.

E levu e Itali na iyau talei kei na droini ni gauna makawa. Ena levu na taoni kei na siti e tu kina na irusarusa ni vale makawa mai Kirisi kei Roma. E tu tale ga e Itali na mataniwai, matakau ceuti, kei na nodra droini na daudroini rogo me vakataki Bernini, Michelangelo, kei Raphael.

Era kilai tale ga na kai Itali nira taleitaka na kana, e dau nodra ivakarau ni bula. Ni vakarautaki na kakana e dau liu na pasta (e vaka na irairai ni noodles), oti sa qai dau vakarautaki na kena icoi, na lewenimanumanu se ika kei na kakana draudrau. Ni sautu na vanua qori ena olive, era dau vakayagataka e levu na waiwai olive ena nodra vakasaqa. Na kakana taleitaki mai Itali na pizza (vaka na ibulibuli ni roti biu e delana na kena isaluaki qai vavi) kei na risotto (via vaka na suvu raisi).

Era kilai tale ga na kai Itali nira dauveikauaitaki ra qai dau veimaliwai. Era taleitaka mera dau talanoa, ke ra tu ena vanua ni gade se ra taubale e salatu o na raica nira matanataka toka na ka era tukuna.

E levu mai Itali era lotu Katolika, ia vica wale sara era dau lai lotu. Sa sega ni kaukaua sara e kea na lotu qori ena vica ga na yabaki qo, nira sa sega ni kauaitaka na lewenivanua na ivakavuvuli ni lotu me baleta na vakalutu kei na veisere.

Sa tubu tiko na kedra iwiliwili na iVakadinadina i Jiova e kea. Era kilai nira dauveivakavulici ena iVolatabu ena nodra vunau e veivale, era saga tale ga mera muria na kena ivakavuvuli. E sivia e 3,000 na ivavakoso ni iVakadinadina i Jiova e kea, e levu era saga mera vakavulici ira e duidui na nodra vosa. Dua na ka na levu ni vulagi era gole yani e Itali ena loma ni tini na yabaki sa oti, e vinakati gona o ira era kila na nodra vosa mera vakavulici ira ena iVolatabu.