iVakarau ni Lomada

CUDRU

IVAKAVUVULI VAKAIVOLATABU: “E vinaka o koya e berabera ni cudru, e ca na tamata qaqa.”—Vosa Vakaibalebale 16:32.

KENA IBALEBALE: Ena yaga na noda saga me lewai matau na ivakarau ni lomada. Eso na gauna ena rairai donu na ka eda cudruvaka, ia ke sega ni lewai vinaka ena vakavu leqa. Era dikeva na dauvakadidike ena gauna qo ni gauna era cudru kina eso, era dau tukuna se cakava na ka era qai veivutunitaka tale.

KA O RAWA NI CAKAVA: Saga mo lewa vinaka nomu cudru me kua ga ni lewai iko. Eso era nanuma nira tamata kaukaua na dau cudrucudru, ia e cala na rai qori. E kaya na iVolatabu: “E vaka na koro e botei ni sega na kena bai na tamata e sega ni lewa vinaka na nona cudru.” (Vosa Vakaibalebale 25:28) Dua na sala mo lewa vinaka kina nomu cudru, oya nomu kila na itukutuku matata kece ni bera ni o tukuna se cakava e dua na ka. “Na nona yalomatua na tamata e berabera kina ni cudru.” (Vosa Vakaibalebale 19:11) E vinaka meda rogoca na yasana ruarua ni veika e yaco, nida na lewa vinaka kina na ivakarau ni lomada.

VAKAVINAVINAKA

IVAKAVUVULI VAKAIVOLATABU: “Me laurai na nomuni vakavinavinaka.”—Kolosa 3:15.

KENA IBALEBALE: E tukuni nira tamata mamarau o ira na dau vakavinavinaka. Era vakadinata mada ga qori o ira e mate vakasauri e dua era veivolekati. Era kaya ni vukea vakalevu na ivakarau ni lomadra na nodra vakasamataka na ka e vakamarautaki ira tiko, sega ni veika e vakavuna nodra rarawa.

KA O RAWA NI CAKAVA: Vakasamataka e veisiga na veika o marautaka tiko ena gauna qo. E sega ni tukuni me ka lelevu sara. Rawa ni o vakasamataka na ka lalai mada ga me vaka na totoka ni cabe ni matanisiga, nomudrau marautaka na veitalanoa kei na dua o dau lomana, se na kena talei vei iko e dua na siga vou. Na veika qori e rawa ni vakavinakataka na ivakarau ni lomamu, kevaka wale ga mo dau vakasamataka qai vakavinavinakataka.

Ena yaga tale ga vakalevu nomu vakasamataka na vuna o vakavinavinakataki ira kina nomu vuvale kei ira na nomu itokani. Ni o sa kila rawa qori, tukuna sara vei ira se volavola, imeli, se vakau itukutuku ena talevoni. Ena qaqaco kina na veiwekani, o na vakadinata tale ga na marau e vakilai nida dau soli ka.—Cakacaka 20:35.

ESO TALE NA IVAVAKAVUVULI VAKAIVOLATABU

BIUBIU NI BERA NA VEIBA.

“Ni tekivu na veileti e vaka na dola ni baniua, ni bera ni tubu na veiba mo biubiu.”​—VOSA VAKAIBALEBALE 17:14.

KUA NI LOMAOCAOCATAKA NA SIGA NIMATAKA.

“Kua vakadua ni lomaocaocataka na siga nimataka, ni siga nimataka e tu vata kei na kena lomaocaoca. Na siga kece sa dui tu ga na kena ca.”​—MACIU 6:34.

KUA NI YALOTOTOLO, VAKASAMA VINAKA MADA.

“Ena qai taqomaki iko na raiyawa, ena viribaiti iko na yalomatua.”​—VOSA VAKAIBALEBALE 2:11.