E Rawa ni Vakaleqa Vakacava na iYaya Vakalivaliva Nomu Bula Vakawati?
Ke rau vakayagataka vinaka na veiwatini na talevoni, tablet se kompiuta, ena rawa ni dei kina nodrau bula vakawati. Kena ivakaraitaki, ena rawa ni rau veitaratara wasoma ena loma ni dua na siga.
Ia eso na veiwatini era vakayagataka cala nira . . .
vakaleqa nodra gauna vata vakaveiwatini
vakaliuca tiko ga nodra cakacaka nira tiko mada ga i vale
uqeta kina na lawaki.
KA MO KILA
NOMUDRAU GAUNA VAKAVEIWATINI
E kaya e dua na tagane vakawati o Michael: “Eso na gauna ni keirau tiko ruarua vakaveiwatini, e vaka ga e tu tale ena dua na vanua o watiqu. Ena vakaraica toka ga na nona talevoni, qai kaya, ‘Au se qai raica sara tu ga qo noqu talevoni.’” E kaya e dua na tagane vakawati o Jonathan ni gauna va qori, “erau tiko ruarua na veiwatini ena dua na vanua, ia ena vaka ga rau tu veiyawaki.”
VAKASAMATAKA MADA: E vacava na levu ni gauna e vakaleqa kina nomudrau veitalanoa vakaveiwatini na text kei na qiri?—EFESO 5:33.
CAKACAKA
Ena vuku ni nodra cakacaka, ena vinakati vei ira eso mera yadrava tiko ga na qiri kei na imeli ena nodra talevoni ke ra tiko mada ga i vale ena bogi. Eso era sega ni osooso sara va qori, ia era se kauaitaka tiko ga vakalevu na nodra cakacaka ena gauna era suka kina. E kaya e dua na tagane vakawati o Lee: “Gauna mada ga au tuvanaka meu veimaliwai kina kei watiqu, e dau totolo ga noqu sauma na qiri se text e vakau mai vanua ni cakacaka.” E kaya e dua na yalewa vakawati o Joy: “Dina niu cakacaka tiko ga mai vale, ia au sa dau via cakacaka tu ga ena gauna ni suka. E dau dredre gona meu veiraurautaka na ka.”
VAKASAMATAKA MADA: O dau vakarogoci watimu vinaka ni vosa tiko vei iko?—LUKE 8:18.
BULA VAKAWATI
Levu era kaya ni dau vakavuna na veivala vakaveiwatini ni dua e vuvutaka na ka e biuta o watina ena sala ni veikilai ena internet. Eso mada ga era kaya nira dau vunitaka vei watidra na ka era vakauta se biuta ena internet.
Levu era vakabauta ni bibi tale ga meda qaqarauni ni vakayagataki na sala ni veikilai ena internet, ni rawa ni vakavuna na lasaituba. Sa rauta mera kaya e levu na loya era qarava na kisi ni veisere, ni qori e dau vakavuna e levu na veisere.
VAKASAMATAKA MADA: O dau veitalanoa lo kei na dua e sega ni watimu?—VOSA VAKAIBALEBALE 4:23.
KA MO CAKAVA
VAKADEITAKA NA KA E BIBI
Ke dua e sega ni dau kana ena kena gauna ena sega ni bulabula. Ke dua tale ga e sega ni vakayagataka vakalevu nona gauna vei watina, ena vakaleqa nona bula vakawati.—Efeso 5:28, 29.
IVAKAVUVULI VAKAIVOLATABU: ‘Vakadeitaka na veika era bibi sara.’—FILIPAI 1:10.
Drau veitalanoataka qai toqa se vola na vakatutu drau na via muria, me dei kina nomudrau vakawati.
Saga me daru kanavata mada ga vakadua ena dua na siga
Eso na gauna me daru kua tu mada ni vakayagataka nodaru tablet se talevoni
Tuvanaka e dua na gauna me daru marautaka vata
Me biu vakatikitiki na nodaru talevoni, me yawa mai na vanua daru moce kina
Bokoca tu mada nodaru talevoni me 15 na miniti ena veisiga me daru veitalanoa vinaka
Lokuca na gauna me daru bokoca tu mada na internet