Masu

E dau rogoci noda masu?

“Oi kemuni sa daurogoca na masu, ena toro mai vei kemuni na tamata kecega.”—Same 65:2.

KA ERA TUKUNA ESO

E tukuni ni masu e “sega mada ga ni sivita na dokanivale.” O ira na rarawa voli era na rairai vakatitiqataka ni rogoci tiko na nodra masu.

KA E KAYA NA IVOLATABU

E vakaraitaka na iVolatabu: “Ni wanonovi ira tiko na yalododonu na mata i Jiova, e qara tu na daligana ina nodra vakamamasu; ia e saqati ira na daucaka ca o Jiova.” (1 Pita 3:12) E matata kina ni dau rogoca na Kalou na masu. Ia e dau rogoca ga na nodra masu na muria nona veivakavulici. E kaya e dua tale na tikinivolatabu me baleta na nona yalorawarawa ni rogoca na noda masu na Kalou: “Ena levu ni noda nuitaki koya, eda kila se cava ga eda kerea me salavata kei na nona inaki, ena rogoci keda o koya.” (1 Joni 5:14) Koya gona e bibi meda kila tiko ni dodonu me salavata kei na inaki ni Kalou na noda masu.

Meda masu vakacava?

“Ni o masu, kua ni cavuta tiko ga e dua na qaqanimasu.”—Maciu 6:7.

KA ERA TUKUNA ESO

O ira na iliuliu ni lotu Buda, Idu, kei na Musolomani, era dau vakavulici ira nodra lewenilotu mera vakayagataka na itaube mera cavuqaqataka kina nodra masu, mera wilika tale ga.

KA E KAYA NA IVOLATABU

Na masu e dodonu me vu mai lomada, me kua ni cavuqaqataki tu ga, se talevi wasoma. E veiuqeti na ka e kaya na iVolatabu: “Ni o masu, kua ni cavuta tiko ga e dua na qaqanimasu me vaka era cakava na lewe ni veimatanitu, nira nanuma nira na rogoci ke balavu na nodra masu. Ni kua ni vakatotomuri ira, ni kila na Tamamuni na ka oni vinakata ni bera mada ga ni oni kerea.”—Maciu 6:7, 8.

VUNA MO KAUAI KINA

Ke sega ni vakadonuya na Kalou na sala o masu kina, ena vakaoti gauna wale ga, de dua o na rawa ni vakacudruya tale ga na Kalou. E kaya na iVolatabu ni “vakasisila” vua na Kalou na nodra masu o ira era sega ni cakava na lomana.—Vosa Vakaibalebale 28:9.

Meda masu vei cei?

“Dou vakasaqarai Jiova [Kalou] ni sa kune rawa; dou masuti koya ni sa voleka tiko.”—Aisea 55:6.

KA ERA TUKUNA ESO

So na dausokalou era masuti Meri, se ra masuti ira na agilosi kei ira na “sanito” era dau doka vakalevu. Dua vei ira na “Sanito” o Anthony mai Padua, e tukuni ni dau qarava na “veika vakayalo kei na veika eda gadreva,” vaka kina o “Sanito” Jude, e tukuni ni sanito ni “gauna ni rarawa.” Levu era masuti ira na “sanito” va qori kei ira na agilosi nira nanuma ni na matataki ira vua na Kalou.

KA E KAYA NA IVOLATABU

Mera masu ga na dausokalou dina vua na ‘Tamada mai lomalagi.’ (Maciu 6:9) E veiuqeti na iVolatabu: “Moni kua ni lomaocaocataka e dua na ka, ia na ka kece me vakaraitaki vua na Kalou ena masu kei na kerekere salavata kei na vakavinavinaka.”—Filipai 4:6.